Plattdeutsche Nachrichten Plattdüütsche Narichten vun'n 04. November 2024

Snack in een gefährlich Laag: Ampel

Berlin: In´t Kanzleramt hebbt sik an´t Avend Bunnskanzler Olaf Scholz un Minister för Finanzen Christian Lindner to een Snack in een gefährlich Laag um de Ampel dropen. Man wat dorbi rutsuert is is noch nich klar. Lindner hett mit sien Grundsatzpapeer för een Wirtschafts-Ümdreihn för spekuleren üm een Enn vun de Ampel-Koalition sorgt. He verlangt de Stüern to minnern, strieken vun Deenstleistungen un ok den Klimafohrplaan to verschuven. Gröne un SPD lehnt dat af. De Kanzler will in de kamen Daag mit Lindner un Wirtschaftsminister Robert Habeck snacken. Dat eerste Drepen is för hütt Avend plaant.

Verhanneln över een Koalitschoon in Brannenborg un Thüringen

Potsdam: In Brannenborg geiht dat hütt mit dat Verhanneln över een Koalitschoon los. De SPD vun Ministerpräsident Dietmar Woidke will mit dat Bündnis Sahra Wagenknecht regeeren. Noch in dütt Johr willt se den Koalitschoonsverdrag opstellen. In Thüringen leggt se hütt ok würklich los mit dat opstellen vun een Lannesregeerung. Se schall ut CDU, SPD un BSW bestahn.

Börgermeester-Smidt-Brüch is heel un deel afsparrt

Bremen: In de Binnenstadt is vun hütt an de Börgermeester-Smidt-Brüch, twischen Brill un Neestadt, heel un deel dicht. Mit 70 Johren is se de ollste Weserbrüch in Bremen. Un nu mööt man se nödig op Schick bringen. Rund 15.000 Autos un rund 750 Stratenbahnen un Bussen föhrt jeden Dag över de Brüch. För tominnst 4 Maanden warrt de Verkehr nu woanners lang schickt. De Bremer Stratenbahn AG hett för de Tied deels ok nee`e Linien inricht.

Extra-Drepen Kreisdag vunwegen Freesland-Krankenhüüs

Jever: De lege Finanzlaag vun de Freesland-Krankenhüüs is hütt Nomdag dat eenzige Thema op een Extra-Drepen vun den freeschen Kreisdag. All in dütt Johr hebbt de beiden kommunalen Krankenhüüs in Varrel un Sande Stütt kregen. Dat weren Kredite vun över 22 Millionen Euro. Kann angahn, dat dor in dütt Johr, vunwegen stiegende Kosten, noch mehr bi ruutsuert. Dat kann sien, dat man denn to´n Bispeel de Zentrale Noot-Opnahme in´t St. Johannes Hospital in Varel dicht maakt.

Wat rutkamen is: Bremer Freemarkt

Bremen: De Freemarkt is vorbi. Op de Börgerweid mööt se nu de Karussellen un Fohrgeschäften afboen. De Polizei un de Schausteller seggt, dat dat allens positiv aflopen is. Knapp twee Millionen Minschen hebbt na Angaven vun de Schaustellern in dütt Johr den Freemarkt besöökt. Ok de Polizei is tofreden. Man hett um de 400 Knieven ut`n Verkehr trocken. Dat wiest de Polizei, dat ehr Insatz för de Sekerheit grepen hett.

Dat Weer

Un nu een Blick op dat Weer: in Defhold 4, in Bremen un Ollenborg 7,un Bremerhaben sünd dat opstünns 9 Graad. Hütt is dat eerst noch to de Nordsee un de Elb hen gries mit Daak in de hoge Luft. Af un an kann dat mal so´n beten pieseln. Man vun´t Emsland bit to´t Osnabröger Land lööst sik de Nevel op un de Sünn kummt dör, bi 10 bit 12 Graad.  Tokamen Nacht hebbt wie deels dichte Wulken un hier un dor is Nevel mööglich, bi 8 bit 2 Graad. Morrn geiht dat wedder mit Daak in de hoge Luft los. To´n Middag hen lockert dat to dat Emsland hen op un de Sünn lacht us an. Blots in de Richt vun de Elb hebbt wi noch dichte Wulken, man dat blifft meist dröge. De Temperaturen liggt bi 8 bit 10 Graad. Middeweeken mööt wi wedder mit Nevel un Hochnevelfeller reken. Af un an schafft de Sünn dat mal dor dörtopielen, bi 8 bit 11 Graad. Dat weren de Narichten op Platt. Tohoopstellt hett se Birgit Sagemann. Trechtmaakt un vörleest vun Antje Kruppa.