Plattdeutsche Nachrichten Plattdüütsche Narichten vun'n 13. Januar 2025

Nu al 24 Dode in Los Angeles

Los Angeles: Bi dat Füer in Los Angeles sünd bet nu tominnst 24 Minschen to Dode kamen. So hebbt de Behörden dat seggt. Na anner Minschen söökt se noch. Mehr as 100.000 Lüüd hebbt ut jemehr Hüüs rut musst un köönt ok eerstmal nich wedder trüch. De US-Wetterdeenst hett för vundaag un morgen wedder mehr Wind anseggt. Se sünd bang, dat Füer kunn op noch anner Quarteren in de Stadt tolopen.

Pistorius sitt in Warschau mit Amtskollegen tohoop

Warschau: Verteidigungsminister Boris Pistorius sett sik vundaag in Warschau mit siene Amtskollegen ut Polen, Frankriek, Italien un Grootbritannien tohoop. Se wüllt den Kurs besnacken. Düt Drepen mit fief Partien hebbt se inricht, as Donald Trump in de USA de Wahl wunnen harr. Se kiekt dor op, wat Europa seker is un sik verteidigen kann. Bi Trump sünd se nich seker, wat he seggt: Ja, ik stah to de Nato.

Milanovic blifft Präsident in Kroatien

Zagreb: In Kroatien blifft Präsident Zoran Milanovic in’t Amt. Bi en Wahl Een gegen Een hett de Kandidaat vun de Sozialdemokraten gegen sien konservativen Gegenpart de Nääs vörn hatt. Annerletzt harr dat jümmers wedder heten: Milanovic steiht dicht bi Russland. Vun 2011 bet 2016 weer he de Ministerpräsident vun Kroatien.

Bremer Börgerslüüd köönt in’t Internet en Adrag för Unnerlagen för de Breefwahl stellen

Bremen: De Minschen in Bremen köönt vun nu op an över’t Internet en Andrag stellen för Breefwahl-Unnerlagen för de Bunnsdagswahl an’n 23. Februar. Man dat warrt noch en poor Weken duern, betdat de Paperen mit de Stimmzedels rutschickt warrt. Morgen gifft dat Wahlamt eerstmal de Wahlhenwiesen an 370.000 Minschen in’t Land Bremen in de Post.

In Deefholt snackt se över dat ne’e Swömmbad

Deefholt: De Stadt Deefholt will de Börgerslüüd dor mit en Reeg Akschonen verkloren, wat dat dormit op sik hett, dat se dat Swömmbad nee boen wüllt. De Stadt seggt: Wenn se dat Free- un Hallenbad wedder trechtmaakt, denn kost dat en Barg mehr, as wenn se nee boot. Bekriddelt warrt, dat dat ne’e Swömmbad buten weniger Bahnen kriegen schall.

Dat Weer

Un woans süht dat mit dat Weer umto ut? Opstunns hebbt wi in Weyerbarg 6 Graad unner 0, in Bremen sünd dat minus 5, in Bremerhaven minus 2 un in Friesaithe minus 1 Graad. Vundaag: Wenn sik de Daak oplööst hett: Sunnschien mit en poor Wulken. In enige Gegenden kann de Daak aver ok stahnblieven, un dor is dat ok noch an’n Namiddag diesig-gries. Dat blifft dröög, un dat Thermometer krabbelt op 1 Graad unner bet 4 Graad över Null. De Wind dorto weiht flau oder en beten mehr, op de Inseln över Dag meist frisch, vun de süden bet süüdwesten Kant. Tokamen Nacht: Vun de Noordsee her ballt sik de Wulken tohoop, dat blifft aver dröög. Süüdlich vun Bremen blenkert de Steerns noch wat länger. Bi 2 Graad över bet 5 Graad unner Null. Morgen: Vele Wulken, meist gor keen Sunnschien. An de See un ööstlich vun de Werser kann dat af un an en beten pladdern oder spüttern. Eerst mööt wi twüschen Werser un Elv ok noch mit Iesregen reken. Över Dag denn aver doch warmer mit 3 bet 6 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.