Plattdeutsche Nachrichten Plattdüütsche Narichten vun'n 2. Oktober 2023

Doktors mit egen Praxien verlangen mehr Geld

Bremen. In ganz Düütschland blievt vele Doktorpraxen vundag dicht. Dat is, wegen en Protest gegen de Gesundheitspolitik. De Doktors verlangen mehr Geld vun de Krankenkassen, üm de Inflatschoon un de högeren Energiekosten optofangen. Anners mööt wohrschienlich vele Praxen bold för jümmer dicht maken. In Bremen un Bremerhaben hebbt ünner annern de Ogendoktors, Huutdoktors, HNO-Doktors un Kinnerdoktors dat Positschoons-Poppier to´n Aktschoonsdag ünnerschreven.

Törkei reagert mit Luftangrepen op womööglich PKK-Anlag

Ankara. Na den Bombenanslag vör dat törkisch Binnenministerium hett dat Militär Luftangrepen in´n Noordirak flogen. De Regerung vermellt, dat dorbi so üm un bi 20 Tele vun de kurdisch Ünnergrundorganisatschoon PKK kaputt makt wurren. Güstern fröh harr sick en Angrieper vör dat Binnenministerium in de Luft jagt. Noch en Angrieper wurr vun de Polizei dootschoten. Twee Polizisten hebbt dör en Exploschoon en beten wat afkregen. De Striet twüschen de Törkei un de PKK duert siet Johrtheinten an.

NATO schickt noch mehr Suldaten in den Kosovo

Brüssel. En NATO-Spreker hett ankünnigt, dat rund 200 britisch Suldaten extra in den Kosovo ehrn Deenst doon schüllt. Ok Politikers vun de Ampel-Koalitschoon hebbt sick dorför utspraken, mehr Bunnswehrsuldaten in de Krisengegend to schicken. In Ogenblick doon 85 düütsche Suldaten in´n Kosovo ehrn Deenst. Vör een Week harrn Serben mit velen Waffen in´n Noordkosovo Schandarms angrepen.

Fachlüüd ünnersöken Schaden an Hansekogge

Bremerhaben. Siet den Vörmiddag ünnersöken Fachlüüd in den Fischereehaven de Schadens an de havarerte Hansekogge „Ubena vun Bremen“. Vör Oort sünd neven den tostännigen Versekerer un den Vereen „Hanse-Koggewarft“ ok Vertreder vun twee Warften ut Oostfreesland un Däänmark. Beide sünd op den Bo vun Holzbööd spezjaliseert. De Ünnersöken schall kloor maken, of en Reparatur vun de Kogge möglich is. De „Ubena vun Bremen“ weer in´n August op de Butenweser op Grund lopen. Woso, weet se bether noch nich.

150 Strohballen brennen in Bremen-Borgfeld

Bremen. In Borgfeld brennen siet den fröhen Morgen rund 150 Strohballen op en freen Feld. De Füerwehr hett Lüüd, de dor wahnt, Bescheed seggt, Dören un Finster dicht to hollen un möögliche Lüftungsanlagen uttoschalten. De Polizei warrt Ünnersöken opnehmen, woso dat anfungen hett to brennen. In de verleden Dag hebbt en poor Maal Heuballen Füer fungen. Ünner annern in Leendaal or Worpsweed.

Dat Weer

Un nu noch en Blick op dat Weer: in Dörbern, in Bremen-Mitt un in Bremerhaben 17 un in Emden sünd dat opstunns 16 Graad. Hüüt gifft dat en drögen Wessel ut en beten Sünnschien un to´n Deel mit dichten Wulken. An de Küst is Regen möglich. De Wind weiht en beten. Un de Temperaturen kladdern op 19 bit 23 Graad. In de Nacht treckt de Heven an de Nordsee mit Wulken to. Hier un dor kann dat ok Regen geven. In´t Binnenland blifft dat dröög. Dat Thermometer wiest 13 bit 17 Graad. Morn is de Heven vull vun Wulken. An´n Middag un Namiddag kann dat af un an orntlich pladdern. Hier un dor is Blitz un Donnerslag dorbi. 18 bit 22 Graad stahn denn op dat Thermometer.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.