Plattdeutsche Nachrichten Plattdüütsche Narichten vun'n 22. Juli 2024
Standdatum: 22. Juli 2024.
Plattdüütsche Narichten vun'n 22. Juli 2024
Informationen zum Audio
- Verfügbar bis: 22. Juli 2025 Informationen zur Verweildauer
Kamala Harris will as Toppkandidaatin in`t Rennen gahn
Washington: Na dat ut dat Amt rutgahn vun US-Präsident Joe Biden as Toppkandidaat hofft de Demokraten op een Ümdreihn in´t Wahlkampf. De, de nu in´t Rennen gahn schall is de Vizepräsidentin Kamala Harris. Biden un ok vele annere ut de Partei willt ehr Stütt dorför geven. Man wat se dat schafft mit de Kandidatur liggt an´t Enn bi de Delegierten vun de Demokaten ut all Bunnslänner.
Familie vun Blitz dropen un deels op Leven un Dood to Schaden kamen
Delmhorst: Bi een Blitzslag is, na Angaven vun de Polizei, eene Familie mit 8 Minschen to Schaden kamen. Een 5-jöhrige Jung un eene 14-jöhrige hebbt se wedderbeleevt un in´t Krankenhuus bröcht. De annern ut de Familie hebbt se ok in Krankenhüüs versorgt. De Familie harr an´t Nomdag , bi een Unweer, Schutz ünner een Boom söökt.
Inwohner vun Mallorca gaht gegen Massen-Tourismus op de Straat
Mallorca: Vele Dusend Inwohner sünd, in de Eiland Hauptstadt Palma, gegen den Massen-Tourismus, un wat dorbi ruutsuert, op de Straat gahn. De Polizei hett 20.000 Minschen tellt. De, de dat plaant hebbt seggt, dat dat 50.000 Demonstranten wesen sünd. De Deelnehmers hebbt ok bekrittelt, dat blots een Mindertall vun den Tourismus profiteert. De Meesten, in dat Wirtschaftsfeld dorgegen, kreegt blots Jobs mit Billiglohn.
Diekbrand-Festival is to Enn
Nordholt: Bi Cuxhaben is an´t Avend dat Diekbrand-Festival to Enn gahn. Polizei un Helpslüüd snackt vun eenen positiven Afloop. Dat hett keene grötteren Vörkamen geven. Rund 60.000 Minschen harrn siet Dunnersdag tosamen fiert. All tohoop hebbt knapp 120 Künstlerinnen un Künstler op de Bühnen mitmaakt.
Slowene Pogacar winnt Tour de France
Nizza: De Rennradfohrer Tadej Pogacar hett de 111. Tour de France wunnen. De 25-jöhrige Slowene hett gistern sienen 6. Etappensieg fiert. Un dormit ok sienen drütten Gesamterfolg na 2020 on ok 2021. De Rundfohrt dör Frankriek is to´n eersten Mal in de Geschicht nich in Paris to Enn gahn. Grund dorför is, dat de Olympischen Speele Freedag in de französ`sche Hauptstadt losgaht.
Dat Weer
Un nu een Blick op dat Weer: in Cuxhaben, in Bremen un in Neenborg 17 un in Bremerhaben sünd dat opstünns 18 Graad. Hütt Vomdag gifft dat noch een paar Schuers, de bit to´n Middag na Oosten över de Elb un de Lüneborger Heid aftreckt. De Sünn schient denn för us, bi 20 bit 24 Graad. Tokamen Nacht kummt mehr un mehr Wulken op, de to´n Morrn hen hier un dor Schuers mit sik bringt, bi 17 bit 14 Graad. Morrn hebbt wi vele Wulken, dat gifft jümmer wedder Regen. Dat kann ok mal düchtig pladdern un wi mööt ok mit Blitz un Dunnerslag un Hagel reken. De Wind kann ok mal düchtig pusten. De Temperaturen liggt bi 20 bit 22 Graad. Middeweeken gifft dat eenen fründlichen Mix ut Sünn un Wulken. Schuers sünd blots af un an mal mööglich, bi 19 bit 22 Graad. Dat weren de Narichten op Platt. Tohoopstellt hett se Justus Wilke. Trechtmaakt un vörleest vun Antje Kruppa.