Plattdeutsche Nachrichten Plattdüütsche Narichten vun'n 23. Juli 2024
Standdatum: 23. Juli 2024.
Plattdüütsche Narichten vun'n 23. Juli 2024
Informationen zum Audio
- Verfügbar bis: 23. Juli 2025 Informationen zur Verweildauer
Harris hett luut Medien genoog Stimmen för Kandidatur
Washington: US-Vizepräsidentin Kamala Harris hett luut Medien nooch Stütt vun de Delegierten vun de Demokraten. Dormit kann se in´t November as Präsidentschaftskandidatin vun ehre Partei in´t Rennen gahn. Man de Deligierten dröfft ok bi den Parteidag in´t August för eenen annnern Kandidaten stimmen. Luut AP-Ümfraag un CNN kriegt Harris Stütt vun mehr as 1.976 Deligierten. Un de bruukt se ok, dormit se in´t eersten Wahlgang de Nääs vörn hett.
Vele Dode bi nee`e Israel`sche Attack
Chan Junis: In´t Gazakrieg hett dat, as dat schient twischen de Israel`sche Armee un de Terrororganisation Hamas gewaltige Attacken geven. De Hamas snackt vun 70 Dode un mehr as 200 Minschen, de to Schaden kamen sünd. Dat Israel`sche Militär seggt, dat man Terroristen in dat Rebeet dropen un buten Gefecht sett hett. Dorvör hett dat de Order geven, dat man all Minschen ut den Oosten vun de Stadt rut haalt. Vun dor hett dat jümmer wedder vele Attacken op Israel geven.
Ampel un Union willt mehr Schutz för Verfatensgericht
Berlin: Dat Bunnesverfatensgericht schall mehr Schutz vör polit`schet Inmischen kriegen. Dorto stellt hütt Middag de Parteien vun de Ampel-Koalition un de CDU ehre gemeensaamen Plans vör. Bit nu kann man dat Gesetz över dat Gericht mit eene eenfache Bunnsdag-Mehrheit ännern. De Justizminister Marco Buschmann will, dat dat nich mehr so licht geiht.
Militär probeert wedder Raketen in´t Moor
Meppen: De Bunnswehr draff vun August an wedder Wapens un Munition in´t Moor utproberen. Vör 6 Johren harr dat een grotet Füer na sülke Tests geven. Dorna hett dor keen Scheten mehr stattfunnen. De Bunnswehr hett 15 Millionen Euro in Löschbrunnen, in nee`e Insatzfahrtüüg un in een Zentrum för dat Planen investiert.
Meyer-Warft bruukt na Gootachten Plaan, woneem dat Geld herkummt
Papenborg: De Bedrievsraat vun de Meyer-Warft hett eerstmal positiv op dat Gootachten för den Plaan, allns op Schick to bringen reagiert. Wichtig is, dat dat Gootachten eene Perspektiv för de Warft sücht, dat seggt de Boss vun´t Bedrievsraat Andreas Hensen. Man he seggt ok, dat de Meyer-Warft noch nich een för allemal rett is. Denn dat Geld reckt nich mal för mehr as 8 Weeken. He seggt, dat denn ok klar sein mutt wo de Warft in Tokunft dat Geld her kriggt.
Dat Weer
Un nu een Blick op dat Weer: in Leer, in Bremen, in Neenborg un in Bremerhaben sünd dat opstünns 19 Graad. Hütt hebbt wi vele dicke Wulken an´t Heben. Vun Middag an mööt wi mit Schuers un Gewidder reken. Dat kann ok mal onnig gallern. Ok Hagel is hier un dor mööglich, bi 20 bit 23 Graad. Tokamen Nacht geiht dat jüst so wesselhaft wieter. Vele Wulken un dor kummt mal mehr mal weniger Natt vun baven rünner, bi 14 bit 16 Graad. Morrn is dat fründlicher und at gifft enen Mix ut Sünnenschien un dichte Wulken. De Temperaturen liggt bi 19 bit 22 Graad. Dunnerstag is dat erst dröge un de Sünn kummt mal dör. To´n Nomdag hen kummt mehr Wulken op un denn sünd ok Schuers mööglich, bi 21 bit 25 Graad. Dat weren de Narichten op Platt. Tohoopstellt hett se Sven Kuhnen. Trechtmaakt un vörleest vun Antje Kruppa.