Plattdeutsche Nachrichten Plattdüütsche Narichten vun'n 2. Juli 2024

Bunnesregeern reist to’n Snacken na Polen

Warschau – Bunneskanzler Scholz un tein Ministerinnen un Minister sünd to’n Snacken in Polen. Dat sünd de ersten dütsch-polnischen Regeern-Besööke siet söß Johren. De Bunnesregeern hoopt op een dullen Anstoot för gode Naverschupp. Darför wüllt se tohoop een Plaan mit een paar Vörhebben besluten.

Biden bekrittelt, wat dat Böverste Gericht besluten hett

Washington – US-Präsident Biden hett dat Urdeel vun‘t Böverste Gericht vun de USA to de Schuul, de Politiker för Nastellen bi Straafsaken hebbt, bekrittelt. He sä, dat weer een gefährlich Grenzfall. För sien Vörgänger Trump is dat goot vör dat Böverste US-Gericht lopen. De Supreme Court harr entscheden, dat ehemalig Präsidenten bi dat, wat se in’t Amt doot, vör’t Nastellen schützt sünd.

Kinner vun psychisch kranken Öllern schüllt mehr Hölp kregen

Berlin – Kinner psychisch kranker or suchtkranker Öllern schüllt mehr Hölp kregen. De Fraktschonen vun SPD, Grönen un FDP as ok de Union hebbt darto een gemeensam Andrag opstellt. Dat vermellt dat Redaktschonsnettwark Dütschland. Dat heet, dat Vörhebben schall noch düsse Week in’n Bunnesdag besluten weern. Plaant sünd mehr Anbotts för Therapie in Scholen un Kinnergaarn un dat mehr vörher all wat dargegen doon ward.

Mercedes-Arbeider protesteert gegen Verköpen vun Autohüüs

Bremen – Mercedes-Arbeiders wüllt bi een bunneswieten Aktschonsdag ehrn Arger över dat plaante Verköpen vun de Autohüüs vun‘t Ünnernehmen wiesen. An söß Steden – darunner Bremen – sünd Proteste un Aktschonen plaant. An’t Wark in Bremen-Sebaldsbrück is een Demonstratschon ankünnigt. De Kunzern harr in’n März vermellt, dat se de Autohüüs verköpen wüllt. Bunneswiet arbeidt in de Autohüüs üm un bi 8000 Minschen.

Hunnerte Verurdeelte in Neddersassen hebbt een Vordeel

Ossenbrügg – In Neddersassen hebbt mehrere hunnert Verurdeelte een Vördeel darvun, dat Cannabis nu vör’t Gesett anners afsekert is. Ünner jem sünd ok Lüüd achter de Trallen. Dat hett dat Justizministerium to de „Nee’e Ossenbrügger Zeitung“ seggt. Na de nee’e Rechtslaag is bestimmtet Nutzen vun Cannabis nich mehr straafbar. Twee Lüüd sünd darüm ut’n Gefängnis free kamen.

Dat Weer

Un nu een Blick op dat Weer: in Deefholt 14, in Bremen, Bremerhaben un op Wangerooge sünd dat opstunns 16 Graad. Hüüt Vörmiddag hollt sik meist dicke Wulken, de to’n Deel een beten Regen bringt. An’n Namiddag gifft dat vele Schuers, bit to’n Abend lockert de Wulken aver ok mal op. Vun de Nordsee her ward dat denn dröger un de Sünn kiekt mal rut, bi köhlen 16 bit 18 Graad. Tokamen Nacht sünd mal mehr, mal weniger Wulken an’n Heben un dat schuert meist blots an de Küst. De Nacht ward noch een beten frischer as toletzt: dat Thermometer sackt op 13 bit 9 Graad. Morrn fangt de Dag erst fründlich mit een beten Sünnschien an, man vun’n Middag an treckt dicke Wulken op, de vun West na Oost Regenschuers bringt. An’n Abend hollt sik wieter vele Wulken, dat schuert aver blost noch verenkelt, bi köhlen 15 bit 17 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.