Plattdeutsche Nachrichten Plattdüütsche Narichten vun'n 25. Juli 2024

Klimaaktivisten stoppen Flegeree in Frankfurt för mehrere Stünnen

Frankfurt: Achterna en Stööraktschoon vun Klimaaktivisten is dat Starten un Lannen op den Flegerhaven in Frankfurt, de gröttste in ganz Düütschland, wedder mööglich. Dat maakt en Flegerhaven-Spreeker künnig. An Morgen hebbt Klimaaktivisten vun de „Letzten Generatschoon“ sik op de Start-un Lannebahnen fastkleevt. Um un bi 140 Flöög wurrn streken. Ok Verbinnen vun un na Bremen sünd wegfullen.

Bahn föhrt woll Milliardenverlust in

Berlin: De Düütsche Bahn will in en halv Stünn künnig maken, wo ehre Bilanz för dat eerste Halvjohr utfallen is. Na de Narichtenagentur Reuters hett de Konzern woll en Minus vun 1,2 Milliarden Euro maakt. En grooten Deel vun den Verlust is woll dat marood Schenennett totoschrieven, wat Milliardensummen sluckt. De Bahn överleggt woll dorüm, de een or annere ICE- un IC-Verbinnen to strieken. Dat steiht in en Strategiepapeer vun den Kunzern, wat mehrere Medien vörliggt.

US-Präsident Biden begrünnt den Afstand to sien Kandidatur

Washington: US-Präsident Biden hett sik to´n eersten Mal in en Reed to sien Utstieg vun dat Präsidentschopsrennen utspraken. Dat is nu Tiet, den Staff an jüngere Stimmen to övergeven, see he in sien Fernsehanspraak. Dat is de beste Weg, de Natschoon to vereenen. Biden geev in sien Reed ok wedder Stütt för Viez-Präsidentin Harris, de betnu de eenzigst Bewarber för de Präsidentschopskandidatur vun de Demokraten is.

Bremer FDP bringt Klage gegen aktuellen Huusholt op den Weg

Bremen: De FDP-Fraktschoon will an Middag en Klaag gegen den Lannshuusholt op den Weg bringen. De FDP-Afordneten meenen, dat Bremen hooge Kredite opnimmt, üm op de Klimakniep to reageern, is gegen de Verfaten. All tohoop geiht dat düt Johr üm 1,2 Millarden Euro. Geld, wat de Senaat ok in den klimaneutralen Umboe vun dat Bremer Staahlwark rinsteken will. De FDP verlangt, dat de Staatsgerichtshoff nu pröövt, of würklich en Nootlaag in den Sinn vun de Schullenbrems-Regeln vörliggt.

Utbetern vun kaputte Huntebrüch duert woll mehrere Weken

Elsfleth: Dat Utbetern vun de kaputte Huntebrüch, wo Dingsdag wedder en Schipp mit tosamenstött is, duert woll mehrere Weken. In düsse Tiet kann keen Tog doröver fohrn. De Düütsche Bahn maakt künnig, dat de Schaaden so groot is, dat nu noch nich kloor is, wo lang de Reparatur anduern warrt.

Dat Weer

Un nu kiekt wi op dat Weer: In Bremen un Bremerhoben hebbt wi 15 Graad, in Emm sünd dat 16 Graad un in Nee´enborg hebbt wi opstunns 17 Graad. Övern Vörmiddag lacht meist de Sünn, man de Nedderlannen schicken us na un na lütte Wulken vörbi. An Namiddag un Avend wesseln sik twuschen Werser un Elv Sünn un Wulken af. In dat Werser-Ems-Rebeet hebbt de Wulken de Nees vörn un hier dröppelt dat ok laater. Dat Thermometer wiest us 21 Graad op de Eilannen un 23 bet 25 Graad in´t Binnenland. In de Nacht pladdert dat, to´n Deel ok mit deegt Regen, hier un dor ok Blitz un Donnerslag bi 18 Graad op Langeoog un 16 bet 15 Graad in´t Binnenland. De Freedag fangt mit dicken Wulken an, eerst noch mit Schuer, in´n Verloop ok mal dröög. Vun Middag af an schafft de Sünn dat twaars ok mal, liekers kann dat bet to´n Avend ok wedder Schuer un Gewidder geven, lokaal ok deegt Regen. Dat Thermometer wiest us morgen 23 bet 25 Graad in´t Binnenland, an de Küst un op de Eilannen 20 bet 22 Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.