Plattdeutsche Nachrichten Plattdüütsche Narichten vun'n 4. Februar 2025

Mehr Attacken op Afordnete 2024

Berlin – Dütlich mehr Afordnete un annere Amts- un Mandatsdräger sünd in Dütschland in’t verleden Johr angriepen worrn. Dat vermellt Bläder vun’t Redaktschonsnettwark Dütschland. Darna sünd mehr as 4.900 vun socke Straafdelikten mellt worrn – 900 mehr as in’t Johr vördem. Ok Börgermeister, Landräte or Stadtverordnete ward attackeert. De mehrsten vun de Straafdelikte hebbt in Bayern un Baden-Württembarg stattfunnen.

Ok dütsche Reeder verköfft Tanker na Russland

Hamborg – Reeder ut Europa un Amerika hebbt in de verleden Johren 230 ole Tankscheep in de so nöömte russische Schaddenflott verköfft. Tohoopnahmen hebbt westlich Schippseegner dardör tominnst 6 Milliarden US-Dollar innahmen. Ok een paar dütsche Reedereen hebbt daran verdeent, to’n Bispill de Hamborger Reederfamilie Krämer. De Grootdeel vun de Scheep ward woll darför insett, de westlich Strafen gegen Russland to ümgahn.

China antert op Trumps Import-Tölle

Peking – China föhrt Tölle för Waren ut de USA in. Dat hett dat Finanzministerium in Peking an’n Morrn vermellt. För Köhlen un Nattgas ut de USA nimmt China to’n Bispill 15 Perzent Importtölle. Dat Land antert darmit op dat, wat de Trump-Regeern vörhett. Tölle op mexikansche un kanadsche Importe harr Trump wedder utsett, achter dat he mit de Regeern vun beid Lännern snackt hett.

Ümweltminister foddert Schreed gegen „Ewigkeitschemie“

Hannober – De Ümweltminister vun Neddersassen, Meyer, foddert de EU-Kommischon op, gegen gefährlich PFAS-Chemie gegenan to gahn. De weern vun de Ümweltorganisatschon Greenpeace ünner annern in See-Schuum an Strännen vun Nord- un Ostsee faststellt worrn. Dütschland sett sik all länger darför in, dat socke „Ewigkeitschemie“ in de EU duller inschränkt ward, so Meyer. De Minister sä buterdem, dat för Minschen, de in de See swimmt, keen Gefohr besteiht.

Geld för Planten op’t Dack or dat Bruuken vun Regenwater

Bremen – Huusbesitter in Bremen un Bremerhaben köönt vun nu an Föddergeller för den Klimaschutz beandragen. Geld gifft dat to’n Bispill, wenn een op sien Dack or an de Huuswand Planten sett. Ok wenn Plastersteens wedder hochnahmen or Regenwater in’n Gaarn bruukt ward, kann een Geld beandragen. Tohoopnahmen stellt dat Land Bremen een half Million Euro darför praat.

Dat Weer

Un nu een Blick op dat Weer: in Bremen, Bremerhaben un Deefholt 1 un op Wangerooge sünd dat opstunns 2 Graad. De Dag fangt faken mit Nevel or hogen Nevel an, in’n Oosten un Süden vun Bremen is dat aver ok klaar un de Sünn kiekt rut. Vun Middag an lockert dat ok an de Ems, in Bremen un an de Nordsee op un de Sünn kann sik dörsetten – bi 4 bit 6 Graad. Tokamen Nacht is de Heben erst licht wulkig or klaar, an de Ems un de Nordsee sünd ok all Wulken to sehn. Vun dar treckt denn ok een beten Regen or Sprütteregen op, in’t Binnenland kann dat glatt weern. Dat Thermometer sackt op plus 3 Graad op de Eilanden un null bit minus 1 Graad in’t Binnenland. Morrn fangt de Dag mit dicken Wulken un noch een beten Regen or Sprütteregen an. Later wesselt sik Wulken mit een beten Sünn af, bi 6 bit 8 Graad. Dat weern de Narichten op Platt. Sven Kuhnen hett se tohoopstellt. Op platt trechtmaakt un vörleest hett se Heidi Jürgens.