Plattdeutsche Nachrichten Plattdüütsche Narichten vun'n 01. August 2024

Neger Oosten: Weltsekerheitsraat röppt to Deeskalatschoon op

New York: De Sekerheitsraat vun de Vereenten Natschonen hett de Konfliktparteien in’n Negen Oosten to Deeskalatschoon opropen. UN-Generaalsekretäär Guterres säe, datt all Akschonen vermeden warrn mööt, de den heelen Negen Oosten in den Afgrund drieven. Dorachter stickt dat Doodmaken vun twee politischen Anföhrern vun de Hamas un de Hisbollah. De Iraan hollt Israel för schullig un hett dorüm al künnig maakt, datt se dat trüchbetahlen ward.

Bund un Länner fördert Problemscholen mit Geld in Milliardenhööchde

Berlin: Vun hüüt an löppt dat so nöömte Startchancen-Programm. Dormit schüllt bunnswiet Scholen in soziaal legen Lagen Stütt kriegen. Mit dat Geld köönt de Scholen to’n Bispill mehr Mitarbeiders instellen, Speelgeräten köpen oder Förderünnerricht anbeden. Bet to 20 Milliarden Euro nehmt Bund un Länner in de tokamen teihn Johr in de Hand. In’t Land Bremen kriggt 43 Scholen wat dorvun af, in Neddersassen meist 400.

Neddersassen: Vun hüüt an mehr Geld för veele Schoolmesters

Hannover: Vun hüüt an kriggt Grund-, Haupt un Realschoollehrers in Neddersassen jüst so veel Geld as Schoolmesters an Gymnasien. Dat sünd bi dat Grundgehalt meist 500 Euro mehr per Maand. Dormit sett de Landsregeern een vun ehr Wahlverspreken üm. De Beruf schall so wedder attraktiver warrn. Bavento wüllt SPD un de Grönen verhinnern, datt Schoolmesters in anner Bunnslänner afwannert, de beter betahlt.

Klimaaktivisten blockeert Flegerhaben Leipzig/Halle

Leipzig: Klimaaktivisten vun de letzten Generatschoon hebbt över mehrere Stünnen den Flegerhaben Leipzig/Halle blockeert. Fief Personen hebbt sik na Angaven vun de Polizei op de Start- un Lannebahnen an’n Bodden fastbackt. Se sünd fastnahmen worrn un staht nu wegen Huusfredensbruch un Ingrepen in den Flegerverkehr vör’t Brett. De Frachtflegeree is kort na Middernacht för meist dree Stünnen instellt worrn. Bi de Passageerflegers gifft dat siet hüüt Morgen aver woll keen Maleschen mehr.

Bunnswehr schütt wedder op dat Flach in’t Emsland na Moorbrand

Möppen: Meist söss Johr na dat Moorfüer in’t Emsland ward op dat Flach bi Möppen vun hüüt an wedder schaten. Verleden Week hett de Bunnswehr künnig maakt, datt dor Munitschoon för Leopard-2-Kampfpanzer test warrn schall. 2018 hett en Raketentest vun de Bunnswehr en Moorbrand över Weken utlöst. Sietdem is dor nich mehr schaten worrn. De Bunnswehr hett vun dor an na egen Angaven mehr as 15 Millionen Euro rinsteckt, ünner annern för Löschborns un nee’e Insatzfohrtügen.

Dat Weer

Un nu en Blick op dat Weer: In Bremerhaben 16, in Bremen un Emmen 17, op Borkum 18, un in Nienborg sünd dat opstünns 19 Graad. Hüüt schient blangen dünne un enkelte lockere opstiegen Wulken de Sünn. An’n Namiddag un Avend ward de Wulken vun’t Emsland her bilütten mehr un dichter, liekers gifft dat veel Sünnschien. In’t Ollenborger Münsterland kann dat an’n Avend villicht’n beten Regen geven. Meisttiets blifft dat aver dröög un fründlich bi 19 bet 21 Graad an de Küst un 22 bet 26 Graad in’t Binnenland. In de Nacht treckt mal mehr, mal weniger dichte Wulkenfeller dör, de hier un dor blots wenig Regen bringt. An de Noordsee blifft dat dröög bi 17 bet 16 Graad, 15 bet 13 Graad gifft dat in’t Binnenland. Morgen treckt de Regen gau na Süüdoosten över de Aller af. Darna gifft dat en fründlich un meisttiets dröög Gemengsel ut Sünnschien un’n poor dichte Wulkenfeller. Dorto Temperaturen vun 20 bet 25 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.