Plattdeutsche Nachrichten Plattdüütsche Narichten vun'n 12. November 2024

Se hollt Raat över Termin för Neewahlen

Berlin – Opstunns hollt de Wahlpröfungsutschuss vun’n Bunnesdag Raat över den Termin för de vörtrocken Bunnesdagswahl. Bunneswahlböverste Brand harr güstern nochmal vermellt, dat se dargegen is, dat to fröh wählt ward. De Oppositschon un vör allens de CDU smiet ehr vör, dat se sik vun Bunneskanzler Scholz vör’n Karren spannen lett. Brand wiest dat trüch.

Junger Mann ünner Terrorverdacht faatnahmen

Elmshoorn – In de Stadt in Sleswig-Holstein hebbt Ermiddler een jungen Mann ünner Terrorverdacht faatnahmen. De 17-Jöhrige schall ut islamistischen Grünnen een Anslag plaant hebben. Siet Donnerdag is he all in Ünnersökenshaft. He wull för den Anslag woll een Lastwagen bruken. Mehr ward later an’n Dag darto vermellt.

Bunnesverfatengericht verhannelt över Solidaritätstoslag

Karlsroh – Dat Bunnesverfatengericht verhannelt just över de Tokunft vun’n Solidaritätstoslag. Een paar Afordnete vun de FDP harrn klaagt un wüllt dat henkregen, dat de Toslag ok för Ünnernehmen un Lüüd, de goot verdeent, wegfallt. Egens schull de Soli för den Opboo Oost na de Dütsche Einheit bruukt weern. Middewiel is de Stüer för de mehrsten Minschen afschafft worrn. Mit een Urdeel rekent se vundag noch nich.

Staatsböverste reist to Weltklimakunferenz

Baku – An’n tweeten Dag vun de Weltklimakunferenz reist vundaag dutzende Staats-un Regeernböverste an. Bunneskanzler Scholz haar sien plaante Reis afseggt, wiel de Regeern in Legerwall kamen is. De Littmaten hebbt sik all op Grundregeln för den Hannel weltwiet mit Emischonen eenigt. Statt Kohlendioxid intosporn, schall dat mögelk sein, as Utgliek Klimaschutzprojekte to ünnerstützen or Bööm to planten.

Millionen-Deefsche ut Bremen vör Gericht

Bremen – Na een Millionenklau bi een Geldtransportfirma fangt vundaag vör dat Landgericht de Perzess gegen de Hauptanklaagte an. De Froo schall 2021 över acht Millionen Euro in een Rullcontainer ut de Firma rutschafft hebben. Achterna is se in de Türkei flücht. In’n März düssen Johrs hett sik de hüüt 32-Jöhrige den Behörden stellt, dat Geld bleev aver verswunnen. Se rekent mit dat Urdeel Midde Januar.

Dat Weer

Un nu een Blick op dat Weer: in Deefholt 7, in Bremen un Bremerhaben 8 un op Wangerooge sünd dat opstunns 9 Graad. Vundaag sünd meist vele Wulken an’n Heben, de aver ok mal oprieten köönt un de Sünn kiekt kort rut. Een paar Schuers sünd noch an’n Vörmiddag ünnerwegens, man meist is dat dröög bi 8 bit 10 Graad. Tokamen Nacht treckt jümmer wedder dicke Wulken vun de Nordsee her op, man de bringt meist keen Regen. In de Morrnstünnen köönt aver twüschen Oostfreesland un dat Cuxland af un an een paar Druppen fallen. Dat Thermometer sackt op 9 bit 8 Graad op de Eilanden un 5 bit 4 Graad in’t Binnenland. Morrn kann dat bi griesen Heben un dicken Wulken jümmer wedder natt vun baben kamen, Richt Emsland blifft dat eher dröög – bi 9 bit 12 Graad. Dat weern de Narichten op Platt. Michael Kück hett se tohoopstellt. Op platt trechtmaakt un vörleest hett se Heidi Jürgens.