Plattdeutsche Nachrichten Plattdüütsche Narichten vun'n 31. Januar 2025

Bunnsdag stimmt af över Gesetz-Plaan, mit den nich all inverstahn sünd

Berlin: De Bunnsdag snackt jüst nu över en Andrag vun de CDU/CSU to’t Inwannern. Een Punkt is: Minschen op de Flucht schüllt nich mehr so eenfach de Familie na Düütschland halen. Dat de Gesetz-Plaan dörgeiht, dorför bruukt de Union de Stimmen vun de AfD. Bekannte Politikers as de fröhere Kanzlersch Angela Merkel, Lüüd, de den Holocaust överleevt hebbt, un Schauspelers as Daniel Brühl harrn CDU-Baas Merz opropen, düssen Plaan nich umtosetten. De SPD seggt: Wat in den Gesetzplaan binnensteiht, is nich mit de Verfaten övereens. Wenn’t nich anners geiht, will se dormit vör dat Bunnsverfatensgericht.

Gegen Afstimmung op de Straat – ahn Larm un Arger

Bremen: Teihndusende Minschen sünd överall in Düütschland dorgegen op de Straat gahn, dat Union un AfD tohoop afstimmt. Ok in Bremen harrn sik sowat 1.000 Lüüd versammelt. Dat weren kloor mehr, as se dacht harrn. De Polizei seggt: Dat is allens ahn Larm un Arger aflopen. In Hannover hebbt 7.000 Minschen demonstreert.

Froen, de en Kind in’n Buuk verloren hebbt, kriegt mehr Stütt

Berlin: Froenslüüd, bi de dat Kind na de 12. Week in de Schwangertiet dootgeiht, kriegt en Anrecht op Mudderschutz. Dat hett de Düütsche Bunnsdag güstern Avend ahn Gegenstimm fastleggt. Froen in düsse Laag schüllt mehr Tiet kriegen, dat se sik dor mit Lief un Seel op instellen köönt. För Mudderschutz gellt egens de sess Weken vör un acht Weken na de Geboort. In düsse Tiet mööt de Froenslüüd nich arbeiden. Verleert de Fro dat Kind, gifft dat düsse Stütt bet nu nich.

Bremen bruukt mehr as 2 Milliarden Euro för Scholen

Bremen: Dat Scholen in de Stadt Bremen nee boot oder op Schick brocht warrt, dorför bruukt se in de tokamen Johren twee Milliarden Euro. Dat hett Bildungssenatersch Sascha Aulepp anseggt. Noch enige hunnert Millionen sünd för de Scholen in Bremerhaven nödig. Dat Geld kunn aver nich ut den Huusholt kamen. Ok an private Geldgevers müss de Staat ran.

Bremer Neestadt: keen Stroom

Bremen: En Kabel weer twei, un dorvun harrn Hunnerte Wahnungen in de Bremer Neestadt güstern Avend keen Stroom. Ok de Stratenlampen un de Ampeln weren ut. Eerst weer de Stroom in de Gegend Buntendoor wegbleven, later weer dat denn um de Langemarckstraten / Westerstraten un den Hogendoors-Park düüster.

Dat Weer

Un woans süht dat mit dat Weer umto ut? Opstunns hebbt wi in Bremen un Rotenborg 2 Graad, in Bremerhaven un Emm sünd dat 3 Graad. Vundaag: Mal Sunnschien, mal dichte Wulken, meisttiets dröög. Bet Namiddag sammelt sik na de Elv to mehr Wulken. Man ok hier blifft dat dröög. Dat Thermometer krabbelt op 5 bet 7 Graad. De Wind dorto weiht flau, an de See ok en beten mehr vun de westen bet süüdwesten Kant. Tokamen Nacht: Mehr un mehr breedt sik dichte Wulkenfeller ut, man pladdern will dat liekers nich. Bi plus 2 bet minus 3 Graad. Morgen: Gries mit hogen Daak, de sik ok den ganzen Dag över holen kann. Dat kann ok en beten pieseln. Dat Ganze bi 2 bet 5 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Kuhnen.