Plattdeutsche Nachrichten Plattdüütsche Narichten vun'n 24. Juli 2024
Standdatum: 24. Juli 2024.
Plattdüütsche Narichten vun'n 24. Juli 2024
Informationen zum Audio
- Verfügbar bis: 24. Juli 2025 Informationen zur Verweildauer
Bunnsbinnenministerium verbüdd Islaamsch Zentrum Hamburg
Hamburg: Dat Bunnsbinnenministerium hett en Vereensverbott gegen dat Islaamsch Zentrum Hamburg anornt. Siet hüüt morgen lopen gegen den Vereen polizeiliche Ünnersökens in de blauen Moschee an de Alster un in söven wieteren Bunnslännern, man ok in Bremen. Dat islaamsche Zentrum Hamburg höört na Opsichtslüüd woll meist to dat iraansch Regim in Düütschland.
Harris fangt strietlustig mit den Wahlkampf as möögliche Präsidentschopskandidatin an
Milwaukee: De möögliche US-Prasidentschopskandidatin vun de Demokraten Kamalla Harris, hett ehren Wahlkamp anfungen. Ehre eerste Reed in düsse Rull hett se in den US-Bunnsstaat Wisconsin holen. Dorbi hett se ehren republikanschen Wedderpart Donald Trump angrepen. De USA stünnt vör de Wahl twuschen Freeheit un böös Döreenanner.
Besluss över Bahnverkehr na Nordenham steiht an
Elsfleth: Fachlüüd vun de Düütschen Bahn kieken sik hüüt Vörmiddag wiederhen nip un nau den Schaaden an de provisoorsch Huntebrüch an. En Bahnspreker maakt künnig, dat de Fachlüüd denn kloor seggen, of dor överhaupt noch en Tog fohren kann. Güstern namiddag is en Schipp mit de Brüch tosamenstött. Twuschen Berne un Elsfleth sünd nu Bussen as Behölp ünnerwegens.
Personaalmangel föhrt to Versorgensenpäss
Bremen: Rund 1300 Kinner warrt vun August af an woll kien Versorgenssteed in en Kita hebben, hett de Werser-Kurier vun de Billungsbehöörd to weten kriegen. Dor achter stickt en Personaalmangel un dröppt kommunale Anbeders, to´n Bispeel Kita Bremen, as ok privaate. Um un bi 900 Kitasteeden sünd twaars nee inricht wurrn, köönt aver nicht bruukt warrn, wiel kien Personaal dor is.
Bedrieve un Inrichten setten jümmer mehr Sekerheitspersonaal in
Bremen: In dat Land Bremen kaamt jümmer mehr Sekerheitslüüd to´n Insatt, to´n Bispeel in Koophüüs oder in soziaalen Inrichten. Dat geiht ut Tahlen vun den Verband de Sekerheitswertschop vör, de ok buten un binnen vörliggen. Um un bi 3400 Minschen weren dorna in dat Land Bremen verleden Johr bi Sekerheitsdeensten anstellt. De Verband gifft as Grund för den Anstieg een höögere Nafraag vun Börgerslüüd na Sekerheit an.
Dat Weer
Un nu kiekt wi op dat Weer: In Bremen un Möppen hebbt wi s17 Graad, in Bremerhoben un Emm sünd dat opstunns 18 Graad. An Vörmiddag trecken de Schuers in Richten Aller af, achterna lacht meist de Sünn man ok en poor Wulken sünd ünnerwegens, dorbi blifft dat dröög. Dat Thermometer wiest us 19 bet 20 Graad op de Eilannen un 21 bet 22 Graad in´t Binnenland. In de Nacht köönt wi blangenbi en poor Wulken de Steerns funkeln sehen un dat blifft dröög bi 11 bet 8 Graad in´t Binnenland, an de Küst un op de Eilannen 15 bet 12 Graad. De Dunnersdag fangt diesig un daakig an, denn schafft de Sünn dat aver gau un de Daak lööst sik op. De Nedderlannen schicken us en poor Wulken de vun middag af an vun dat Werser-Ems-Rebeet dicker warrn. Eerst an Avend fangt dat mal an to drüppeln man dat kann ok Schuers geven. Un dat ganze bi 21 bet 22 Graad op de Eilannen un an de Küst un bet to 24 Graad in´t Binnenland.
Dat weren de Plattdüütschen Narichten. Tohoopstellt vun Sven Kuhnen. Op Platt trechtmaakt un vörleest vun Martina Brünjes.