Plattdeutsche Nachrichten Plattdüütsche Narichten vun'n 05. Februar 2025

Trump will Kuntroll över Gaza

Washington: US-Präsident Donald Trump hett den Vörslag maakt, dat de USA de Kuntroll över den Gazastriepen övernehmen schall, de Arabschen Staaten sünd dorgegen. As eerst Land hett Saudi Arabien reageert, in dat Schrieven heet dat, man wiest all Versöök torüch, de Palästinenser vun ehren Land to verdrieven. Trump hett sik achterna en Drepen mit den israelschen Ministerpräsidenten Benjamin Netanjahu dorvör utspraken, de Bewahners vun den Gazastriepen op Duer ümtosiedeln.

Ölven Dode dör Schööt in Sweden

Stockholm: Achterna Schööt an en School in Sweden fullen sünd, is de Tahl vun Doden op ölven anstiegen. Ünner den Doden is ok de Minsch de dat doon hett. De Tahl vun Versehrten is noch nich kloor. Passeert is dat in de Stadt Örebro, um un bi 200 Kilometers westlich vun Stockholm. Na de Polizei weer dat kien Terroranslag.  

Veel leddigstahn Ladens in Bremen

Bremen: De Leddigstand in de Binnenstadt is düütlich anstiegen. As de Werser-Kurier künnig maakt, hett sik de Leddigstandquoot siet 2022 meist verdubbelt. Dormit staht na de Wertschopsstütt in de Bremer City negen Perzent vun de Ladens leddig. Bremen liggt dormit licht ünner den Dörsnitt in Düütschland.

Stadt maakt wat gegen Autodickdoers

Bremerhoben: In den Fischereehaven wüllt de Behöörden verstärkt gegen Autodickdoers un Raaser vörgahn. Dorto schüllt op en poor Straaten ok Swellen anbrocht warrn, dormit de Autofohrers afbremsen un langsaamer fohren mööt. So warrt denn ok vör wiedere illegale Rönnen en P vörsett.

Op plattdüütsch dör dat Huus vun de Börgeschop

Bremen: De Bremsche Börgerschop maakt dat Anbott för Besökers grötter. Tosamen mit dat Lännerzentrum för Nedderdüütsch is dat vun nu an mööglich, dat Parlamentshuus bi en Rundgang op Plattdüütsch kennen to lehren. Dorbi lehrt Intreseerte wat över de Oorsprungsgeschicht un Bokunst vun den Bo de ünner Denkmaalschuul steiht, aver ok över de Arbeit vun dat Parlament – un dat allens op Platt.

Dat Weer

Un nu kiekt wi op dat Weer: In Möppen hebbt wi dree Graad, Bremen un Bremerhoben veer Graad un in Emm hebbt wi opstunns söss Graad. Hüüt fangt de Dag mit dicken Wulken an, letzte Regenschuer trecken över de Aller af. An de Nordsee warrn de Wulken weniger un dat blifft meist dröög. Övern Dag schafft de Sünn dat jümmer mal wedder un wesselt sik mit den Wulken af, dorbi blifft dat dröög. Dat Thermometer wiest us söss bet acht Graad. In de Nacht köönt wi eerst noch twuschen den lütten Wulken de Steerns blinkern sehn, laater warrn de Wulken mehr, de aver meist kien Schuers bringen. An Morgen verkrupen sik de Wulken an´ne Küst wedder un dat bi veer Graad op de Eilannen un twee bet null Graad in´t Binnenland. Morgen trecken de Wulken gau över de Aller in Richten süüdoosten af un en fründlich un dröögen Dag mit Sünn un en poor Wulken töövt op us. An de Küst lacht de Sünn sogor mal för länger Tiet. Un dat bi söss bet acht Graad.

Dat weren de Plattdüütschen Narichten. Tohoopstellt vun Sven Kuhnen. Op platt torechtmaakt un vörleest vun Martina Brünjes.