Plattdeutsche Nachrichten Plattdüütsche Narichten vun'n 05. November 2024

Eerste Wahllokalen in de USA maakt glieks op

Washington: Na en Wahlkampf mit veel Hen un Her ward hüüt in de USA wählt. De Demokratsche Kamala Harris will de eerste Präsidentsche vun’t Land warrn. De Republikaner Donald Trump will wedder in’t Witte Huus trüch. De mehrsten Wahllokalen maakt Klock 12 na düütsche Tiet op. In‘n poor lüttere Bezirken löppt de Wahl al.

Habeck snackt vun leege Tiet för en Fehlslag vun de Koalitschoon

Berlin: In’n Striet vun de Ampel-Koalitschoon um de Wirtschafts- un Huushooltspolitik schall dat hüüt wietere Krisendrapen geven. Bunnskanzler Scholz will noch mal mit Wirtschaftsminister Habeck un Finanzminister Lindner tosamenkamen. Habeck hett tovör vör en Fehlslag vun de Regeern wohrschaut. Russland is op’n Vörmarsch in de Ukraine, de US-Wahl steiht an, un för de Wirtschaft löppt dat ok nich goot. Dat is na sien Menen de leegste Tiet för so en Fehlslag.

Jedet twete Afschuven slumpt nich

Berlin: In Düütschland is mehr as jedet twete plaante Afschuven in dütt Johr fehlslaan. As de „Nee’e Ossenbrügger Zeitung“ vermellt, hebbt Polizisten vun Januar bet September bi meist 62 Perzent vun all de Fallen dat plaante Afschuven nich to Enn bringen kunnt. Dat hett verscheden Grünnen: de Lüüd hebbt sik verstekt, Gerichte hebbt dat Afschuven verbaden oder de Floog kunn nich stattfinnen.

Wietere Bremer Pleeghüüs drauht de Insolvenz

Bremen: Dat Gesundheitsressort wohrschaut vör wietere Insolvenzen bi Pleeghüüs. An’n Namiddag will Gesundheitssenatersche Bernhard in de Deputatschoon doröver Bericht geven. Besünners de högeren Utgaven, Lohnkosten un Hüern sünd Grünnen dorvör. Dorbi fallt ok op, datt in de verleden twee Johr meisttiets private Pleeghüüs bankrott gahn sünd. Dor geev dat ok mehr Klagen un Maleschen as bi gemeennützigen Inrichtungen.

Autofohrers in Bremen-Noord bruukt nochmal starke Nerven

Bremen: Autofohrers in Bremen-Noord mööt morgen mit wietere Maleschen reken, wenn se in de Binnenstadt oder trüch wüllt. An de Op- un Affohrt vun de Autobahn 27 ward morgen in beide Richtungen de rechte Fohrbahn för en poor Stünnen sperrt. De Boarbeiden ward aver woll an’n Freedagavend un so en poor Daag fröher fardig as plaant.

Dat Weer

Un nu en Blick op dat Weer: In Möppen 5, in Emmen un Nienborg 6, in Bremen un Bremerhaben 7, un in Dörveern sünd dat opstünns 8 Graad. Hüüt is dat eerst gries wegen Daak un hogen Daak. An’n Vörmiddag lockert dat eerst in’t Emsland mit Sünnschien op. Middags un namiddags lockert de Wulken vun’t Emsland un Oostfreesland över dat Ollenborger Münsterland bet to dat Ossenbrügger Land op un de Sünn kummt dör. Wieldess blifft dat an de Elv wulkig. Meisttiets blifft dat dröög bi 9 bet 11 Graad. In de Nacht breedt sik vun de Elv un Noordsee her Feller mit Daak un hogen Daak ut. Dat blifft meisttiets dröög bi 7 bet -1 Graad. Morgen hollt sik den heelen Dag dichte Feller mit Daak un hogen Daak. De Sünn is meist gor nich to sehn. Tominnst blifft dat meisttiets dröög, blots hier un dor kann dat’n poor Druppen oder lichten Spütterregen geven bi 3 bet 7 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.