Plattdeutsche Nachrichten Plattdüütsche Narichten vun'n 17. Juli 2024
Standdatum: 17. Juli 2024.
Plattdüütsche Narichten vun'n 17. Juli 2024
Informationen zum Audio
- Verfügbar bis: 17. Juli 2025 Informationen zur Verweildauer
Bunnsregeern will Huusholt fastleggen
Berlin: Achterna dat Bunnskabinett wekenlang verhannelt hett, schall hüüt de Huusholt för dat tokamen Johr fastleggt warrn. Mehr as
480 Millarden Euro sünd an Utgaven plaant, dat is en beten weniger as in düt Johr. Finanzminister Christian Lindner plaant dorbi mit neen Krediten in Höögde vun binah 44 Milliarden Euro.
Düütschland hölpt bi Wedderopbo vun dat kaputte Kinnerkrankenhuus in Kiew
Berlin: De Bunnsregern will bi den Wedderopbo vun dat Kinnerkrankenhuus in Kiew hölpen. Dat Huus, dat in de Hauptstadt Kiew steiht, is bi en russsche Luftattack to´n Deel tweigahn. Dat Entwicklungsministerium warrt dorför teihn Millionen Euro praat stellen, schrifft de Rheinsche Post.
Staus op de Straaten umto dat Deichbrand-Festival vermoodt
Cuxhoben: Morgen fangt in Nordholt dat Deichbrand-Festival an. Dorum rekent de Polizei vun nu af an, bet in den Avend, mit besünners starken Verkehr un Staus umto Cuxhoben un Bremerhoben. Rund sösstig-dusend Besökers schüllt woll kamen, de mehrsten över de Autobahn 27 un de B73. Dat Deichbrand Festival duert bet Sünndag.
Koggenbräu-Huus in Bremerhoben warrt ümboet
Bremerhoben: Dat fröhere Koggenbräu-Huus in den Olen Haven warrt nu doch nich afriet. Dat Huus is mal en Koorn-Spieker west un is nu ünner Denkmaalschuul stellt worrn. Dat hett de Stadt Bremerhoben un de Bremer Invester künnig maakt, de dor en Broeree apenmaken will. Maandenlang wurr de Afrietplaan bekrittelt.
Werder Bremen föhrt in´t Trainingsquarteer
Zell am Ziller: Football Bunnsligist Werder Bremen fohrt hüüt in dat Trainingsquarteer na Öösterriek. Gegen Middag schall de Kru bi dat Hotel ankamen. Kort dorna geiht dat glieks op den Trainingsplatz. Blangenbi de Trainings warrt dat in den tokamen Daag ok twee Testspeelen geven, gegen de italjeensch Eerstligakru US Lecce un de engelsche Kru ut de tweeten Liga Sheffield Wednesday.
Dat Weer
Un nu kiekt wi op dat Weer: In Emm un Möppen hebbt wi 16 Graad, in Bremen un Bremerhoben sünd dat opstunns 17 Graad. Hüüt vörmiddag hebbt de Wulken de Nees vörn, un dat kann ok mal schuern. An Namiddag un Avend warrn de Schuer weniger, de Wulken ok, besünners in´t Binnenland, un de Sünn lacht ok mal för us. Un dat bi 21 bet 23 Graad in Binnenland un 18 bet 20 Graad an de Küst un op de Eilannen. In de Nacht lösen sik de Wulken op un wi köönt de Steerns funkeln sehen. An Morgen treckt hier un dor Dies un Daak op, man dat blifft dröög bi 12 bet 10 Graad in´t Binnenland un 15 bet 13 Graad an de Küst un op de Eilannen. Dunnersdag fangt den meist daakig an, övern Vörmiddag hett de Sünn mehr un mehr de Nees vörn, vun Middag af an lacht se denn, blots en poor lütte Wulken kieken mal vörbi, man dat blifft dröög. Dorto warrt dat fein warm bi 23 bet 26 Graad in´t Binnenland un 20 bet 22 Graad direktemang an de Küst un op de Eilannen.
Dat weren de Plattdüütschen Narichten. Tohoopstellt vun Sven Kuhnen. Op Platt trechtmaakt un vörleest vun Martina Brünjes.