Plattdeutsche Nachrichten Plattdüütsche Narichten vun'n 13. November 2024

Bunnsregerung drapt sick to´n eersten Mal siet Ampel-Ut

Berlin. To´n eersten Mal siet dat Ampel-Ut sitt dat Bunnskabinett glieks tosamen. Na dat Utscheden vun de FDP hören blots noch Ministerschen un Ministers vun SPD un Gröne, as ok de Verkehrsminister Volker Wissing, de keen Partei tohöört, to de Kring üm Kanzler Olaf Scholz. Dat geiht ünner annern üm den Regerungsbericht to den Verloop op dat Land. De Bericht warrt al veer Johr schreven. Bavento will Gesundheitsminister Karl Lauterbach en Vörslag inbringen, mit de viellicht Lachgas as Partydroge gau verboden weern kann.

Dobrindt bremst Höpen op Tosamenarbeit mit de Bunnsregerung

Berlin. CSU-Lannskringbaas Alexander Dobrindt hett dat Höpen op en Ümsetten vun utstahn Regerungsprojekten bremst. „Wi warrt nich de rünnerfallen Schutt vun en fehlslaan Ampel opfangen“, see Dobrindt in dat gemensame Morgenmagazin vun ARD un ZDF. De Unionsparteien wüllt blots bi Projekten mit de Regerung tosamenarbeiten, de würklich nödig sünd. De Top-Lüüd in de Fraktschoon vun SPD un den Unionsparteien sünd güstern op en Fohrplan för Neewahlen övereens kamen. De schüllt nu an 23. Februar ween.

Biraden in Bremen kriegen mehr Recht to´n mitsnacken

Bremen. De Biraden kriegen mehr Mööglichkeiten mittosnacken. De Stadtbörgerschaft hett en Gesetzännerung dorför afnickt. Dorna könen de Stadtteilparlamente in Tokunft direktemang Andräg an de Börgerschaft richten. Dorto mutt de Biradenkonferenz, in de de Sprekers vun all 22 Biraden vertreden sünd, düsse Andräg mit Tweedrüttelmehrheit besluten. Warrt en Andrag denn in de Stadtbörgerschaft behannelt, hett en Biraadsvertreder dorto Snackrecht.     

Landgericht verhannelt wieder över Millionendeveree

Bremen. Vör dat Landgericht warrt vundag mit den Perzess üm en Millionen-Deveree wiedermakt. De Anklagte – en hüüt 32 Johr old Fro ut Bremen – hett bi den Perzessoptakt güstern al togeven, as Mitarbeidersche vun en Geldtransportünnernehmen in´n Mai 2021 mehr as acht Millionen Euro klaut to hebben. Ok harr se möögliche Lüüd, de dor mitmakt hett, benömen. An´n tweeten Perzessdag schüllt vundag ünner annern twee Mitarbeiter vun dat Geldtransporter-Ünnernehmen as Tügen utseggen.

Pleghuus för Demenzkranke drauht dat Dichtmaken

Wils. En Pleeghuus för Demenzkranke in´n Landkreis Rodenborg drauht dat Dichtmaken. Grund is, dat dat Land Neddersassen noch in düsse Week thein kolumbianisch Pleegkräft afschuven will, wiel de ehr Asylandrääg aflehnt wurr. De thein maken een Drüttel vun dat Pleegpersonal in dat „Huus Wils“ ut. Dat schrifft dat Pleegheim in en apen Breef, de an Lanns- un Bunnspolitiker gung. In dat Huus werdt 48 demente Lüüd pleegt.

Dat Weer

Un nu noch en Blick op dat Weer: In Ollenborg un in Bremen-Mitt söven, in Bremerhaben acht un in Meppen sünd dat opstunns söss Graad. Vundag fangt dat mit Wulken an. Hier un dor is dat diesig mit Nevel. An´n de Küst kann dat Natt vun Baven kamen. Bit to´n Namiddag mutt ok vun de Elv över de Lümborger Heid bit to´n Ollenborger Münsterland mit Regen rekend weern. Blots in Richt Emsland blifft dat dröög. De Wind weiht en beten vun de westen Kant. Dat Thermometer wiest acht bit twölf Graad. In de Nacht treckt de Regen in Richt Aller un Ossenbrügger Land af. In´t Binnenland billt sick hier un dor Nevel. De Temperaturen liggen bi söven bit thein Graad. Morn blifft de Heven meist vull mit Wulken. An´n Anfang is dat gries un diesig. Af un an kann dat Spütterregen geven. Hier un dor könen de Wulken kort oplockern un de Sünn kiekt en beten dör. Dat Thermometer wiest thein bit twölf Graad.

 Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.