Plattdeutsche Nachrichten Plattdüütsche Narichten vun'n 7. November 2024

Ampel-Koalitschoon twei

Berlin: De Ampel-Koalitschoon is na dree Johr twei. Bunnskanzler Olaf Scholz hett güstern Avend den Bunnspräsident anfraagt, he schall Finanzminister Christian Lindner ut sien Amt ruttolaten. Dorna hebbt de Ministers vun de FDP anseggt: Se maakt nich wieder. Blots Verkehrsminister Volker Wissing will an sien Amt fastholen un ut de FDP rutgahn. Scholz will nu bet to’t End vun’t Johr noch en Reeg Gesetzen dör den Bunnsdag bringen, he hofft, dat he vun CDU-Baas Friedrich Merz Stütt un Stöhn kriggt. Den 15. Januar will Scholz de Vertroensfraag stellen, achterna kann Düütschland nee wählen.

Union: Düütschland schall gau wählen

Berlin: De Unionsfrakschoon hett sik vunmorgen tohoopsett. En Reeg Unions-Politikers hebbt al seggt, nu müss gau wählt warrn. CSU-Baas Markus Söder hett verlangt: Scholz schull stantepe in den Bunnsdag de Vertroensfraag stellen. Dor weer keen Tiet för taktische Kneep. Sowat in de Oort weer ok ut de CDU un vun de FDP to hören.

Harris gifft to: Se hett US-Präsidentenwahl verloren

Washington: Een Dag na de Präsidentenwahl in de USA hett de Kandidaatsche vun de Demokraten, Kamala Harris, dat Woort an ehre Wählers richt. Se hett togeven, dat se verloren hett. Wat bi de Wahl rutkamen is, müss een annehmen, meen se. Harris, se is nu Viezpräsidentin, hett toseggt: De Macht warrt se an Larm un Arger an Donald Trump vun de Republikaners övergeven.

2024 is dat op de Eer woll mehr as 1,5 Graad warmer worrn

Reading: 2024 warrt woll dat eerste Johr, in dat de Temperaturen in’n Dörsnitt mehr as 1,5 Graad warmer sünd as vör de Industrialiserung. Dat hett de EU-Klima-Deenst Copernicus utrekent. Dat weer denn ok dat warmste Johr solang as se Daten opteken doot. Dat Pariser 1,5-Perzent-Mark, mit dat se gegen den Klimaschandaal anwüllt, is dormit aver noch nich vun’n Disch. Dorför mööt de Angaven vele Johr so blieven.

IG Metall Küst röppt op: Warnstreiks un Anspraken

Bremen: De Gewarkschap IG Metall röppt vundaag de Mitarbeiders vun vele Bedrieven in den Noordwesten to Warnstreiks op. So bi Mercedes, Airbus, de Lloyd Warft, man ok bi Siemens Gamesa. An enige Steden gaht de Lüüd ok op de Straat, as in Bremen un Bremerhaven. In Bremen löppt jüst en Marsch vun verscheden Sieden op de Karl-Carstens-Brügg to. Wat dor achter stickt: Maandag verhannelt se in Hamborg in de veerte Tarifrunn bi de Metall- un Elektroindustrie.

Dat Weer

Un woans süht dat mit dat Weer umto ut? Opstunns hebbt wi in Friesaythe 4 Graad, in Bremen un Bremerhaven sünd dat 5 un in Cuxhaven 6 Graad. Vundaag hangt depe Wulken an’n Heven. Mal um mal kummt ok Spütterregen daal. Dat Thermometer kummt nich över 5 bet 7 Graad rut. De Wind dorto weiht flau, later op de Inseln ok en beten mehr, vun de oosten Kant. Tokamen Nacht: Hogen Daak, de hier un dor ok en poor Druppen oder Spütterregen op us smitt. Dat kann ok mal dröög ween un en lütt beten oplockern. An‘n Morgen kann sik en beten Daak utbillen. Bi 6 bet 3 Graad. Morgen: jümmers noch depe Wulken, de ok Natts vun baven smiet. Ok mal dröög, un mag ween, dat sik sogoor de Sünn mal wiest. Dat Ganze bi 6 bet 8 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Irene Lottes.