Plattdeutsche Nachrichten Plattdüütsche Narichten vun'n 6. November 2024

Trump op Groot-Trüchkamen-Kurs in´t Witte Huus

Washington. De Präsidentschaftskandidat vun de Republikaner, Donald Trump, hett künnigt makt, dat he de Winner vun de Wahl weer. Sien Partei hett en politisch Sieg schafft, as em de USA noch nienich sehn hett, see Trump vör Anhängers in den Bunnstaat Florida. So richtig is de Sieg vun Trump noch nich, aver veel wiest dorop hen. As en poor US-Medien vermellen, hett de Republikaner dree vun söven Swing States för sick wunnen. Dat weern: North Carolina, Georgia un Pennsylvania. Ok in Wisconsin warrt em en Sieg vörutseggt.

Krisen-Drapen in´t Kanzeleramt to de Tokunft vun de Ampel

Berlin. Wichtige Politikers vun de Ampel-Koalitschon drapt sick wedder to en Snack wegen de Maleschen in de Koalitschon in dat Kanzleramt. Bi dat Drapen vun den Koalitschonsutschuss wüllt se doröver kloor warrn, of dat noch en Grundlaag för en Tosamenarbeit gifft. Strietpunkten sünd vör allen de Wirtschaftspolitik un de Huushold för dat tokamen Johr. Vörher wüllt Bunnskanzler Olaf Scholz, Finanzminister Christian Linder un Wirtschaftsminister Robert Habeck versöken, op en gemensame Vörlaag för dat Drapen övereens to kamen.

Afthekers gaht in Hannover op de Straat

Hannover. In Neddersassen wüllt de Afthekers an´n Middag in Hannover op de Straat gahn. As Grünn för den Protest nööm de Verband Insporens vun de Bunnsregerung tolasten vun de Aftheken un de Afthekenhonororen, de siet Johren nich mehr anstiegen sünd, ok wenn de Kosten bannig stark hooch gahn weern. Bavento sünd de Aftheken dormit konfronteert, dat Druppen un Pillen knapp sünd un dat se bannig veel mit Papeerkraam to doon hebbt.

Küllbus hett nejen Steed

Bremen. De Küllbus vun de Johanniter in Bremen hett en neje Steed. Vun hüüt an warrt he jümmer middewekens üm Klock söven an´n Avend vör dat Konsul-Hackfeld-Huus in de Bahnhoffsvörstadt Dacklose un Lüüd, de dat nödig hebbt, ünner annern mit warmet Eten un Kledaschen versorgen. Över Johren stunn de Bus op den Vörplatz vun den Hauptbahnhoff in Bremen. Dat wurr denn vun de Behörden ut Sekerheitsgrünnen verboden. Bavento föhrt de Bus jeden Sünndag den Hohentorspark in de Neestadt un de Friedrich-Rauers-Straat in de Neegde vun den Hauptbahnhoff an.

Fachdag gegen Femizid in Bremerhaben

Bremerhaben. In Bremerhaben drapen sick in Ogenblick üm un bi achtig Fachlüüd, üm över en beteren Schutz vun Froens vör Gewalt un Femiziden to snacken. En Femizid is dat Dootmaken vun Froens dör Mannslüüd, de nöög to se stunnen. Alleen in dat Rebeet Gewalt in de Partnerschop hett de Polizei in Bremerhaben in dat verleden Johr 674 Fallen optekend. Dat sünd duppelt so veel as 2018.

Dat Weer

Un nu noch en Blick op dat Weer: In Emmen un in Bremen-Mitt fief un in Bremerhaben un in Hooksiel sünd dat opstunns söss Graad. Vundag gifft dat den ganzen Dag Nevelfeller. Dat is dröög, man hier un dor sünd Drüppen or en beten Spütterregen möglich. De Wind weiht en beten ut all Richten. De Temperaturen liggen bi veer bit acht Graad. In de Nacht sünd överall Nevelfeller. Hier un dor könen de en poor Drüppen or Spütterregen bringen. Dat gifft aver ok dröge Afsnidden. Dat Thermometer wiest veer bit söven Graad. Morn is dat överall gries. Ut de deep hangen Wulken kann dat af un an Spütterregen geven. Man allgemeen blifft dat dröög bi fief bit acht Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Markus Weise.