Plattdeutsche Nachrichten Plattdüütsche Narichten vun'n 12. Juli 2024

Scholz un Pistorius sett sik för US-Raketen in Düütschland in

Washington: Bunnskanzler Scholz hett seggt: Ja, dat is goot, wenn US-Raketen, de wiet flegen köönt, in Düütschland opstellt warrt. He sä, dat is wohrhaftig goot so. Russland harr böös oprüst, mit Wapen, de en Gefohr för ganz Europa sünd. Ok Verteidigungsminister Pistorius meen, dat harr nix mit Wettrüsten to doon, man de Düütschen müssen jemehr Knööv wiesen.

Russland harr woll Anslag op den Baas vun Rheinmetall plaant

Washington: Op den Baas vun dat düütsche Rüstungsunnernehmen Rheinmetall, Armin Papperger, harr Russland woll en Anslag plaant. De US-Feernsehsender CNN hett vermellt: Amerikaansche Geheemdeensten hebbt de Saak an’n Anfang vun’t Johr opdeckt. De harrn denn de düütschen Sekerheitsbehörden Bescheed seggt, un de harrn den Anslag afwehren kunnt. Papperger harr sik mal um mal insett för mehr Wapen un Munitschoon an de Ukraine.

Bremer Finanzsenater: Noch mehr sporen

Bremen: Finanzsenater Björn Fecker hett vun de Breemsche Regerungskoalitschoon verlangt: Se schullen nich vun den Spoorkurs afgahn. Dat nu mehr Geld ut den Lännerfinanz-Utgliek na Bremen kummt, weer allerbest, meen de Mann vun de Grönen. Dat se aver in de Finanzen Grund rinkriegt, dat is hoochnödig. Güstern weer rutkamen: Wo hier mehr Minschen wahnt, steiht Bremen sowat 167 Millionen Euro mehr vun den Bund un de annern Länner to.

Frachtschipp „Verity“ schall in’n August borgen warrn

Noordsee: In’n August fangt se vör Helgoland woll mit de Arbeiden an, dat Frachtschipp „Verity“ to bargen. Dat weer vun de Generaaldirekschoon Waterstraten un Schippfohrt in Bonn to hören. Vörher müssen se noch 3 dusend Tunnen Stahlbandrullen ut den Frachtruum ruthalen. De „Verity“ harr verleden Oktober mit en annern Frachter en Haveree hatt un weer ünnergahn. Fief Seelüüd sünd dorbi woll to Dode kamen.

Utstellung Tarms rekent mit 100.000 Besöker

Tarms: Vundaag geiht de 74. Utstellung in Tarms los. Veer Daag lang wiest um un bi 750 Utstellers, wat op en Buernhoff allens nee is un wat löppt. Se rekent dormit, dat sik 100.000 Lüüd dat Spektakel ankiekt. Bavenan staht düt Johr de digitale Welt un Künstliche Intelligenz op den Acker un in’n Stall. Dor geiht dat denn um Landmaschienen un Feldroboter, de mit GPS stüert warrt un ganz alleen över dat Ackerland fohrt.

Dat Weer

Un woans süht dat mit dat Weer umto ut? Opstunns hebbt wi in Bremerhaven, Leer un Weyerbarg 17 Graad, in Bremen sünd dat 18 Graad. Vundaag: Eerst dröög mit lockere Wulken. Vun’t Emsland her treckt aver mehr un mehr dichte Wulken op, un de köönt an’n Namiddag un Avend lang un däägt Regen op us daalsmieten. Hier un dor ok mit Blitz un Dunnerslag. Dat Thermometer krabbelt blots noch op 17 bet 21 Graad. De Wind dorto weiht flau oder en beten mehr, an de See to’n Avend hen ok frisch un in Böen, mal vun hier, mal vun dor. Tokamen Nacht treckt de däägte Regen un ok dat Gewidder na de Noordsee un över de Elv af. Achteran dröög mit dichte Wulken, de ok mal oplockern köönt. Bi 16 bet 12 Graad. Morgen: Dichte Wulken un dröög. De Sunn waagt sik meist gor nich rut. An’n Namiddag kann dat wat pladdern, ok mit Blitz un Dunnerslag. Dat Ganze bi 18 bet 21 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Justus Wilke.