Plattdeutsche Nachrichten Plattdüütsche Narichten vun'n 8. November 2024

Scholz kriggt Wind vun vörn

Berlin: In den Bunnsdag snackt se vundaag in en aktuelle Stunn över den Afloop-Plaan för de fröhe Bunnsdagswahl. Bunnskanzler Scholz will de Vertroensfraag eerst an’n 15. Januar stellen. Denn kunnen de Wahlen bet End März lopen. Nich blots de AfD, man ok de Union seggt aver: Dat is veel to laat. Eerst wenn de Vertroensfraag rut is, will de Union doröver snacken, wat se den een oder annern Plaan för Gesetzen noch mitdregen kann, meen CDU-Baas Friedrich Merz güstern Avend in de ARD.

EU-Top-Drapen to Wirtschaps-Wettstriet

Budapest: Wo Donald Trump US-Präsident warrn schall, snackt de Top-Lüüd vun de Staaten un Regerungen in de EU doröver, wat för en Kurs de Wirtschapspolitik stüern schall. Op’n Punkt heet dat: Woans köönt Unnernehmen ut Europa mehr Stütt kriegen in den Wettstriet mit Firmen ut China un de USA. Trump will 10 bet 20 Perzent mehr Toll för Woren ut Europa ansetten. Dat kunn vör allen för de düütsche Autoindustrie un de ehre Toleverers stuur warrn.

Krawall in Amsterdam – Netanjahu schickt Fleger

Amsterdam: Na dat Footballspeel in de Europaleague twüschen Ajax Amsterdam un Maccabi Tel Aviv ut Israel hett dat Krawall geven. Medien vermellt: Demonstranten för Palästina hebbt Maccabi-Fans mit Stöhl angrepen. De Regerung vun Israel hett twee Fleger na de Nedderlannen schickt, dat se jemehr Lüüd vun dor utflegen köönt. Ok de düütsche Botschafter in Israel, Steffen Seibert, weer verbaast. Wenn Footballfans jaagt un vertagelt warrt, denn weer dat keen Akschoon gegen den Krieg. Dat weer nix as kriminell un nich to’n Uthollen.

Denken an Riekspogromnacht

Bremen: Liddmaten vun de Breemsche Börgerschap un den Senaat kaamt Klock 11 vör dat Landherrnamt in den Schnoor tohoop. Dor wüllt se an de Minschen trüchdenken, de ünner de Riekspogromnacht leden hebbt. De Reed hollt Anastassia Pletoukhina, se is Baas vun de „Jewish Agency for Israel“ in Düütschland. Ok in Bremerhaven kaamt an’n Namiddag Lüüd an den Gedenksteen för de Ole Synagoog tohoop. In de Nacht vun den 9. op den 10. November 1938 hebbt de Nazis överall in Düütschland Jöden dootmaaakt, Synagogen tweislaan un Ladengeschäften utplünnert.

Bahnhoff Ollenborg: All Lüüd müssen rut

Ollenborg: De Polizei hett güstern Avend den Hauptbahnhoff un den Busbahnhoff blangenan evakueert. Dat harr Henwiesen op Gefohren geven. Bahnen kunnen dorum nich affohren, Lüüd müssen sik utwiesen. Dor hebbt se nix bi funnen, un dorum hebbt se den Bahnhoff na annerthalf Stunnen wedder freegeven.

Dat Weer

Un woans süht dat mit dat Weer umto ut? Opstunns hebbt wi in Cloppenborg 4 Graad, in Bremen un Rotenborg sünd dat 5 un in Bremerhaven 6 Graad. Vundaag hangt jümmers noch depe Wulken an’n Heven. Hier oder dor smiet se en poor Druppen oder Spütterregen op us daal. Ok mal dröög, un mag ween, dat sik sogoor de Sunn mal wiest. Dat Thermometer krabbelt op 6 bet 8 Graad. De Wind dorto weiht flau oder en beten mehr vun de oosten bet süüdoosten Kant, an de See ok frisch un mit Böen. Tokamen Nacht pieselt dat geern mal ut en dichte Wulkendeek. Bi 7 bet 4 Graad. Morgen: jümmers noch hogen Daak. Dat is diesig gries, un smuddeln kann dat ok. Över Dag lockert dat vun Süden her wat op, un dor kriegt wi denn ok mal de Sunn to sehn. Dat Ganze bi 7 bet 9 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Birgit Sagemann.