Plattdeutsche Nachrichten Plattdüütsche Narichten vun'n 26. Juli 2024
Standdatum: 26. Juli 2024.
Plattdüütsche Narichten vun'n 26. Juli 2024
Informationen zum Audio
- Verfügbar bis: 26. Juli 2025 Informationen zur Verweildauer
Olympische Spelen gaht los
Paris: De Olympischen Spelen gaht an’n Avend offiziell los. To’n eersten Mal findt de Fierstünn nich in en Stadion, sünnern op dat Water statt. Op meist 90 Bööt schüllt de mehr as 200 Afordnungen över de Seine fohren. De Fier ward Klock halvig acht an’n Avend live in’t Eerste överdragen.
Kanzler Scholz will strengere Kontrollen för Grenzen
Saarbrüch: Kanzler Scholz hett scharpe Kontrollen an de Grenzen ok in Tokunft künnigmaakt. Dat geiht dorüm, dat illegale Inwandern na Düütschland in Schranken to setten, säe Scholz to de „Saarbrücker Zeitung“. De Tallen mööt daalgahn. Inwanderer, de wegen en Wessel bi de Arbeit herkaamt, sünd twars nödig un dorüm willkamen, aver dat gifft to veele, de gegen dat Gesetz na Düütschland kaamt.
Repareern vun Huntebrüch duert tominnst söss Weken
Elsfleth: Dat Repareern vun de Iesenbahnbrüch in’n Kreis Wersermarsch ward woll tominnst söss Weken duern. Dat hett Neddersassens Verkehrsminister Olaf Lies na en Drapen mit Gemeenden, Wirtschaft, Habens un de Düütschen Bahn seggt. Dat geiht üm de Linie Bremen – Noornham. Twüschen Beern un Braak fohrt Ersatzbussen.
ADAC rekent mit dat leegste Stauwekenenn vun de Saison
München: De ADAC rekent mit en vun de leegsten Stau-Wekenennen vun düsse Ferientiet. För Hamborg, Sleswig-Holsteen un Meckelnborg-Vörpommern rekent de Verkehrsfachlüüd mit en twete Reiswell. In Neddersassen un Bremen ward dorgegen woll veele Lüüd ut den Urlaub trüchkamen. Bavento drauht wegen Korturlaubers un Minschen, de blots för een Dag en Utfloog maakt, noch gröttere Gefohr vun Staus.
Still Gedenken an Arian
Bremführ: Mit en still Gedenken wüllt se hüüt an den sössjohrigen Arian erinnern un Afscheed vun em nehmen. He schall hüüt in’n engsten Kring vun de Familie to Graff bröcht warrn. De autistisch Jung is Enn April ut sein Öllernhuus in Bremführ verswunnen. Na dat he över Maanden söcht worrn is, hebbt se em Enn Juni dood funnen.
Dat Weer
Un nu en Blick op dat Weer: In Bremen un Nordholt 17, un in Bremerhaben un Leer sünd dat opstünns 18 Graad. Hüüt geiht dat mit veelen dichten Wulken in den Dag. Vun Tiet to Tiet regent dat, aver dat blifft ok jümmer wedder för längere Tiet dröög. An’n Namiddag kummt fakener de Sünn dör, aver bet to’n Avend köönt sik enkelte Schuers un Gewidder mit starken Regen billen. Dat Thermometer stiggt op 23 bet 25 Graad, op de Eilannen un an de Küst op 20 bet 22 Graad. In de Nacht hollt sik Richtung Aller veele Wulken, un af un an fallt noch’n beten Regen. Anners lockert de Wulken vun de Noordsee her fakener op, un denn blifft dat dröög. Hier un dor kann sik Daak billen. De Luft köhlt sik af op 16 bet 11 Graad. Morgen schient vun’t nöördliche Emsland bet to’n Elv-Werser-Dreeeck fakener de Sünn. Af un an treckt dickere Wulken mit enkelte Schuers vörbi. Vun’t südliche Emsland bet to de Lünborger Heid is dat meisttiets wulkig. ‘N beten Regen gifft dat ok, aver dat blifft ok mal för längere Tiet dröög bi 20 bet 23 Graad.
Dat weern de Narichten op platt. Tohoopstellt hett se Melissa Kunkel. Op Platt trechtmaakt un vörleest vun Marc Gelhart.