Plattdeutsche Nachrichten Plattdüütsche Narichten vun'n 23. Januar 2025

Grünnen för Metzattack in Aschaffenborg nich klaar

Aschaffenborg: Na de Metzattack mit twee Doden un dree Sworversehrten is de Grund dorför jümmer noch nich klaar. Na Utkunft vun Bayerns Binnenminister Joachim Herrmann weer de Mann al dreemal wegen Gewalt opfullen un dorüm ok bi’n Nervendokter ween. Henwiesen op terroristisch Grünnen gifft dat aver betto nich. De 28-johrige Afghaan hett güstern en Kinnergoorngrupp angrepen un dorbi en Jung un en erwassen Mann dootmaakt.

Weltwirtschaftsforum geiht mit Trumps Reed wieter

Davos: In Davos in de Swiez geiht hüüt dat Weltwirtschaftsforum wieter. Besünners luert se all op de Reed vun Donald Trump per Video an’n laten Namiddag. De nee’e US-Präsident un siene eersten Ordelen sünd in de verleden Daag al Thema ween. Mehrere Deelnehmers hebbt scharp kritiseert, datt Trump nee‘e Töll künnig maakt hett. UN-Generaalsekretäär Antonio Guterres meent, datt dat kortsichtig vun de USA is, sik ut den Klimaschutz trüchtotrecken.

Nee’e Waldbränn bi Los Angeles

Los Angeles: In de Neegde vun de tweetgröttsten Stadt in de USA is al wedder en Füer opbluckt. Üm un bi 19.000 Minschen hebbt ehr Hüüs verlaten musst. De Füerwehr versöcht mit Löschflegers dat Füer to kontrolleern. Dat brennt in en Flach vun Bulten un hett sik binnen twee Stünnen utbreedt. In de verleden Weken hebbt starke Füer veele Hüüs twei maakt, 28 Minschen sünd dorbi to Dode kamen.

Grunderwerbsstüer stiggt in Bremen

Bremen: Wokeen in Tokunft en Huus, en Wahnung oder en Stück Land kopen will, mutt mehr betahlen. De Bremsche Börgerschaft hett beslaten, datt de Grunderwerbsstüer vun de Mitt vun’t Johr an ropsett ward. Se stiggt denn vun 5 op 5,5 Perzent. De root-gröön-rode Senaat haapt, datt so üm un bi 10 Millionen Euro mehr per Johr in de Kass kaamt. CDU, FDP un Bündnis Düütschland hebbt dat bekriddelt.

Football Champions League: Bayern verleert düütlich

Rotterdam: In de Football Champions League hett Rekordmester Bayern München en düütlichen Daalslag kasseert. Gegen Feyenoord Rotterdam hebbt de Münchner mit 0 to 3 verloren. RB Leipzig hett gegen Sporting Lissabon mit 2 to 1 wunnen.

Dat Weer

Un nu en Blick op dat Weer: In Bremführ 3, in Bremen un Bremerhaben 4, un op Borkum sünd dat opstünns 5 Graad. Hüüt Vörmiddag treckt de Regen af. Darna lockert de Wulken op, un af un an kiekt de Sünn ruut. Vun de Noordsee her kaamt aver noch enkelte Schuers na. An’n Avend treckt in’t Werser-Ems-Flach nee’er Regen op. De Temperaturen liggt bi 5 bet 7 Graad. In de Nacht is dat dicht wulkig un faken natt. Gegen Middernacht ward de Regen eerst an de Ems weniger, to’n Morgen hen ok an de Elv. Darna lockert de Wulken’n beten op. Dat Thermometer sackt daal op 4 bet 2 Graad. Morgen is dat meisttiets wulkig, de Sünn kummt hööchstens mal för Minuten ruut. An’n Vörmiddag kaamt vun de Ems her wedder nee’e Regenwulken op. An’n Avend ward de Regen vun de Noordsee her wedder weniger. Dat ward noch’n beten lauer bi 7 bet 9 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.