Plattdeutsche Nachrichten Plattdüütsche Narichten vun'n 31. Juli 2024

Hamas mellen Doot vun ehrn Anföhrer

Teheran. De Baas vun dat Hamas-Politibüro, Ismail Hanija, is doot. Dat hett de palästinensisch Terrororganisatschoon vermellt. He schall na ehr Angaven, bi en israelisch Angreep op sien Huus in de iranisch Hauptstadt Teheran to Dode kamen ween. Hanija schall to de Lüüd hörn, de achter den Överfall op Israel an´n sövten Oktober steken. Dorbi weern 1200 Minschen ümbrocht un binah 250 wiedere as Geiseln versleppt wurrn. De Hamas hett Israel al androht dat trüch to betahlen.

Düütsche in Belarus begnadigt

Minsk. De to´n Dood in Berlarus verordelte dartig Johr old Düütsche is begnadigt wurren. Dat schall de belaruss´sch Keerl, de dor dat Leit hett, Alexander Lukaschenko, sülvst anornt hebben. Dat Buten-Amt in Berlin hett middewiel vermellt, dat dat wohr is. Warrt seggt, de dartig Johr old Keerl ut Düütschland weer wegen Terrorismus un Spionaasch in´n Opdrag vun de Ukraine verurdeelt wurren.

Verscheden Reaktschonen in Debatt üm högere Kita-Gebühren in Bremen

Bremen. De Gedanken vun de Bildungsbehöörd de Kita-Gebühren womööglich na baven to setten, stött op verscheden Reaktschonen in de Lannsregerung. SPD un Gröne hollen so en Schritt för mööglich. De SPD-Fraktschoonsbaas vun Bremen Mustafa Güngör see, de Priesen sünd bannig lang desülvigen ween un nich hooch sett wurren. Dat gellt ok för de Gebühren för dat Middageten in Kinnergoorns. De Linksfraktschoon is mit den högeren Kita-Bidrääg nich inverstahn.

Protest vun Lüüd, de sik för de Ümwelt insetten, gegen nejet Gas-Bohrfeld in de Nordsee hollt an

Borkum. Op den planten Gas-Bohrfeld vun en nedderländisch Konzern in de Nordsee hollt de Protest vun Lüüd, de sik för de Ümwelt insetten, an. Greenpeace hett dor siet güstern Morgen en Protestcamp op dat Water inricht, dat ok in de verleden Nacht dörgahns besett weer. Dormit schall de Bo vun en Bohrplattform afwennt weern. De Waterschutzpolizei weer mit en poor Bööt vor Ort. Se hett bet nu man nich ingrepen.

Inkoopsladen-Daak in Ratzborg instört – Ursaak unkloor

Ratzborg. De Ursaak för den Tohoopfall vun en Daak in en Inkoopsladen is wieder unkloor. Twölf Minschen hebbt dorbi güstern in de schleswig-holsteenischen Lüttstadt süüdlich vun Lübeck wat afkregen. Tügen vermellen, dat sick de Tohoopfall vun dat Daak dör luutst Knacken ankünnigt harr. Kunnen un Mitarbeiters wurren dorophen vun den Marktbaas opfördert dat Huus bannig gau to verlaten. De Nootroop gung an´n laten Avend bi de Polizei in. Tosamen mit de Füerwehr weer se dorophen mit en Barg Lüüd vor Ort.

Dat Weer

Un nu noch en Blick op dat Weer: In Bremführ, in Bremen-Mitt un in Bremerhaben 20 un in Hooksiel sünd dat opstunns 19 Graad. Vundag lacht meist överall de Sünn vun´n Heven. In´n Verloop könen en poor dünne Wulken dorbi ween. De Wind weiht en beten. An de Waterkant weiht af Middag de Wind in Maten vun de Noorden Kant. Dat is för´n Sommer, as sik dat höört un blifft dröög bi 23 bi 29 Graad. In de Nacht kann man twüschen den Wulken jümmer wedder de Sterns funkeln sehn. Thein bit 13 Graad wiest dat Thermometer. Morn gifft dat en dröge Mengelaasch ut Sünnschien un Wulken. In´n Süüden vun Bremen umto kann viellicht Regen un Gewidder opdükern. De Temperaturen kladdern op 20 bit 25 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Markus Weise.