Plattdeutsche Nachrichten Plattdüütsche Narichten vun'n 22. November 2024

Bunnsraat stimmt af: Krankenhuusreform ja oder nee

Berlin: De Bunnsraat stimmt över de Krankenhuusreform af. Mag ween un se schickt de Saak in den Vermittlungs-Utschuss. Dat kunn heten: Dat duert wat länger, oder dor warrt gor nix vun. Bremens Börgermester Andreas Bovenschulte hett vunmorgen anseggt, he stimmt nich dorför, de Reform in den Vermittlungs-Utschuss to schicken. Bremen weer dorför, de Reform so gau as dat geiht in Gang to setten. Denn so kunn dat Geld för de Krankenhüüs beter afsekert warrn.

De SPD un ehr Kanzlerkandidaat

Berlin: SPD-Parteibaas Lars Klingbeil hett op en Kommunalkunferenz seggt: Dat is goot, dat Olaf Scholz Kanzlerkandidaat warrt. As Kanzler harr Scholz in de verleden dree Johr gode Arbeit aflevert. Un dat in lege Tieden. Ok wenn Scholz bi Umfragen nich goot wegkummt, weer Klingbeil toversichtlich. Dat is al faken so ween, dat de SPD hett trüchlegen un an’t Enn denn doch noch goot rutkamen is.

Bremerhaven: Nee Terminal för Krüüzfohrers

Bremerhaven: Dree Johr hebbt se dor an boot – glieks geiht de ne’e Columbuskaje an dat Terminal för Krüüzfohrers in Deenst. 80 Millionen Euro hett dat Land dorför in de Hand nahmen. De Havengesellschap Bremenports seggt: In de verleden Johren weer dat een vun de gröttsten Haven-Boosteden in’n Land Bremen. An de ne’e Kaje kunnen in‘t Johr bet 500.000 Mitfohrers bedeent warrn.

Bremer CDU mit Röwekamp as Top-Kandidaat för Bunnsdagswahl

Bremen: De CDU Bremen geiht wedder mit Thomas Röwekamp as Top-Kandidaat in de Bunnsdagswahl. De 113 Delegeerten hebbt em güstern Avend mit goot 96 Perzent wählt. Op Nummer twee steiht Sandra Schmull. Se is 30 Johr oolt un kummt ut Bremerhaven.

A27 bi Nordholt eerstmal dicht

Cuxhaven: De Autobahn 27 na Cuxhaven maakt se vun hüüt Middag Klock 12 op an twüschen Nordholt un Olenwool dicht. Duern schall dat sowat veer Weken, also bet to den 20. Dezember. De Autobahn GmbH will de Stratendeek un en Kanaalrohr unner de Autobahn nee maken. De Ümweg löppt dör Nordholt un Olenwool. In de anner Richt hebbt se de Autobahn al nee maakt.

Dat Weer

Un woans süht dat mit dat Weer umto ut? Opstunns hebbt wi in Bremen un Rotenborg 1 Graad, in Bremerhaven un Emm sünd dat 2 Graad. Vundaag ok wedder vele Wulken, en beten Sunnschien, un pladdern kann dat ok: Schuer mit Regen, Sneeregen, Snee oder Grisselgrussel. Eerst sünd de an de Küst, man över Dag loopt se wieder na dat Binnenland rin. Dat Thermometer krabbelt op 3 bet 6 Graad. De Wind dorto weiht in Maten oder en beten mehr un mit deegte Böen. He dreiht vun Süüdwest na de westen un noordwesten Kant, an de See ok mit stöörmsche Böen. Tokamen Nacht: Mal mehr, mal weniger Wulken, hier un dor ok mit Sneeregen oder Snee, an de See ok Regen. In’t Binnenland dröger. Bi 3 Graad över bet 1 Graad unner 0. Morgen höört de Regen un Sneeregen an de Küst pö a pö op, un denn luuschert ok mal wedder de Sünn dör de Wulken dör. An’n Namiddag schuuvt aver vun Westen wedder dichte Wulken rin, ut de dat later an’n Avend ok regen kann. Bi 4 bet 6 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.