Plattdeutsche Nachrichten Plattdüütsche Narichten vun'n 3. Februar 2025

Protesten gegen Rechtsextremismus

Berlin: Wegen de scharpen politischen Debatten över de Migratschoonspolitik sünd ok güstern wedder Massen vun Lüüd op de Straat gahn. In Berlin weern na Utkunft vun de Polizei 160.000 Minschen dorbi, de Veranstalters hebbt vun bet to 250.000 Minschen snackt. Se wüllt ünner annern, datt sik de CDU vun de rechts-populistischen AfD afsett.

Wahlparteidag vun de CDU

Berlin: De Union will hüüt op ehren Wahlparteidag dat so nöömte Sofortprogramm mit de Plaans vun Parteibaas Friedrich Merz to dat Thema „Towannern“ afnicken. In dat Papeer steiht de Fief-Punkte-Plaan vun Merz, in den dat üm dat Trüchwiesen an de Grenzen un üm Grenzkontrollen op Duer geiht.

Schuum vun de See an düütsche Küsten vull mit Chemie

Norderney: In den Schuum vun de See an düütschen Küsten is na Utkunft vun de Ümweltorganisatschoon Greenpeace veel vun de Chemikalie PFAS binnen. Dat wüllt se vun en Ünnersökensbericht weten, de bi de ARD vörliggt. Dat is bi dat Meten ünner annern op de Noordsee-Eilannen Sylt un Norderney un in’t Oostseebad Kühlungsborn rutkamen. PFAS is water- un fettafwiesend un in veele Alldagssaken binnen.

Musikpries Grammy vergeven

Los Angeles: Güstern is de Musikpries Grammy vergeven worrn. As eerste Swatte hett de US-Sängersche Beyoncé den Pries för dat beste Country-Album vun’t Johr kregen. De düütsche Filmkomponist Hans Zimmer hett för sien Arbeit an’n tweten Deel vun den Kinofilm „Dune“ den Grammy för de beste Musik för visuelle Medien kregen.

Däänmark al wedder Handball-Weltmeister

Oslo: In dat Endspeel bi de Handball-WM hebbt de Dänen güstern Avend Kroatien mit 32 to 26 vun’n Platz schickt un sünd nu to’n veerten Mal in de Reeg Weltmeister worrn.

In de düütschen Ieshockey-Liga hebbt de Fishtown Pinguins tohuus in Bremerhaben mit 1 to 3 gegen den Tabellenböversten Ingolstadt verloorn. De Pinguins liggt opstünns op’n föfften Platz in de Tabell.

Dat Weer

Un nu en Blick op dat Weer: In Deefholt un Emmen -6, in Bremen un Bremerhaben -5, un in Leer sünd dat opstünns -4 Graad. Hüüt geiht dat dakig-gries in den Dag. Vun Middag an lockert de Feller mit Daak un hogen Daak eerstmal op, so datt ok mal de Sünn rutkummt. An’n Namiddag breedt sik aver vun de Nedderlannen her wedder nee’e Feller mit hogen Daak ut bi 2 bet 4 Graad. In de Nacht lockert de Wulken un de hoge Daak eerstmal op. Besünners Oosten de Werser is de Heven to’n Deel licht wulkig oder de Steerns sünd ok to sehen. Later bildt sik vun’t Emsland bet to de Noordsee nee’e Feller mit Daak un hogen Daak. Dat Thermometer fallt op 1 bet -5 Graad. Morgen gifft dat eerst Feller mit Daak un hogen Daak, in’n Süüden un Oosten vun Bremen is dat hier un dor aver ok mal klaar mit Sünnschien. Vun Middag an lockert dat ok an de Ems, in Bremen un an de Noordsee op. Denn wiest sik ok dor af un an de Sünn bi 3 bet 6 Graad.

Dat weern de Narichten op platt. Tohoopstellt hett se Ralph Stölting. Op Platt trechtmaakt un vörleest vun Marc Gelhart.