Plattdeutsche Nachrichten Plattdüütsche Narichten vun'n 03. Juli 2024

To düre Wahnungen na Utkunft vun Gliekwertigkeitsbericht

Berlin: Düre Hüern un to wenig Wahnungen sünd för veele Minschen in Düütschland en Problem. Mehr as acht vun teihn Lüüd, de fraagt worrn sünd, find dat besünners in Grootstäder swor, Wahnruum to finnen, de’n ok betahlen kann. Dat vermellt de Daagsspegel un weet dat vun den so nöömten Gliekwertigkeitsbericht vun de Bunnsregeern. Düsse Bericht ward hüüt afnickt un denn präsenteert.

Diskusschoon över Finanzeern vun Pleeg

Berlin: Wo kann dat Versorgen vun Lüüd, de pleegt warrn mööt, betahlbar blieven? Um düsse Fraag geiht dat hüüt in’t Bunnskabinett. Dorto gifft dat en Vörslag vun de Caritas. Dorin heet dat, datt ole Lüüd, de veel Geld hebbt, mehr in de Pleegkass inbetahlen schüllt. De Düütsche Gewarkschaftsbund will en Pleeg-Börgerversekerung, in de mehr Minschen inbetahlt un de all Pleegkosten draggt.

Biden gifft Grund för legen Optritt an

Washington: US-Präsident Biden hett as Grund för sien swack Optreden bi de TV-Debatt mit sien Wedderpart Trump angeven, datt he na sien Utlandsbesöken mööd weer. Bi en Wahlkampfveranstalten in’n Bunnsstaat Virginia säe de 81-johrig Demokraat, datt dat nich kloog weer, kort vör dat Duell mehrmals üm de Welt to reisen. Tovör is en Verköhlen as Grund angeven worrn. To’n eersten Mal hett en Kongress-Afordneter vun de Demokraten öffentlich vun Biden verlangt, datt he sien Kandidatur trüchtreckt.

Kulturfestival „Breminale“ fangt an

Bremen: An’n Oosterdiek fangt hüüt Avend dat Kulturfestival „Breminale“ an. Dat is in dütt Johr lütter as in de verleden Johren, denn de Ümsünst-Veranstalten mutt mit weniger Toschüss klaarkamen. Nee in dütt Johr: Een Bühn weniger, dorför en Riesenrad un Videoöverwachen dör de Polizei.

Söken na Röver in Cuxhaben per Fernsehsendung

Hagen: En Överfall op en Ehepoor blifft en Radel för de Polizei. Dorüm is he an’n Avend Thema in de ZDF-Sendung „Aktenzeichen XY ungelöst“. De olen Lüüd sünd vör annerthalf Johren to Huus in Uthlede in’n Kreis Cuxhaben utroovt worrn. Twee Videokameras hebbt den Röver mit Mask un Metz filmt. De Polizei haapt, datt se dör de Sendung nee’e Henwiesen kriggt.

Dat Weer

Un nu en Blick op dat Weer: In Cuxhaben 13, in Bremen un Leer 14, un in Bremerhaben sünd dat opstünns 15 Graad. Hüüt sünd veele Wulken ünnerwegens, de eerst blots enkelte Schuers twüschen Oostfreesland un de Elv bringt. Af un an kiekt ok de Sünn mal dör. Vun Middag an breedt sik vun’t Emsland her dichte Wulken ut, de fakener Regen bringt. An’n Avend ward de Schuers wedder weniger un de Wulken lockert’n beten op bi 15 bet 18 Graad. In de Nacht ward de Wulken wedder dichter un de letzten Schuers treckt över Oste un Elv af. Vun Middernacht an breedt sik vun de Nedderlannen un de Noordsee her nee’er Regen ut. To’n Morgen hen kann dat an de See ok Gewidder geven. De Luft köhlt sik af op 13 bet 11 Graad. Morgen fröh gifft dat noch dichte Wulken mit Regen, de ok mal degter un hier un dor mit Gewidder ween kann. De Wulken treckt bet to’n Middag över de Elv af. Denn gifft dat en Wessel ut Sünn un opstiegen Wulken mit enkelte Schuers bi 16 bet 18 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.