Plattdeutsche Nachrichten Plattdüütsche Narichten vun'n 21. November 2024

Tokunft vun dat Bremer Stahlwark

Bremen: De Gewarkschap IG Metall un de Bedrievsraat vun dat Stahlwark ArcelorMittal sünd bang, dat Bremer Wark kunn eerstmal nich op Stahl umstellt warrn, de dat Klima nich schaden deit. De IG Metall seggt: De Bremer Bedrievsraat hett vun Kollegen in Belgien to weten kregen: Dat Unnernehmen hett fastleggt, in Europa kriegt blots dree Stahlwarken en Elektro-Lichtbagen-Aven, de för grönen Stahl nödig is – un Bremen weer nich dorbi. Butenunbinnen hett nafraagt, un ArcelorMittal hett seggt: Fastleggt is noch nix. Börgermester Andreas Bovenschulte hett vun den Kunzern verlangt, se schullen kloren Kurs stüern un gau anseggen, dat se de nödigen Anlagen in Bremen boot.

VW: 3. Runn bi’t Uthanneln vun den Tarifen

Wolfsborg: Bi Volkswagen sett sik Arbeitgevers un Gewarkschap glieks to de drüdde Tarifrunn an een Disch. Snacken wüllt se ok över en Vörslag vun de IG Metall un den Bedrievsraat, dat se för weniger Arbeitskosten kene Lüüd vör de Döör setten mööt. In dat Papeer steiht: Wat bi de Tarifen as mehr Geld uthannelt warrt, schall nich utbetahlt warrn, man dormit schüllt de Arbeitstieden körter warrn. Bet nu will VW aver nich mehr betahlen, dorför aver 10 Perzent vun den Lohn wegstrieken. Opstunns sünd enige dusend VW-Lüüd gegen dat, wat de Böversten vun den Kunzern vörhebbt, op de Straat.

Frakschonen in dat EU-Parlament bi de Kommissare enig

Brüssel: De Top-Lüüd vun de Frakschonen in dat EU-Parlament sünd sik enig doröver worrn, wokeen in de EU-Kommischoon sitten schall. Över Weken weren se in de Saak nich wiederkamen. Vele weren vör allen gegen den Italiener Raffaele Fitto vun de postfaschistische Partei „Fratelli d’Italia“. He schall en Amt as Vizepräsident kriegen. Tokamen Week mutt dat Parlament dor noch ja to seggen. Dor steiht aver nix in’n Weg. So kunn de ne’e EU-Kommischoon unner dat Leit vun Ursula von der Leyen Anfang Dezember an de Arbeit gahn.

Neddersassen: Weniger Geld wegen Zensus

Hannover: Neddersassen mutt in de tokamen Johren mit weniger Geld kloorkamen. Wat dor achter stickt: För de Stüern, de vun den Bund kaamt, gellt nu de ne’e Zensus. Dor weer bi rutkamen: in Neddersassen wahnt weniger Minschen as se dacht hebbt. Dat Finanzministerium seggt: Düt Johr rekent se mit 140 Millionen Euro weniger an Umsatzstüer un ut den Länner-Finanzutgliek. Bremen kriggt dorgegen mehr Geld. Hier wahnt mehr Minschen as se vörher annahmen harrn.

Bunnskulturpries för Sendesaal un Lila Eule in Bremen

Bremen: De Sendesaal un de Club „Lila Eule“ kriegt den Applaus-Award as „Beste lütte Speelsteed“. Dat gifft 10.000 Euro vun den Bund för jeden. Mit dat Geld schüllt se dat Programm un den Bedriev wiederentwickeln. De Bunnskulturpries Applaus-Award stellt Steden för Livemusik un de ehr Rull för de Kultur un dat Mit’nanner vun de Minschen rut.

Dat Weer

Un woans süht dat mit dat Weer umto ut? Opstunns hebbt wi in Bremen, Cloppenborg un Hüttenbusch 1 Graad, in Bremerhaven sünd dat 2 Graad. Vundaag treckt mal um mal dichte Wulken dör. Vör allen an de Küst smiet de Schuer mit Regen, Sneeregen oder Grisselgrussel op us daal. Wiet na Süden löppt dat aver nich. Dat Thermometer krabbelt op 3 bet 5 Graad. De Wind dorto weiht in Maten oder en beten mehr un mit deegte Böen vun de süüdwesten Kant, an de See dreiht he mehr op West bet Noordwest, ok mit deegte Böen. Tokamen Nacht: Mal mehr, mal weniger Wulken, hier un dor ok mit Sneeregen oder Snee, an de See ok Regen. Bi 2 Graad över bet 2 Graad unner 0. Morgen: Jümmers noch vun allens wat: Wulken, Sunnschien, dorto Regen, Sneeregen, Snee un Grisselgrussel. Un dat treckt över Dag ok na Süden to. Dat Ganze bi 3 bet 6 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.