Plattdeutsche Nachrichten Plattdüütsche Narichten vun'n 9. Januar 2025

Bränn in Los Angeles breden sik ut

Los Angeles: De ossig Wooldbränn in Los Angeles sünd wiederhen nich ünner Kontroll. Jümmer mehr Bewahners mööt sik in Sekerheit bringen. De Behöörden hebbt künnig maakt, dat betnu fief Minschen doot blieven sünd. Deegte Windböen lett de Flammen jümmer mehr warrn. De Füerwehr hett middelwiel Maleschen mit de Waterversorgens. Bides is ok Hollywood bedrapen.

CDU will Stüern dalsacken

Berlin: De CDU hett bi ehren Wohlkamp minner Stüern in Utsicht stellt. Ünner annern schall in Tokunft de Spitzenstüersatz eerst vun en Johresinkamen vun achtig-dusend Euro af an griepen. De Solidoritätstoslag för högere Inkamen schall kumplett wegfalllen. Dat CDU-Programm hett den Namen Agenda 2030. Dormit schall de Weertschop ankurvelt warrn.

Ukraine-Drepen in Ramsteen

Ramsteen: Op den US-Luftwapenstüttpunkt Ramsteen dreept sik an Vörmiddag Vertreder vun de Ukraine-Kuntaktkoppel. Blangen ranghogen Militärs warrt ok Wehrminister Boris Pistorius, Nato-Generalsekretär Marc Rutte un de ukrainsche Präsident Wolodymyr Selenskyj dorbi ween. Bi dat Drepen schall dat üm wiedere Stütt vun de Ukraine in den Afwehrkamp gegen Russland gahn. Selenskyj hett, ehrder dat Drepen, al Snacken över wiedere Wapenleverns künnig maakt.

Dode bi böösen Unfall in Friesaythe

Cloppenborg: Achterna en bösen Unfall mit fief Doden in de Nöögde vun Friesaythe in den Landkreis Cloppenborg warrt nu rutfinnt, wo dat dorto kamen is. Na de Polizei is de Staatsafkaatschop in Ollenborg tostännig un al involveert. Güstern weer en Lastwagen un en Lütttransporter liekto tosamenprallt. Beid Fohrtüüg sünd in Flammen opgahn. Nüms is dor levend rutkamen. Ogenschienlich hett de Fohrer vun den Lütttransporter den tomöötkamen Laster bi dat överhalen nich sehn.

Blaualgen in den Unisee is Thema in de Börgerschop

Bremen: De Bremsche Börgerschop will hüüt Namiddag doröver snacken, wat man gegen de Blaualgen in den Unisee maken kann. De kaamt siet Johren jümmer wedder in Sommer un Harvst op un föhrt dorto, dat Minschen un Deerten dor nich mehr baden dröfft. Na en Gootachten sünd in den suerstoffarmen Unisee to veel Phosphaten un Sulfaten.

Dat Weer

Un nu kiekt wi op dat Weer: In Bremen un Möppen hebbt wi minus een Graad, in Bremerhoben un Emm plus een Graad. Hüüt sünd meist dicke Wulken an Heven mit Sneeregen or natten Snee in´t süüdliche Binnenland. . To´n Deel kann dat glatt warrn. Vun de Nordsee her trecken ok en poor Schuers op, to´n Deel mit Grisselgrussel or Sneeflocken. Dat Thermometer wiest us een bet twee Graad in´t Binnenland un fief Graad op de Eilannen. In de Nacht wedder Wulken mit Schuer, meist in´t Binnenland veel as Snee. Denn is ok wedder hier un dor mit Glatties to reken. An de Nordsee sünd kort mal Grisselgrusselgewidder mööglich. Un dat denn bi dree bet veer Graad in´t Binnenland un fief Graad op de Eilannen. Morgen mehr Wulken as Sünn, vun de Nordsee her kamen en poor Schuers op, ok mit Grisselgrussel un natten Snee mit Glatties in´t Binnenland mööt wi reken. Man ok Wintergewidder sünd mööglich. An Avend warrt dat natts Weer un de Wulken vun de Nordsee her weniger. Dat Thermometer wiest us wiederhen dree bet veer Graad in´t Binnenland un fief Graad op de Eilannen.

Dat weren de Plattdüütschen Narichten. Tohoopstellt vun Katrin Martens. Op platt torechtmaakt un vörleest vun Martina Brünjes.