Plattdeutsche Nachrichten Plattdüütsche Narichten vun'n 28. August 2024

Bunnskabinett snackt över Hart-Blootümloop-Gesett

Berlin. De Bunnsregerung snackt över en Vörslag, wo de Hart-Blootümloop-Gesundheit beter maakt weern kann. Gesundheitsminister Karl Lauterbach will de Vörsoorg starker maken. Kinner, junge un grote Lüüd schüllt sick jümmers mal wedder dat Hart ünnersöken laten. So steiht dat in den Gesetzvörslag. In Düütschland sünd üm un bi een Drüttel vun all Doden op Hart-Blootümloop-Krankheiten torüchtoföhren.

Bunnsdrogenbeopdragte verlangt högere Öllersgrenz för Alkohol un TikTok

Berlin. De Drogenbeopdragte vun de Bunnsregerung Burkhard Blienert verlangt in Tokunft en högere Öllersgrenz för Alkohol. För junge Lüüd, de noch nich 18 Johr oolt sünd, schall dat wat to Drinken mit Alkohol ut sien Sicht nich geven. Dat see Blienert to de Rheinischen Post. Bavento verlangt he, de Videoplattform TikTok för Kinner ünner twölf Johr to verbeden.

SPD un Gröne in Neddersassen wüllt den Schutz vun Lüdd, de nich smöökt, grötter maken

Hannover. SPD un Gröne in Neddersassen wüllt den Schutz vun Lüüd, de nich smökt, op E-Zigaretten un Cannabis grötter maken. En Gesett dorför wüllt de Regerungsfraktschonen vundag in den Landdag inbringen. In Tokunft schüllt in Wirtshüüs un bi Krögers, in Scholen un Heimen neven dat Smöken ok de Konsum vun Tabak un Cannabis in E-Zigaretten un as de nöömt warrt Vapes verboden ween.

Wirtschaftsminister seggt wat to de Meyer Warft

Hannover. De Wirtschaftsminister vun Neddersassen Olaf Lies will an´n Vörmiddag in den Landtag verkloren, woso de Staat de finanziell anslagen Meyer Warft redden schall. Se snackt doröver, dat Bund un Land blots för en bestimmte Tiet Andelen an de Warft kriegen. Dormit wüllt se för en Hoochsetten vun dat Egenkapital üm rund 400 Millionen Euro sorgen. Bavento brukt de Warft Börgschaften för neje Kredite.

Füerwehr kriegt dat Füer in Koornhaven vun Bremen ut

Bremen. In Gröpeln hett en Füer in den Haven in de Nacht en grötteren Füerwehrinsatz utlöst. Dat Füer weer in en Hall utbroken in de en grode Mengde Koorn ümlagert warrt. Dorüm weer de Füerwehr mit en poor Fohrtüüch un mehr Hölpslüüd anrückt. Dat Füer kunn gau utmakt weern. Dor hett nüms wat afkregen.

Dat Weer

Un nu noch en Blick op dat Weer: In Demorst 19, in Bremen-Mitt, in Bremerhaben un in Emden sünd dat opstunns 18 Graad. Vundag schient meist överall de Sünn. Viellicht is dor mal en dünne Wulk dorbi. De Wind weiht eerstmal en beten vun de süüdoosten Kant. In´n Dagsverlop in Maten. Dat blifft dröög bi 25 bit 30 Graad. In de Nacht kann man de Sterns an´n Heven blinken sehn un dat blifft dröög. Dat Thermometer wiest 16 bit 20 Graad. Morn schient neven lockeren un dünnen Wulken de Sünn. To´n Avend weern de Wulken dichter un hier un dor sünd Regenschuer un Gewidder möglich. 24 bit 31 Graad stahn denn op dat Thermometer. Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Markus Weise.