Plattdeutsche Nachrichten Plattdüütsche Narichten vun'n 30. Juli 2024

Verfatensgericht verklaart Wahlrechtsreform to’n Deel för nich mit dat Grundgesetz vereenbor

Karlsroh: De Wahlrechtsreform vun de Ampel-Koalitschoon is tominnst in Delen nich mit dat Grundgesetz vereenbor. Dat geiht woll ut en Ordeel vun dat Bunnsverfatensgericht vör. Egentlich wullen se dat Ordeel eerst an’n Vörmiddag künnig maken, aver wegen en Malöör stünn dat al güstern Avend för korte Tiet op den Nettoptritt vun’t Gericht. Nipp un nau geiht dat üm de Grundmandatsklausel, de de Bunnsregeern in ehr Reform rutstreken hett. De Klausel seggt, datt Parteien ok in’t Parlament intrecken dröfft, wenn se de fief Perzent nich schafft hebbt, dorför aver dree Direktmandaten wunnen hebbt.

Düchtige Protesten gegen Wahlergebnis in Venezuela

Caracas: In Venezuela hebbt dusende vun Minschen gegen den offiziell fastleggten Wahlsieg vun Präsident Maduro protesteert. Dorbi sünd in de Hauptstadt Caracas Minschen mit Gewalt op de Sekerheitslüüd losgahn. In’t Fernsehen weer to sehn, wo Polizisten Tranengas insett un to’n Deel Demonstranten slaan hebbt. Schaten worrn is woll ok. Twee Minschen sünd woll dorbi dootbleven. De Oppositschoon smiet Maduro un de staatlichen Wahlbehöörd Bedregeree vör.

Oppositschoonsparteien geevt Misstroensandrag gegen Bremer Bildungssenatersche Stütt

Bremen: De Bremer FDP un Bündnis Düütschland geevt en Misstroensvotum gegen de Bildungssenatersche Aulepp Stütt. Dat hett tovör de CDU-Frakschoon in de Bremschen Börgerschaft fordert. Se will nu en Andrag op en Extra-Drapen vun de Börgerschaft stellen, üm över dat Afwählen vun Aulepp afstimmen to könen. An’n verleden Freedag hett de Bildungssenatersche den Huusholt för ehr Ressort sperrt. Besünners de wassen Tall vun Kinner in Kitas un Scholen sünd en Last för düssen Huusholt.

Bahnverkehr rund üm Bremen löppt wedder na Brandanslag

Bremen: Na den Brandanslag op de Bahnstreek Bremen – Hamborg schall de Togverkehr hüüt wedder na Plaan lopen. Na Utkunft vun de Bahn is de Schaden an’n Avend repareert worrn. Enkelte Töög köönt aver jümmers noch later as plaant kamen. Unbekannte Lüüd hebbt na Angaven vun de Polizei güstern fröh Leitungen an de Gleisanlagen bi‘n Bremer Börgerpark in Füer sett. Veele ICE-Verbindungen sünd utfullen. De Staatsschutz prüft, wat dor politische Grünnen achterstickt.

Greenpeace fangt mit Protestakschoon gegen plaante Eerdgasförderung vör Borkum an

Borkum: Aktivisten vun de Ümweltschutzorganisatschoon Greenpeace protesteert gegen dat plaante Eerdgasfördern in de Noordsee. Meist 20 Aktivisten hebbt na Utkunft vun dpa mit Slauchbööt vun Borkum afleggt un fohrt to de plaante Plattform-Bosteed vör de Wattenmeereilannen Borkum un Schiermonnikoog. Se wüllt woll dat Ankamen vun mehrere Scheep verhinnern, de Rohren un annere Bomaterialien levern schüllt. De nedderländsche Energiekonzern One-Dyas will dor Eerdgas fördern, aver Ümweltschutzverbännen un Inselbewahners sünd dorgegen.

Dat Weer

Un nu en Blick op dat Weer: In Bremen, Bremerhaben un Emmen 19, in Cuxhaben 20, un in Cloppenborg sünd dat opstünns 21 Graad. Hüüt schient faken de Sünn bi wenig Wulken. An’n Middag un Namiddag sünd af un an ok mal mehr lockere opstiegen Wulken to sehn. Liekers blifft dat fründlich un dröög bi 27 bet 30 Graad, an de Küst un op de Eilannen bi 23 bet 25 Graad. In de Nacht is dat mal klaar, mal licht wulkig, un dör de Bank dröög bi 18 bet 11 Graad. Morgen gifft dat ok wedder en Gemengsel ut veel Sünnschien un’n poor dünne oder lockere Wulken, un dat blifft dröög. Dorto Temperaturen vun 23 bet 28 Graad, an de Noordsee 20 bet 22 Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Marc Gelhart.