Plattdeutsche Nachrichten Plattdüütsche Narichten vun'n 15. Juli 2024

Trump un Biden wohrschaut: kene Gewalt

Washington: Wo güstern op em schaten worrn weer, hett Donald Trump seggt, dat Land schall ruhig blieven un tosamenstahn. „Dat is en Schangs, dat ganze Land tohooptobringen“, meen Trump. Ok US-Präsident Biden sä: All schullen sik trüchnehmen. Gewalt, dat is nie de rechte Weg, meen Biden in en Anspraak an de Natschoon. Middewiel is Trump bi den Parteidag vun siene Republikaners in den Bunnsstaat Wisconsin ankamen. Dor will he sik as Kandidaat för dat Präsidenten-Amt opstellen laten.

Football-EM: Düütschland as goden Huusherr

Berlin: Na Bunnsbinnenministersch Faeser is bi de Football-Europameisterschap ünner’n Streek allens goot lopen. Düütschland harr dat Fest goot utricht, meen Faeser, de ok för den Sport tostännig is. Millionen Minschen harrn ahn Krawall mit’nanner fiert, un dat weer goot för de Lüüd hier. Se bedank sik bi de Rettungs- un Sekerheitslüüd, de dat allens mööglich maakt harrn. Güstern weer de EM to Enn gahn. In dat Endspeel hett Spanien mit 2:1 gegen England de Bavenhand hatt.

Bahn mit neen Kurs gegen öllerhaftige Strecken

Frankfort: Dat allereerste Mal maakt de Bahn en wichtige Streek dicht, un will de heel un deel nee opsetten. Dat geiht um dat Stück twüschen Frankfort un Mannheim. Bet Mitt Dezember maakt se dor allens nee: Gleisen, Hoochleitungen, Signal-Anlagen, Wieken, Brüchen un Bahnhööv. Düsse Oort Kumpleet-Umboo schall op all Strecken in Düütschland kamen, op de de Bahn veel fohrt. Tokamen Johr is to’n Bispeel Hamborg-Berlin an de Reeg.

Perzess gegen Bremer, de woll bi de PKK mitmaakt hett

Hamborg: Glieks geiht de Perzess los gegen en Bremer Kurden, de woll bi de PKK mitmaakt hett. De Partei is aver verbaden. In de Anklaag steiht: Vör de Börgerschapswahl 2019 hett he versöcht, de Kandidatenlist vun de Linke na de kurdsche Arbeiterpartei hen uttorichten. Seggt warrt: De Mann vun 58 Johr weer in Bremen ok dorför tostännig, Spennengeld för de PKK intosammeln.

Hunnen mööt nich mehr an de Lien

Bremen: In Bremen un Neddersassen geiht vundaag de Tiet för’t Bröden un Setten vun wille Deerten to Enn. Dat heet ok: Hunnen mööt nich länger an de Lien. De Bremer Vereen för Deertenschutz fordert liekers all Buern un Lüüd mit en Hund op, vörsichtig to blieven.

Dat Weer

Un woans süht dat mit dat Weer umto ut? Opstunns hebbt wi in Bremerhaven un op Börkum 17 Graad, in Bremen sünd dat 18 un in Rotenborg 19 Graad. Vundaag: Eerst lachen Sunnschien, an de See mal mehr, mal weniger Wulken. Dröög. Vun Middag op an köönt in’t Binnenland ok mal opstiegen Wulken dortokamen. Dat Thermometer krabbelt op 20 Graad op de Inseln, anners 23 bet 26 Graad. De Wind dorto weiht flau, an de See ok en beten mehr vun de süüdwesten Kant. An’n Namiddag un Avend dreiht he mehr un mehr op Noordoost. Tokamen Nacht kaamt vun’t Ollenborger Mönsterland gau vele dichte Wulken op. Na Middernacht treckt vun Süüdwest na Noordoost en poor Schuer dör, ok mit Blitz un Dunnerslag. Achteran lockert dat wedder op. Bi 18 bet 16 Graad. Morgen: Wenn de letzten Schuer un Gewidder na de Noordsee un de Elv aftrocken sünd, warrt dat dröög mit mal Sunnschien, mal Wulken. An’n Namiddag un Avend kann dat ok wedder gewiddern. Dat Ganze bi 21 bet 25 Graad.