Plattdeutsche Nachrichten Plattdüütsche Narichten vun'n 15. November 2024

Union will Düütschlandticket nu woll doch noch tostimmen

Berlin: Dat Düütschlandticket ward dat, so as dat utsüht, ok in’t tokamen Johr geven. Na Informatschonen vun dat ARD-Hauptstadtstudio wüllt CDU un CSU noch in dütt Johr afnicken, datt dat wieterlopen schall. Unions-Frakschoonsviez Lange säe, datt dat Geld, dat de Bund nich för den öffentlichen Verkehr vun dichtbi bruukt hett, al bi de Länders is. De schüllt dat Geld behollen un för de Billjetten utgeven. CSU-Baas Söder hett tovör noch dat Enn vun dat Düütschlandticket künnig maakt.

Grönen-Bunnsparteidag in Wiesbaden fangt an

Wiesbaden: De Grönen fangt hüüt mit ehren Bunnsparteidag över dree Daag an. Morgen wüllt se de nee’en Partei-Böversten wählen. De oolen Vörsitter Nouripour un Lang hebbt ehren Hoot nahmen, nadat de Partei mehrmals leeg bi Wahlen wegkamen is. För Sünndag schall denn Wirtschaftsminister Habeck as Toppkandidaat för de tokamen Bunnsdagswahl opstellt warrn. Habeck un Bunnsbutenministersche Baerbock wüllt sik hüüt mit Reden an de Afordneten wennen.

Football-Speel Frankriek gegen Israel wietgahns ahn Krawall

Paris: Dat Football-Länderspeel twüschen Frankriek un Israel is an’n Avend wietgahns ahn Krawallen aflopen – un ahn Toren. Na Angaven vun de franzöös’schen Polizei geev dat keen gröttere Vörkamen. Blots in de eersten Halftiet mossen de Ordners kort ingriepen, as de beiden Fangruppen opnanner losgahn sünd. Bi dat Speel hebbt se in’n Vörrut de Gefohr vun Oprohr groot taxeert. Grund dorför weern Krawalle vör een Week in Amsterdam. Dor sünd na Speelenn israeelsche Football-Fans vun Pro-Palästinenser to’n Deel böös attackeert un versehrt worrn.

Städer un Gemeenden in Neddersassen staht in de Kried

Hannover: De Städer un Gemeenden in Neddersassen hebbt so veel Schullen as noch nie. Na Angaven vun’n neddersäss’schen Landsreknungshoff staht de Gemeenden all tohoop mit üm un bi 15 Milliarden Euro in de Kried. Dat liggt vör allen an högere Tinsen. De sünd na Utkunft vun’n Landsreknungshoff toletzt düütlich üm meist 20 Perzent hoochgahn. De Reknungshoff will dorüm, datt dat Land Neddersassen de Gemeenden finanziell mehr ünner de Arms griepen schall.

Institut för nedderdüütsche Spraak in Bremen ward uttekent

Bremen: Dat Institut för nedderdüütsche Spraak kriggt hüüt Avend den plattdüütschen Literaturpries vun de Stadt Kappeln in Sleswig-Holsteen. Na Menen vun de Priesrichters hett dat Institut düssen Pries in Hööchde vun 3000 Euro för de grode Arbeit in dat Rebeet vun de plattdüütschen Literatur verdeent. In’n Bremer Schnoor ward siet 50 Johr een vun de gröttsten Sammlungen vun nedderdüütsche Böker opboet.    

Dat Weer

Un nu en Blick op dat Weer: In Deefholt 8, in Bremen un Leer 9, un in Bremerhaben sünd dat opstünns 10 Graad. Hüüt is dat meisttiets dicht wulkig, un dat lockert meist gor nich op. Besünners an de Noordsee kann dat hier un dor’n beten Spütterregen geven. Mehrstendeels blifft dat aver dröög bi 10 bet 12 Graad. In de Nacht is de Heven dicht wulkig mit hogen Daak, af un an lockert dat aver ok för korte Tiet op. Dat blifft meisttiets dröög bi 8 bet 6 Graad. Morgen is dat ok wedder dicht wulkig. An de See fallt vun Middag an’n beten Regen. In’t Binnenland blifft dat meisttiets dröög, un in’n Süüden vun Bremen kann dat an’n Morgen un Vörmiddag hier un dor mit’n beten Sünnschien oplockern. Dorto Temperaturen vun 9 bet 11 Graad. An’n Sünndag to’n gröttsten Deel dicht wulkig mit Regen för längere Tiet. Dorbi is dat pustig, an de See ok stöörmsch bi 8 bet 10 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.