Plattdeutsche Nachrichten Plattdüütsche Narichten vun'n 18. Juli 2024

EU-Parlament stimmt af: Twete Amtstiet för von der Leyen?

Straßborg: Dat Europaparlament stimmt an’n Middag doröver af, wat dat för de CDU-Fro Ursula von der Leyen en twete Amtstiet as Präsidentin vun de EU-Kommischoon geven warrt. Dat se wählt warrt, dorför bruukt se de afsluuts mehrsten Stimmen vun de 700 Afgeordneten. Von der Leyen sett vor allen dor op, dat se Stütt kriggt vun ehr Europääsche Volkspartei, man ok vun de Sozialdemokraten un de Liberalen. In en Reed harr se an’n Vörmiddag verkloort, wat för en Kurs se in de tokamen fief Johr stüern will.

Biden hett Corona: Eerstmal keen Wahlkampf

Washington: US-Präsident Biden is positiv op Corona test worrn. Dorum steiht sien Wahlkampf eerstmal still. En Sprekersch sä: De Präsident hett blots wenige Anteken. He will sik nu na sien Huus in Delaware trüchtrecken. Dat Biden sik mit Corona ansteken hett, fallt direktemang tohoop mit dat Hen un Her doröver, wat he dat Amt noch utfüllen kann. Medien hebbt to weten kregen: Top-Lüüd vun sien demokraatsche Partei hebbt seggt: He schall sik lever nich noch mal opstellen laten. Biden sülvst harr en poor Mal kloormaakt: He is fit för en twete Amtstiet.

Jede föffte lütte Unnernehmer schall Corona-Noothölp trüchbetahlen

Berlin: Jede föffte Sülvststännige in Düütschland mutt sien Corona-Noothölp to’n Deel oder ganz trüchbetahlen. Dat hebbt de WDR, NDR un de Süüddüütsche Zeitung to weten kregen. Dat gellt för mehr as 400.000 Unnernehmen un Bedrieven. Dat Bunns-Wirtschaftsministerium seggt: Vele hebbt gor keen Anrecht op dat Hölpsgeld hatt. Mit de Corona-Noothölp harr de Bund in de Pandemie lütte Unnernehmen Stütt geven, de ehr Bedriev nich wiederlopen kunn oder groten Schaden nahmen hett.

Bremer Hauptbahnhoff: Arger wegen Maleschen an Stellwark

Bremen: An den Bremer Hauptbahnhoff gifft dat siet fröh an’n Morgen grote Maleschen. De Bahn seggt: En Stellwark arbeit nich richtig. Opstunns fohrt keen Bahn vun un na Bremen. Bahnen na wiet weg fohrt um Bremen rum. Na dichtbi fohrt de Bahnen, wenn överhaupt, veel later as plaant. De Bahn seggt: Reisen Lüüd schüllt sik to rechter Tiet online Utkunft halen. Se rekent dormit, dat noch an’n Vörmiddag de Verkehr wedder in Gang kummt.

Schippfohrtsmuseum Bremerhaven mit ne’e Utstellung op Duer

Bremerhaven: De ne’e Utstellung in dat Düütsche Schippfohrtsmuseum in Bremerhaven maakt vundaag de Dören op för Jan un Allemann. Heten deit se „Schippswelten – de Ozean un wi“. Dorför hebbt se ok en Forschungsschipp vun 34 Meter naboot. Dor is to sehn, woans de Arbeit op so’n Schipp utsüht. Kost hett de Utstellung sowat 10,5 Millionen Euro. Dat Halve hett de Bund betahlt.

Dat Weer

Un woans süht dat mit dat Weer umto ut? Opstunns hebbt wi in Bevers 17 Graad, in Bremerhaven sünd dat 18 un in Bremen un Cloppenborg 19 Graad. Vundaag: Eerst hell un fründlich, un ok an’n Namiddag dröög mit Sunnschien un blots en poor Wulken. Dat Thermometer krabbelt op 23 bet 27 Graad. Op de Inseln un an de See 20 bet 22 Graad. De Wind dorto weiht flau, he dreiht över Dag vun Süüd över West na de noorden Kant. Tokamen Nacht: Steernenkloor mit en poor Wulken un dröög. Twüschen Werser un Elv kann sik Daak utbillen. Bi 17 bet 11 Graad. Morgen: Sunnschien satt, mit blots en poor lüttje Wulken. Na de Küst to nix as Sunnschien. Dat Ganze bi 27 bet 30 Graad, an de See 23 bet 26 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.