Plattdeutsche Nachrichten Plattdüütsche Narichten vun'n 18. November 2024

Böverste vun de SPD stellt sik achter Scholz as Kanzlerkandidat

Berlin – Na Lars Klingbeil hett sik ok de tweete SPD-Vörsittersche Saskia Esken wedder achter Olaf Scholz as Kanzlerkandidat vun ehr Partei stellt. Dat Scholz sik to Wahl stellt, is een besluten Saak, sä Esken in’t ARD-Morrnmagazin. Daröver ward in’n Parteivörstand nich diskereert. Klingbeil harr ankünnigt, dat in de tokamen Daag de wietere Fohrplan för den Bunnesdagswahlkampf festleggt weern schall.

USA verlöövt Angrepen vun de Ukraine op Russland

Washington – US-Präsident Biden hett de Ukraine dat Insetten vun US-Wapen, de wieter weg reckt, verlöövt. So köönt se ok Steden deep in Russland drepen. De Regeln, de dat verboden hebbt, gellt nu nich mehr, heet dat in een paar Medien. Darna geiht dat darbi erst üm dat Verdeffenderen vun de westrussisch Region Kursk, de besett is.

G20-Drepen fangt in Brasilien an

Rio de Janeiro – In Brasilien fangt hüüt dat Topdrepen vun de G20 an. Mit darbi sünd de Staats-un Regeernbaas vun wichtig Industrie- un Swellenlännern as ok Vertreder vun de EU un de Afrikanisch Union. Se wüllt bi dat Drepen in Rio de Janeiro ünner annern över dat Gegenangahn gegen Hunger un Armot beraden. Buterdem diskereert se över een nee’en Dreih bi de Energie weltwiet. Se ward ok över de Kriege in de Ukraine un in’n Oosten Blangenbi snacken.

Mobile Polizeiwach an’n Hillmannplatz ward afboot

Bremen – De mobile Polizeiwach an’n Bremer Hillmannplatz wesselt op den Wiehnachtsmarkt. De blauen Container weern Anfang September an’n Hillmannplatz opstellt worrn, üm för mehr Sekerheit to sorgen. Of se darhen trüchkehren ward, will dat Binnenressort in’t Fröhjohr entscheden.

Sekerheitslüüd öövt Grootinsatt in’n Habentunnel

Bremerhaben – In de Seestadt hebbt rund 100 Hölperslüüd un Statisten to’n ersten Mal een Grootinsatt in’n Habentunnel öövt. Dat güng darüm, 20 Minschen in Fohrtüüg na een LKW-Brand ut den Tunnel vull mit Rook to holen. Na twee Stünnen weer dat Öven för dat Redden güstern ahn Problems to Enn gahn.

Dat Weer

Un nu een Blick op dat Weer: in Bremen, Bremerhaben un Deefholt 4 un op Wangerooge sünd dat opstunns 8 Graad. De Dag bringt hüüt mehr Wulken as Sünn un wieter dulle Regen- or Grisselgrusselschuers, verenkelt ok Grummelschuers. In’t südliche Binnenland blifft dat blangen Schuers ok mal länger dröög un de Sünn kann sik wiesen – bi 6 bit 8 Graad. Tokamen Nacht is dat erst noch locker wulkig un vör allens an de Küst gifft dat Schuers. Vun Westen treckt bold överall dicke Wulken op un dat kann orrig natt vun baben, mag ween ok mit Sneeregen. Dat Thermometer sackt op 4 bit 1 Graad. Morrn fallt bi een griesen Heben to’n Deel duller Regen, twüschen Oostfreesland un den Olen Land is ok Sneeregen or natter Sneefall mit darbi. An’n Morrn un Vörmiddag kann dat darbi glatte Straten geven. To’n Abend hen schuert dat denn blots noch, bi natt-kohlen 3 bit 6 Graad. Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.