Plattdeutsche Nachrichten Plattdüütsche Narichten vun'n 21. Januar 2025

Nee’er US-Präsident Trump ünnertekent vele Papeere

Washington – De nee’e US-Präsident Donald Trump hett kort na denn he ünner Eed nahmen is, all vele Papeere ünnertekent. De Orders schüllt Inwannerung een scharpe Grenz setten, den Papeerkrieg afboon un Plaans vun de Vörgängerregeern ünner Joe Biden trüchdreihn. Buterdem hett Trump üm un bi 1.500 Minschen begnadigt, de bi’n Storm vun sien Anhänger op dat Kapitol an’n 6. Januar 2021 darbi weern.

Scholz un Merz reist na Davos

Davos – Bi’n Weltwertschuppsforum in de Schweiz fangt hüüt dat Programm so richtig an. In’n Middelpunkt steiht woll de Wertschuppspolitik vun’n nee’en US-Präsidenten, vör allens de andrauten Tölle babenop. Een paar Staats-un Regeernböverste wüllt hüüt een Reed hollen, darunner Bunneskanzler Scholz, de ukrainsche Präsident Selenskyj un Israels Staatspräsident Herzog. Ok mit Unions-Kanzlerkandidat Merz rekent se in Davos.   

Vermoden RAF-Terroristin Klette hett woll mal in Bremen leevt

Bremen – De vermoden RAF-Terroristin Daniela Klette hett woll tominnst för een Tied in Bremen leevt. As buten un binnen ut Kreisen vun de Justiz to weten kregen hett, hett de 66-Jöhrige 2014 un 2015 in een Ferienwahnung in de Hollerstraat in’t Bremer Steintorviddel wahnt. Vun dar ut schall se ok een paar vun de Verbreken, de ehr vörsmieten ward, plaant hebben. Dat Narichtenmagazin „De Spegel“ vermellt, in Klettes Bremer Wahnung is woll de Attack op een Geldtransporter in Stuhr plaant worrn.

Mit Afsicht kaputt Maken ward in Parkhüüs jümmer mehr

Bremen – In Parkhüüs in de Stadt sünd Verbreken un dat mit Afsicht kaputt Maken vun Saken een jümmer grötteret Problem. Dat hebbt de Bedriever vun ünnerschedlichen Ünnernehmen op Nafraag togeven. De Firma Contipark sett darum mehr Sekerheitspersonal ünner annern an’n Hillmannplatz in. Ok dat Ünnernehmen Goldbeck sett op mehr Sekerheitskuntrullen.

För de Handballer geiht de WM-Hauptrunn los

Herning – För de dütschen Handballer geiht hüüt de WM-Hauptrunn los. De Gegner is man richtig swar – de Mannschupp vun Bunnestrainer Gislason dreept op Weltmeister Dänemark un hett nich vele Schangsen darop, de Nääs vörn to hebben.

Dat Weer

Un nu een Blick op dat Weer: in Bremen un Deefholt minus 1, in Bremerhaben plus 1 un op Wangerooge sünd dat opstunns plus 2 Graad. Hüüt hollt sik den Dag över vele Wulken un Regen fallt meist nich. Blots verenkelt köönt een paar Druppen fallen un hier un dar kann mal de Sünn rutkieken – bi 0 bit 3 Graad. Tokamen Nacht is de Heben mal dick, mal locker wulkig. Af un an kann man de Sterns funkeln sehn. Dat blifft dröög, Nevel kann ok optrecken. Dat Thermometer sackt op 0 bit minus 4 Graad. Op de Eilanden gifft dat mit plus een bit null Graad meist keen Frost. Morrn wesselt sik dicke Wulken un een beten Sünnschien af. Erst fallt keen Regen, later treckt dar aver Wulken op un dat kann natt vun baben kamen – bi 2 bit 4 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.