Plattdeutsche Nachrichten Plattdüütsche Narichten vun'n 11. Juli 2024

Ukraine kriegt noch mehr Milliarden

Washington. De NATO hett bi ehr Top-Drapen 40 Milliarden Euro an Militärhölp för de Ukraine fastleggt. Se schüllt in dat tokamen Jahr lopen. Dat steiht in dat Protokoll vun dat Drapen. Anrekent weern all Middel, de siet Anfang vun dat Johr lopen sünd. Düütschland mutt nich noch mehr Geld betahlen, wiel Düütschland al acht Milliarden Euro för düsset Johr toseggt harr.

Warnstreik mit Folgen för Havenbedrief

Bremerhaben. De Warnstreik vun de Havenmitarbeiters harr düütliche Folgen för den Betrief. Dat vermellt de Bremer Logistikkonzern BLG. De Streik harr wedder Kunnen drapen, de för de BLG bannig wichtig weern. Dat see en Konzernsprekerschee op Anfraag vun buten un binnen. In de Seehavens wurr in de verleden beiden Dag streikt. Alleen in Bremerhaben leggden 2.000 Mitarbeiters de Arbeit daal. Dat vermellt de Gewarkschop Verdi.

Bremen kann dank Zensus mit mehr Geld reken

Bremen. Dat Land Bremen kann in Tokunft mit düütlich mehr Geld ut den Utgliek vun de Lännerfinanzen planen. As dat Ifo-Institut utreken hett, kriegt Bremen 242 Euro mehr pro Inwahner. Bi den Zensus 2022 is rutkamen, dat in Bremen un Bremerhaben mehr Minschen leven, as se dacht harrn. De Inwahnertallen sünd en Grötte üm den Utgliek vun de Lännerfinanzen uttoreken.

Selten Buckelwalfisch vör Baltrum sicht

Noordsee. En selten Buckelwalfisch is vör dat Eiland Baltrum sicht wurrn. De Mannschop vun en Schipp harr den jungen Walfisch al Enn Juni sehn un aflicht. Buckelwalfisch sünd ehr selten Gäst in de Düütschen Bucht un wannern meist twüschen poloren un troopsch Water hen un her. In dat Wattenmeer weern na Angaven vun de Schutzstatschoon Wattenmeer siet 2003 binah Johr för Johr enkelte Derten an de Küst vun de Nedderlannen sicht.

England drapt in dat EM-Endspeel op Spanien

Dortmund. England steiht in dat Endspeel vun de Football-Europameisterschop. Güstern Avend harr de Mannschop de Nedderlannen mit twee to een vun´n Platz schickt. Dat wichtigste Door full eerst in de neenzigst Minuut. An´n Sünndag drapt England in dat Olympiastadion vun Berlin op Spanien.

Dat Weer

Un nu noch en Blick op dat Weer: In Meppen 17, in Bremen-Mitt un in Bremerhaben 19 un in Bassen sünd dat opstunns 20 Graad. Vundag fangt dat mehrstendeels mit Sünnschien an. Wulken sünd mal mehr un mal weniger dorbi. In´n Dagsverlop weern de Wulken dichter. An de Küst kann dat Regen geven. An´n Namiddag schient mennigmal ok de Sünn dör de dichten Wulken. De Wind weiht en beten bit in Maten. Dat Thermometer wiest 20 bit 25 Graad. In de Nacht sünd blots en poor Wulken an´n Heven un man kann de Sterns funkeln sehn. Elven bit 15 Graad wiest dat Thermomter. Morn trecken eerstmal dichte Wulken op, de af un an degte Regenschuer bringen. In´n Verloop vun´n Namiddag un to´n Avend hört dat op to pladdern un de Wulken lockern op. 18 bit 22 Graad wiest dat Thermometer.

Dat weern de Narichten op platt. Tohoopstellt hett se Justus Wilke. Op Platt trechtmaakt un vörleest vun Markus Weise.