Plattdeutsche Nachrichten Plattdüütsche Narichten vun'n 15. Januar 2025

Bunnswehr schall Drohnen afscheten dörven

Berlin. De Bunnswehr schall in Tokunft verdächtige Drohnen in bestimmen Fallen afscheten dörven. Dat süht en Gesetzvörslag vör, den dat Kabinett an´n Vörmiddag fastleggen will. Achtergrund is, dat in Düütschland jümmer wedder mal Drohnen to sehn sünd, de gegen dat Gesetz över Militäranlagen flegen. De Sekerheitsbehörden vermoden, dat se vun Russland brukt weern, üm wat uttospioneren. Betto draff de Bunnswehr blots as Warnung scheten or Floogdingen dwingen to landen. Noch nich kloor is, of de Gesetzvörslag vun SPD un Gröne in´n Bunnsdag de mehrsten Stimmen kriegen deit.

Elektronisch Patschentenakte warrt vun hüüt an utprobeert

Berlin. In Düütschland fangt vundag de elektronisch Patschentenakte an. Eerstmal warrt se in den Modellgegenden Hamborg, Nordrhein-Westfalen un in Franken een Maand lang utprobeert. Dorna schall de E-Akte bunnswiet för all gesetzlich versekerte Lüüd inföhrt weern -  wenn se nich dorgegen sünd. In de elektronisch Patschentenakte weern Dokumenten as Laboorwerte un Agaven to Druppen un Pillen digital opschrieven un fasthollen. Patschentenschützer bekriddeln dat Inföhren. Graad ole Minschen kamen mit dat vigeliensche Anwennen op Smartphones or Tafelreekners nich torecht. Dat vermellt de Pfleegschutzbund Bremen.

Ünnersökers nehmen suspenderten Präsidenten vun Süüdkorea fast

Seoul. De afsetten Präsident vun Süüdkorea, Yoon Suk Yeol, is fastnahmen wurren. Polizisten un Ünnersökers vun de Anti-Korruptions-Behöörd föhrten den 64-jöhrig old Mann in sien Huus af. Yoon harr Süüdkorea Anfang Dezember in en politisch Slamassel stört, as he för korte Tiet dat Kriegsrecht utreep. Achtergrund weer en Huusholdstriet. Dat is dat eerste Mal in de Geschicht vun Süüdkorea, dat en Präsident, de in´t Amt weer, achter Trallen kaamt. Neven de Ünnersökens vun de Anti-Korruptions-Behöörd löppt ok en Amtsrutsmeetverfohren gegen Yoon.

BGH ünnersökt Urdeel gegen Vadder ut Bremen

Bremen. De Bunnsgerichtshoff hett in Ogenblick den Fall vun en ümbrochen söven Johr old Jungen ut Bremen op den Disch. Dat Kind weer 2023 vun sien Vadder in´n Slaap ümbrocht worren. Dat Landgericht Bremen harr den Mann in dat verleden Johr wegen Moord to darthein Johr achter Trallen sett un em in en Kaschott för Lüüd mit kranken Selen verordeelt. Gegen düsset Oordeel harrn sowoll de Anklaagte as ok de Staatsafkaatschop Revischoon inleggt. Nu mutt de Bunnsgerichthoff seggen, of dat Urdeel stahn blifft.

Polizei rüümt Supermarkt in Wilhelmshaben wegen Bananenspinn

Wilhelmshaben. En Discounter in Wilhelmshaben is an´n fröhen Avend för en korte Tiet rüüm wurren. As de Polizei vermellt, weer in de Aavstafdelen en villicht gefährliche Bananenspinn sehn wurren. Ehrdat de Hölpslüüd indrapen weern, harr de Filiaal-Baas dat Deert al in en Sack sekert. De Polizei dörchsöch dorophen den Laden na noch mehr Spinnen. Hett aver kien funnen. De Bananenspinn wurr dat Veterinäramt övergeven.

Dat Weer

Un nu noch en Blick op dat Weer: In Nienborg veer, in Bremen-Mitt un in Bremerhaben fief un in Ollenborg sünd dat opstunns söss Graad. Vundag kriegt wi vele Wulken. An de Küst könen de Wulken mal oplockern. In´t Binnenland könen en poor Drüppen vun baven kamen. Meisttiets blifft dat aver dröög. De Wind weiht en beten vun de west- bit noordwesten Kant. Dat Thermometer wiest söss bit acht Graad. In de Nacht kann man nich de Stern sehn, wiel överall Wulken sünd. Hier un dor kann dat Nevel or Spütterregen geven. De mehrste Tiet blifft dat man dröög bi dree bit fief Graad. Morn sünd överall dichte Wulken an´n Heven. Hier un dor kann dat Spütterregen geven. In´n Süüden vun Bremen kann dat in´n Verloop en poor Oplockerungen mit en beten Sünnschien geven. Söss bit acht Graad stahn denn op dat Thermometer.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.