Plattdeutsche Nachrichten Plattdüütsche Narichten vun'n 11. November 2024

Scholz: Vertroensfraag villicht noch vör Wiehnachten

Berlin: Bunnskanzler Scholz kann sik vörstellen, noch in dütt Johr de Vertroensfraag to stellen. Dat hett de SPD-Politiker in de ARD-Sendung „Caren Miosga“ seggt. Scholz säe, datt he nich an sien Amt kleevt, un wenn de Grundlaag dor is, hett he dormit ok keen Problem. Vörher mutt sik aver na sien Menen de SPD-Frakschoonsbaas Mützenich mit den CDU-Oppositschoonsföhrer Merz enig warrn, wecke plaanten Gesetzen noch vör de Neewahlen ümsett warrn köönt.

Trump telefoneert wegen Ukraine-Krieg mit Putin un Scholz

Palm Beach: De tokamen US-Präsident Trump hett na Utkunft vun Medienberichten mit Russlands Präsident Putin telefoneert. Dorbi hett Trump Putin woll opfordert, den Krieg in de Ukraine nich leger warrn to laten. He hett dorbi ok op dat US-Militär in Europa henwiest. Ok Bunnskanzler Scholz hett na Angaven vun en Regerungsspreker mit Trump snackt. Se hebbt sik dorop enigt, op en gemeensamen Freden in Europa hentostüern.

UN-Klimakonferenz in Aserbaidschan fangt an

Baku: In de Hauptstadt vun Aserbaidschan fangt hüüt de 29. Klimakonferenz vun de Vereenten Natschonen an. Ölben Daag lang wüllt de Afordneten ut meist 200 Länner doröver snacken, wat een dorgegen maken kann, datt dat op de Eer jümmers warmer ward. Dorbi geiht dat ok üm de Fraag, wo armere Staaten bi’n Kampf gegen den Klimawandel un sien Folgen mehr Stütt un Stöhn kriegen köönt. Fachlüüd gaht dorvun ut, datt dütt Johr dat heetste ward, sietdat dat optekent ward.

Bremer Utbildungsplatzafgaav vör Staatsgerichtshoff

Bremen: De Utbildungsplatzafgaav för Ünnernehmen in’t Land Bremen ward siet hüüt Vörmiddag vör den Bremschen Staatsgerichtshoff verhannelt. Na Menen vun de Wirtschaft is dat Gesetz gegen de Verfaten. De Klagers tellt opstünns vör Gericht noch mal de Argumenten op. Vun tokamen Johr an schüllt Bedrieven in Bremen un Bremerhaben en Ümlaag betahlen. Wokeen utbillt, kriggt denn Geld ut den Pott trüch. So will de Bremer Landsregeern de Tall vun Lehrlingen hoochbringen.

Football-Bunnsliga: Wolfsborg winnt gegen Heidenheim

Wolfsborg: De VfL Wolfsborg hett an’n Avend in Heidenheim mit 3 to 1 wunnen un stiggt dormit in de Tabell op Platz 12. Stuttgart hett gegen Frankfort mit 2 to 3 verloren, un Augsborg un Hoffenheim sünd 0 to 0 utnannergahn. Werder Bremen steiht na den teihnten Speeldag op Platz 8.

Dat Weer

Un nu en Blick op dat Weer: In Bremen un Nienborg 8, in Bremerhaben un Leer 9, un op Borkum sünd dat opstünns 11 Graad. Hüüt treckt vun’n Westen un vun de See her Regen op, de sik över dat heele Sendegebiet utbreedt. Darna lockert de Wulken to’n Deel op, to’n Deel kummt noch wietere Schuers na. Dorbi kann dat ok enkelte korte Gewidder geven bi 9 bet 11 Graad. In de Nacht treckt noch’n poor Schuers na dat Ollenborger Münsterland af, de Wulkendeek blifft aver meisttiets dicht. Hier un dor kann dat ok Daak geven. De Temperaturen fallt op 9 bet 5 Graad. Morgen gifft dat wedder dichte Wulken, hier un dor riet de aver ok op un laat de Sünn dör. Dat gifft blots wenig Schuers mit wenig Druppen un för korte Tiet. Meisttiets blifft dat dröög bi 8 bet 10 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.