Plattdeutsche Nachrichten Plattdüütsche Narichten vun'n 19. November 2024

G20 snackt över Kampf gegen Klimawannel

Rio de Janeiro: An’n tweten Dag vun dat G20-Topdrapen in Brasilien snackt de Staats- un Regerungsböversten över de Energiewenn un wo se gegen den Klimawannel angahn wüllt. An’n eersten Dag güstern hebbt se sik al op en Afslussverklaren enigt. De Länner wüllt sik dorin ok to dat internatschonale Ziel bekennen, datt dat Warmerwarrn op de Eer op 1,5 Graad in Schranken sett ward. Bavento wüllt se sik dorför insetten, datt de Superrieken mehr Stüern betahlen schüllt.

Ministerien maakt sik Sorgen wegen kaputte Datenkabel in Oostsee

Berlin: Dat düütsche un dat finnsche Butenministerium maakt sik Sorgen, denn twee Datenkabel in de Oostsee sünd twei. Dat geiht üm een Glasfaser-Kabel, dat vun Helsinki na Rostock geiht, un en twetes, dat twüschen Sweden un Litauen liggt. De beiden Ministerien wüllt nu afklären, wat düsse Verbindungen mit Afsicht twei maakt worrn sünd. En Speziaalschipp ut Frankriek is nu för de Reparatur ünnerwegens.

Bremer Ruumfohrtmess hett anfungen

Bremen: Wirtschaftssenatersche Kristina Vogt hett hüüt Vörmiddag de Ruumfohrtmess „Space Tech Expo“ op’n Weg bröcht. De Mess geiht över dree Daag un gellt as gröttste europääsche Fachmess vun düsse Oort. In de Bremer Mess un in’t Congress Centrum rekent se mit 700 Utstellers un meist 8.000 Gäst. Blangen Airbus, OHB un de ArianeGroup präsenteert dor ok veele lüttere Firmen un Tolieferers ut Bremen ehre nee’esten Projekten. De dreiht sik üm Raketendriefwarken, Satelliten oder Lüttraketen.

Börgerstiftung Bremerhaben övergifft Spennen

Bremerhaben: De Börgerstiftung Bremerhaben hett hüüt Morgen en Spenn vun 21.000 Euro för dat Projekt Schoolfröhstück övergeven. Dat Geld hett de Stiftung bi’n Börger-Brunch in’n August sammelt. Dat ward nu so an de 16 Grund- un twee Overscholen in Bremerhaben verdeelt, as dat nödig deiht.

Werder Bremen-Geschäftsjohr geiht mit Plus to Enn

Bremen: Werder Bremen hett in’t verleden Geschäftsjohr en Plus vun 2,2 Millionen Euro maakt. Dat hett de Vereen an’n Avend op de Versammeln vun de Liddmaten bekannt maakt. In’t Johr tovör hebbt se noch en Minus vun meist 4 Millionen Euro maakt. Datt dat nu beter lopen is, liggt na Utkunft vun Werder an de Transferinnahmen dör den Wessel vun Niklas Füllkrug to Borussia Dortmund un an dat Instiegen vun en regionaal Sponsorenmaatschaft in’n Januar.   

Dat Weer

Un nu en Blick op dat Weer: In Emmen 0, in Bremen 1, in Bremerhaben 2, un in Cuxhaben sünd dat opstünns 3 Graad. Hüüt fallt ut dichte Wulken to’n Deel degter Regen. Besünners in’t Binnenland is to’n Deel ok Sneeregen dorbi. Dat kann en poor Zentimeter Nattsnee geven. Vör allen an’n Middag kann dat ok glatt ween wegen Matsch. An’n Namiddag gifft dat Schuers, aver dat blifft denn ok mal för längere Tiet dröög. An de See kann dat korte Gewidder geven. Dat is natt-koolt bi 2 bet 5 Graad. In de Nacht gifft dat veele Wulken un vun de Noordsee her’n poor Regen-, Sneeregen- oder Grisselgrusselschuers. Ok Blitz un Dünnerslag sünd mööglich. In’t Binnenland fallt jümmer mehr Snee. Dat Thermometer sackt daal op 3 bet -1 Graad. Hier un dor kann dat glatt ween. Morgen gifft dat veele Wulken mit Regen-, Sneeregen- oder Grisselgrusselschuers, hier un dor ok korte Gewidder. De Sünn is meist gor nich to sehn. De Temperaturen liggt bi 3 bet 6 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.