Plattdeutsche Nachrichten Plattdüütsche Narichten vun'n 16. Juli 2024

Faeser verbütt rechtsextremistisch Compact-Magazin

Berlin: Bunnsbinnenministersch Nancy Faeser hett dat siet 2021 dör dat Bunnsamt för Verfaatensschutz seker as rechtsextremistisch inornt Blatt „Compact“ verbaden. Dat Blatt is en wichtig Spraakrohr vun düsse Szeen un hisst op bannig böös Wies gegen Minschen mit Migratschoonsgeschicht, begrünnt Faeser dat Verbott. Totiets warrn de Geschäftsrüüm un Wahnungen vun Mitarbeiters in Brandenburg ünnersöcht.

US-Republikaner stellt Trump as Präsidentschopskandidaten op

Milwaukee: De US-Republikaner hebbt Donald Trump mit den nödigen Delegertenstimmen as ehren Präsidentschopskandidaten nomineert. As Viezkandidaten för de Präsidentschopswahlen in November päsenteert Trump sien Parteikolleeg J.D. Vance. De 39-johrige is Senator in den Bunnsstaat Ohio un gellt as Höpen för de Tokunft vun de Republikaner.

EU boykotteert to´n Deel Ungarns Raatspräsidentschop

Brüssel: De EU maakt mehr Druck op Ungarns Ministerpräsident Viktor Orban, de totiets EU-Raatspräsident is. En Spreker vun de EU-Kommischoon hett güstern Avend en Boykott vun informellen Ministerdrapen unner dat ungoorsch Leid künnig maakt. Doran schüllt blots noch de baversten Beamten deelnehmen, aver kien Kommissoren. Dor achter stickt, dat Orban jümmers sien eegen Weg in de Ukraine-Poliktik söcht.

Afordnete wählt EU-Parlamentspräsidentin

Straßborg: Dat wählte EU-Parlament is an Vörmiddag to dat eerste Drapen na de Neewahl tohoop kamen. De Afordneten stimmen in Straßborg över de tokünftig Präsidentsche af. Man rekent dormit, dat de Parlamentspräsidentin Roberta Metsola vun dat Midde-Rechts-Bündnis EVP, de dat Amt betnu harr, wedder wählt warrt. Dunnersdag bestimmt dat Parlament över en tweete Amtstiet vun Kommischoonspräsidentin Ursula von der Leyen.

Bremer Justizstaatsraat stellt Verbetern bi de Bremer Justizanstalt in Utsicht

Bremen: De Justizstaatsraat Björn Tschöpe hett in den Rechtsutschuss vun de Börgerschop perspektievsch künnig maakt, dat de Situatschoon in de övervulle Bremer Justizanstalt beter warrt. He is dorför, dat op lange Sicht de jugendlichen Gesetzbreker in dat neddersässche Hameln verleggt un dormit foftig Haftplätz free warrn. Butendem verdeffendeert he den Besluss, bet Oktober kien Minsch mehr optonehmen, de ehre Utgliekfreeheitsstraaf antreden schüllt – wiel se to´n Bispill de Geldstraaf nich betahlen köönt.

Dat Weer

Un nu kiekt wi op dat Weer: In Emm hebbt wi 18 Graad, in Möppen 19 Graad, in Bremerhoben sünd dat 20 un in Bremen hebbt wi opstunns 22 Graad. Hüüt vörmiddag wesseln sik Sünn un Wulken af, Schuer sünd blots de Utnahm, meist blifft dat dröög. An Namiddag un Avend wiederhen Wulken un Sünn in Wessel, vun dat Emsland un dat Ossenbrügger Land warrt dat mehr natt un dat kann ok Gewidder geven. Dat Thermometer wiest us 21 Graad op de Eilannen un 23 bet 25 Graad in´t Binnenland. In de Nacht trecken jümmer mal Wulken an Heven vörbi, hier un dor ok mit Schuer, Blitz un Dunnerslag, de aver nalaaten. Bet na Middernacht vun de Nedderlannen dicke Wulken ranrullen, de denn twüschendör Regen bringen un dat denn bi 16 bet 14 Graad. Middeweken eerst düütlich mehr Wulken as Sünn, hier un dor Schuer, besünners in noorden umto Bremen. Vun Middag af an maaken de Wulken Platz un de Sünn lacht en beten för us, bet an Avend denn wedder Schuer mit dorbi sünd. Dat Thermometer wiest us 19 Graad op de Eilannen un 21 bet 23 Graad in´t Binnenland.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.