Plattdeutsche Nachrichten Plattdüütsche Narichten vun'n 27. August 2024

Drepen vun Scholz un Merz

Berlin – Bunneskanzler Olaf Scholz un Unionsfraktschonsbaas Friedrich Merz ward hüüt woll över dat snacken, wat na den Anslag vun Solingen nakummt. Merz foddert Ännerungen in de Asylpolitik – ünner annern een Stopp bi dat Opnehmen vun Flüchtlingen ut Syrien un Afghanistan. Scharpere Wapengesette, as de Ampel-Koalitschon dat plaant, hett Merz „dumm Tüch“ naamt. Op een Wahlkampfveranstalten güstern Abend in Dresden hett Merz Scholz darto opropen, tosamentoarbeiden.

Mehr Polizei bi Volksfesten in’n Nordwesten

Bremen – Na den Anslag op dat Stadtfest in Solingen schüllt Volksfeste in’n Nordwesten beter schützt weern. Dat Bremer Binnenressort hett ankünnigt, dat bi’n Vegebüdler Markt vun Freedag an dütlich mehr Polizisten ünnerwegens sien ward. För den Freemarkt in’n Oktober ward buterdem een Överwachen per Video prööft. Ok op dat Ollenborger Stadtfest vun övermorrn an wüllt se mehr för de Sekerheit daan.

Heizungsgesett: nu Föddern för all

Berlin – Vundaag fangt de drütte un letzte Födderrunn vun dat Heizungsgesett an, över dat nich all een Meen sünd. Vun nu an köönt ok Verhürers vun Eenfamilienhüüs as ok Ünnernehmen un Kommunen staatlich Föddergeller beandragen, wenn se een ole Ööl- or Gasheizung uttuuscht. Tominnst 30 Perzent Födderung sünd vörsehn, egal of dat üm Wahn- or Kontorhüüs geiht un bit to 70 Perzent Toschuss kann dat geven.

Macron lehnt Linksregeern af

Paris – Frankrieks Präsident Macron will nich, dat de nee’e Regeern vun een Ministerpräsidenten ut dat linke Lager föhrt ward, wiel dat Land stabil blieven schall. Vundaag will de Präsident mit hoochrangig Politikern beraden, woans dat wietergeiht. Dat Linksbündnis harr de Parlamentswahl wunnen. Macron will so een Oort vun grode Koalitschon henkregen.

Weniger Töög twüschen Bremen un Bremerhaben

Bremen – De Nordwestbahn verknappt ehr Anbott twüschen Bremen un Bremerhaben för een korte Tiet dull. Darachter stickt Booarbeiden an de Streek, de vun hüüt Abend bit Donnerdagmorrn duern schall. Darüm fallt elkeen Dag üm un bi acht Töög vun de Nordwestbahn ut. An’n Morrn un Abend fahrt Busse to’n Ersatt.

Dat Weer

Un nu een Blick op dat Weer: op Wangerooge un in Deefholt 18, in Bremen un Bremerhaben sünd dat opstunns 20 Graad. Vundaag gifft dat den helen Dag veel Sünnschien, dar köönt aver ok een paar Wulken opstiegen. Dat blifft also dröög – bi 23 bit 27 Graad. Tokamen Nacht ward dat meist klaar, blots mal een paar dünne Wulken treckt dör. Dat Thermometer sackt op 18 bit 12 Graad. Morrn schient wedder faken de Sünn bi blots een paar Wulken. Dat is wieter dröög bi 26 bit 31 Graad. Donnerdag gifft dat blangen Sünnschien ok een paar Wulkenfellers un to’n Abend hen kann dat schuern or grummelschuern bi 25 bit 30 Graad. Dat weern de Narichten op Platt. Birgit Sagemann hett se tohoopstellt. Op platt trechtmaakt un vörleest hett se Heidi Jürgens.