Plattdeutsche Nachrichten Plattdüütsche Narichten vun'n 18. Oktober 2024

Joe Biden seggt: „Goodbye, Düütschland“

Berlin: US-Präsident Joe Biden besöcht jüst Bunnspräsident Frank-Walter Steinmeier in’t Slott Bellevue. Dor kriggt he den hööchsten Orden, den Düütschland utgeven deit. Biden weer güstern Avend in Düütschland ankamen. Över Dag begrött em Bunnskanzler Olaf Scholz.

EU-Top-Drapen will gauer afschuven

Brüssel: Dat schall mööglich warrn, Lüüd, de ehr Andrag op Asyl aflehnt worrn is, gauer aftoschuven. Dor wüllt de EU-Staaten för sorgen. Dat hebbt de 27 Baaslüüd vun den Staaten un Regerungen güstern in Brüssel fastleggt. Tohopen hebbt se to Protokoll geven: Mit alle Kraft wüllt se de Butengrenzen vun de EU afsekern.

Netanjahu: Dat de Hamas-Baas doot is, „is de Anfang vun dat Enn" vun den Gaza-Krieg

Tel Aviv: De Baas vun Israels Regerung, Benjamin Netanjahu, hett anseggt: Dat se den Hamas-Baas Jihia al Sinwar dootmaakt hebbt, dat weer „de Anfang vun dat Enn“ vun den Gaza-Krieg. Dat weer en Landmark bi dat Tweihauen vun de Hamas. Israelsche Militärs hebbt künnig maakt: Suldaten hebbt den Hamas-Baas ehrgüstern in‘t süüdliche Gaza-Land dootmaakt.

Bremer Senat will noch nix to de Krankenhuusreform seggen

Bremen: De Senat hett noch nich fastleggt, woans he sik in den Bunnsraat to de Krankenhuusreform vun Bunnsgesundheitsminister Karl Lauterbach opstellen will. Ehr se dor wat to seggen köönt, mööt se eerstmal den Plaan dorför kriegen. Dor kunn een denn rutlesen, wat genau de Reform för de Krankenhüüs in’t Land Bremen bedüden deit. De Bremer Krankenhuusgesellschap hett bekriddelt: Ok mit de Reform kriegt de Kliniken veel to wenig Geld.

Bremer Freemarkt geiht los

Bremen: Vunnameddag geiht de 989. Freemarkt los. Düt Johr gellt strengere Sekerheits-Regeln. So sett se mehr Oppasskameras in, un Metzen mööt buten blieven. Besökers warrt an’n Ingang kuntrulleert. De Optakt vun den Freemarkt löppt anners as in de verleden Johren. Klock halvig 3 al ried twee Freemarkt-Botschafters op Peer un in histoorsche Kledaasch op den Bremer Marktplatz – utstaffeert as Roland, een vun jem as Kind.

Dat Weer

Un woans süht dat mit dat Weer umto ut? Opstunns hebbt wi in Bremen un Hüttenbusch 11 Graad, in Emm sünd dat 13 un in Bremerhaven 14 Graad. Vundaag: Eerst noch vele dichte Wulken, hier un dor daakig-gries, un in Oostfreesland kann dat ok wat pladdern. Achteran is dat aver dröög, un de Sunn waagt sik rut. Dat Thermometer krabbelt op 16 bet 20 Graad. De Wind dorto weiht flau vun de oosten bet süüdoosten Kant. Tokamen Nacht: Eerst blenkert noch de Steerns, man de Wulken kriegt de Bavenhand. Vun Süden schuuvt sik Regenwulken rin, un dor pladdert dat denn gegen Morgen ok. Bi 12 bet 9 Graad. Morgen treckt de Regen vun’t Mönsterland över dat hele Radio-Bremen-Land weg. An’n Namiddag warrt dat vun Süüdwesten her pö a pö dröger. Bi 14 bet 16 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Kuhnen.