Plattdeutsche Nachrichten Plattdüütsche Narichten vun'n 10. Januar 2025

Bremen will mehr dörchgriepen gegen Footpaddparker

Bremen: Dat Mobilitätsressort hett en Konzept gegen dat Footpaddparken vörleggt. Verleden Johr hett Bremen dorto de Oplaag vun dat Bunnsverfatensgericht kregen. Dat geiht üm de Stadtdeele ööstliche Vörstadt, Mitt, Finndörp, Neestadt, Swachhusen un Walle. In en eersten Stapp warrt dorför soorgt, dat Nootfohrtüüch beter dör kaamt. Oplaatst Mitt vun düt Johr geiht dat üm barrierefree´e Weeg. To glieke Tied will de Behöörd dat Parken vun Anwahners düütlich grötter maken.

De Eer warrt jümmers warmer

Reading: Verleden Johren hett de Dörsnittstemperatur op de ganzen Welt en neen höösten Stand kregen, siet dat Meten anfung. Na Angaav vun den Klimaawanneldeenst Copernicus vun de EU leeg se üm 1,6 Graad över den groffrekent Middel vun de vörindustriellen Tiet. Dormit höört jedeen vun de verleden teihn Johren to de teihn Warmst siet de Temperaturen optekend wurrn.

Ehrengast bi de Schaffermahltiet in Bremen

Bremen: Ehrengast bi de dütjohrige Schaffermahltiet is de nordreihn-westfälsche Ministerpräsident Hendrik Wüst. Dat hett dat Huus Seefohrt künnig maakt, wat düsse Fier jedeen Johr in de baverste Rathuushall utricht. De CDU-Politiker hett al toseggt, ehrder faststunn, dat een Week laater de Bunnsdagswahl stattfinnt, verkloort Schaffer Julius Runge. Bi dat Schaffermahl warrt Spennen för behovig Seelüüd un ehren Familien ünner de Gäst sammelt.

Perzess üm den doods Treppenstort in den Bahnhoff Uelzen fangt an

Lüneborg. Vör dat Lannsgericht hett de Perzess gegen en dullt Asylbewarber ut Marokko anfungen. Em warrt vörsmieten, dat he verleden Sommer en Familienvadder in den Bahnhoff Uelzen de Trepp daalstört hett. De 55-johrige ist dorbi sturven. De Marrokaner mutt vör de Jugendkaamer för düsse Daat graadstahn, de Staatsafkaatschop hollt den 19-johrigen för gefährlich.

Sixdays fangt in Bremen an

Bremen: In de Stadthall fangt hüüt Avend de Sixdays an. Bi dat traditschonelle Bahnradrönn sünd Olympiawinner, Welt- un Europameester dorbi. 12 Profi-Rad-Teams gaht vun Klock half negen an Avend in´t Rönnen. Apenmaakt warrt de Sixdays vun dree Froen, Bunnsbinnenministersch Nancy Faeser, Sängersche vun de Musikgrupp Cascada un en ehrenamtlich Füerwehrfro. As verleden Johr löppt de Veranstalten blots veer Daag un ennt mit dat groote Finaale an Maandagavend.

Dat Weer

Un nu kiekt wi op dat Weer: In Bremen un Möppen hebbt wi een Graad, in Bremerhoben un Emm sünd dat opstunns dree Graad. Hüüt wedder mehr Wulken as Sünn, wedder sünd Regen-, Grisselgrussel or Sneeschuer dorbi, hier un dor ok mit Wintergewidder. Dat Thermometer wiest us dree bet veer Graad in´t Binnenland un fief Graad op de Eilannen. In de Nacht treckt de Schuers över dat süüdliche Binnenland af un de Wulken warrt weniger bi null bet minus veer Graad in´t Binnenland un plus twee bet null Graad op de Eilannen. Sünnavend schient meist de Sünn, af un an schuuvt sik en poor Wulken dorvör. An de Küst kann dat af un an Schuers geven bi een bet twee Graad in´t Binnenland un veer bet fief Graad op de Eilannen. Sünndag eerst daakig, achteran lacht de Sünn un dat is dröög bi null bet fief Graad.

Dat weren de Plattdüütschen Narichten. Tohoopstellt vun Gabriele Intemann. Op platt torechtmaakt un vörleest vun Martina Brünjes.