Plattdeutsche Nachrichten Plattdüütsche Narichten vun'n 29. August 2024

Paralympische Spelen loopt

Paris: Mit en Spektakel över enige Stunnen sünd güstern Avend de paralympischen Spelen losgahn. Hunnerte Sportlerinnen un Sportlers, bi de nich allens gesund is, sünd över de Champs-Elysee hen na den Place de la Concord trocken. Kort vör Middernacht hebbt mehrere Sportlers tohoop dat paralympische Füer anmaakt. Tosamen sünd sowat 4400 Sportlerinnen un Sportlers bi de Olympischen Spelen för Minschen mit Schaden mit bi. För Düütschland maakt 143 Athleten mit.

Hen un Her: Wat schüllt Flüchtlinge kriegen

Berlin: In de Bunnsregerung snackt se wieder över dat, wat na den Anslag vun Solingen nakummt. De Bild-Zeitung hett to weten kregen: Migranten, de ut en EU-Land na Düütschland kamen sünd, schüllt veel weniger an Hölp kriegen as nu. Geld oder en Geldkoort schüllt se gor nich kriegen, man blots noch dat Nödigste, as en Dack över’n Kopp, Eten un Drinken un dat se sik rein hollen köönt.

Neddersassen: Mehr doon för dat Leven op’t Land

Ollenborg: Op dat Leven op’t Land schall genauer henkeken warrn. Dat will de Neddersassische Städte- un Gemeendbund. Dorför schall orntlich wat doon warrn. Dat geiht um Praxen för Dokters, Bus un Bahn un mehr Internet. Wat nipp un nau ansteiht, dat will de Städte- un Gemeendbund vundaag in Ollenborg besnacken. In den Verband versammelt sik mehr as 360 Städte un Gemeenden, de to keen Kreis tohöört.

Tokunft vun Bremer Paster in de Kark noch nich kloor

Bremen: In de Breemsche Evangeelsche Kark snackt se wieder doröver, woans se mit Paster Olaf Latzel tohooparbeiden köönt. En Spreker vun de Kark sä: Wo dat Gericht sien Ordeel afgeven hett, warrt sik de Böversten vun de Kark nu dat Woso un Worum ankieken. Achteran wüllt se doröver snacken, wat dat Ordeel nu för de Disziplinar-Saak gegen den Paster bedüdt. Dat Landgericht Bremen harr fastleggt: Wenn de Paster en Geldbedrag betahlt, warrt de Perzess wegen Volksophissen op Stopp sett. Seggt warrt: Vör en poor Johr harr Latzel in en Ehe-Seminar böse Wöör över homosexuelle Minschen seggt.

Meister Leverkusen is in’n Pokal wieder

Jena: De Football-Bunnsliga-Meister Bayer Leverkusen steiht in de twete Runn vun den DFB-Pokal. Bi de Regionalliga-Kru vun Carl Zeiss Jena hebbt se mit 1:0 de Bavenhand hatt.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Leer un Rotenborg överall 22 Graad. Vundaag: Eerst Sunnschien satt, blots af un an treckt mal lockere Wulken dör. An’n Namiddag un Avend ballt sik de Wulken hier un dor ok tohoop, un denn kann dat ok pladdern un gewiddern. Anners aver blifft dat dröög. Dat Thermometer krabbelt op 24 bet 32 Graad. De Wind dorto weiht flau oder en beten mehr, he dreiht vun Süüd över West na de noordwesten Kant. An’n Namiddag briest he wat op. Tokamen Nacht: Lockere Wulken un dröög. An de See kloort dat op, na’t Emsland to kann sik ok Daak utbillen. Vun’t Ollenborger Mönsterland bet hen na de Lümborger Heid sünd de Wulken dichter un regen kann dat ok. Bi 16 Graad op de Inseln, anners 15 bet 11 Graad. Morgen: Eerst hell un fründlich mit Sunnschien un en poor lockere Wulken. Över Dag kaamt aver süüdlich vun Bremen ok Schuer op, mag ween ok mit Blitz un Dunnerslag. Na de See to blifft dat dröög, un de Sunn lacht us. Dat Ganze bi 19 bet 23 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Ralph Stölting.