Plattdeutsche Nachrichten Plattdüütsche Narichten vun'n 14. Januar 2025

Bunnsverfatensgericht mit Ordeel to Polizeikosten

Karlsruh: Jüst warrt vermellt: De Bunnslänner dröfft bi Hoochrisiko-Footballspelen an den Profifootball en Reken utstellen för dat Geld bavento för de Polizei. Dat hett dat Bunnsverfatensgericht vör en poor Minuten fastleggt. Na teihn Johr hett Bremen in den Striet mit de Düütsche Football-Liga Recht kregen.

Biden: Los Angeles bruukt Milliarden

Los Angeles: Na dat Füer in Los Angeles bruukt se dor woll enige Dutz Milliarden Dollar, wenn se de Quarteren wedder opboen wüllt. Dat meen US-Präsident Biden, de sik mit Lüüd vun den Katastrophenschutz tohoopsett harr. In de Grootstadt stüert sowat 15.000 Füerwehr- un Hölpslüüd dor gegenan, dat twee gewaltige Füer in den Westen un Noorden nich noch grötter warrt. Se sünd bang, de deegte Wind kunn de Füer wedder in Gang bringen. Bet nu sünd bi dat Füer tominnst 24 Minschen to Dode kamen.

Scholz bi Top-Drepen to Oostsee-Sekerheit

Helsinki: Wo in de Oostsee en Reeg Kabels mit Willen tweimaakt worrn sünd, snackt Bunnskanzler Olaf Scholz tohoop mit anner Top-Lüüd vun Staaten un Regerungen över de Sekerheit in de Oostsee. Bi dat Top-Drepen in de Hauptstadt vun Finnland söökt se to allereerst na Mööglichkeiten, dat beter aftosekern, wat an Anlagen in de Oostsee liggt. Ok snackt se över Russlands Schaddenflott un de Gefohren, de vun dor kaamt. Schaddenflott, dat sünd Scheep, mit de Russland um de Strafen för den Hannel mit Ööl rumkummt.

Linken-Frakschoon in Bremerhaven fallt ut‘neen

Bremerhaven: De Linke sitt nich mehr as Frakschoon in’t Stadtparlament vun Bremerhaven. Twee Afgeordnete sünd ut de Partei rutgahn. De Vörsteher vun de Stadtverordneten Torsten von Haaren hett to buten un binnen seggt: Ja, dat is so. De beiden Afgeordneten grünnt mit noch en enkelte Afgeordnete de Frakschoon „De Möwen“. Se wüllt sik um mehr Umweltschutz kümmern. För de Linke sitt nu blots noch Muhlis Kocaaga in’t Stadtparlament Bremerhaven.

Kreis Ollenborg: Vagelsüük in Bedriev för Putenmast

Hu‘e: In en Bedriev för Putenmast in den Kreis Ollenborg hebbt se de Vagelsüük faststellt. De Landkreis seggt: Dat Friedrich-Löffler-Institut, dat för Deertensüük tostännig is, hett den Fall in Hu’e al ankeken. Sowat 11.000 Puten hebbt se ut Vörsicht doot maakt. De Landkreis treckt nu en Sekerheitskrink vun 3 Kilometer um den Bedriev rum, un en Oppasskrink vun 10 Kilometer.

Dat Weer

Un woans süht dat mit dat Weer umto ut? Opstunns hebbt wi in Deefholt 1 Graad unner 0, in Bremen is dat 0, in Bremerhaven 1 un in Cuxhaven 2 Graad över 0. Vundaag: Vele Wulken, meist gor keen Sunnschien, un över Dag treckt vun de See ok Regen oder Spütterregen rin. Wo noch Frost in de Eer sitt, kann dat glatt warrn. An’n Dag aver doch wedder wat warmer mit 2 bet 6 Graad. De Wind dorto weiht flau oder en beten mehr, op de Inseln frisch un mit deegte Böen, vun de süüdwesten bet westen Kant. Tokamen Nacht: Dichte Wulken, un de smiet süüdlich vun Bremen ok noch Spütterregen daal. An de Küst blenkert ok mal de Steerns. Bi 5 bet 2 Graad, na Middernacht warrt dat wat warmer. Morgen: Vele Wulken un gries. Blots an de See waagt sik af un an mal de Sunn rut. In’t Binnenland dröög, hier un dor kann dat en beten pladdern. Wedder warmer mit 5 bet 7 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.