Plattdeutsche Nachrichten Plattdüütsche Narichten vun'n 25. November 2024

SPD will Scholz nu amtlich as Kanzlerkandidat opstellen

Berlin – Dat Präsidium un de Bunnesvörstand vun de SPD wüllt Olaf Scholz nu amtlich as Kanzlerkandidat opstellen. De Gremien hollt darto Raat över een socken Vörslag vun de SPD-Böversten Esken un Klingbeil. An’n Middag wüllt se dat tohoop mit Scholz vermellen. Na dat Enn vun de Ampel-Koalitschon Anfang November geev dat Stimmen, de Verdeffenderenminister Pistorius to’n Kanzlerkandidaten maken wüllt, wiel de Lüüd em dütlich lever möögt. De het aver verklaart, he steiht nich praat darför.

Een Doder bi Afstörten vun een Frachtfleger

Vilnius – Bi dat Afstörten vun een Frachtfleger is tominnst een Minsch üm’t Leven kamen. De Maschien weer in Leipzig losflagen un is an’n fröhen Morrn in de Nöögde vun’n Flegerhaben vun de litauisch Hauptstadt Vilnius afstört. Dat heet, dat veer Minschen an Boord wesen sünd. Een darvun is sturven, dree annere sünd versehrt in’t Krankenhuus kamen, heet dat vun de Redderslüüd. Woso de Maschien afstört is, weet se noch nich.

UN-Staaten verhannelt över Afkamen to Plastik

Busan – In’t südkoreansche Busan fangt de woll letzte Runn to’n Verhanneln över dat plaante UN-Afkamen to Plastik an. Tohoopnahmen söben Daag ward Afordnete ut över 170 Staaten de letzten Punkte för een Afkamen uthanneln. Darmit wüllt se dat henkregen, dat nich mehr so veel Plastik in‘t Meer un in de Natur kummt. Man Länner as Saudi-Arabien un China weern toletzt jümmer gegen een Grenz för dat Produzeren vun Plastik.

CDU will Bremer Huusholt pröfen laten

Bremen – De Bremer CDU will överpröfen laten, of de Huusholt 2024 gegen Gesette verstött. Een socken Andrag ward de Fraktschon hüüt bi ehr Drepen woll besluten. De CDU meent, de Regeern harr keen nee’e Schullen opnehmen dörfen. De Staatsgerichtshoff schall darüm pröfen, of dat rechtens weer. SPD un Gröne bekrittelt düssen Schreed vun de CDU – dat weer blots Wahlkampf.

In Bremen un Bremerhaben fangt de Wiehnachtsmärkte an

Bremen – De Wiehnachtsmärkte fangt vundaag in’t Land Bremen an un dar ward dütlich mehr för de Sekerheit daan. Ok wenn dat keen Henwies op besünnere Gefahren gifft, ward mehr Videokameras lopen un ward dat mehr Metzkuntrullen geven. De Polizei as ok dat Ordnungsamt dröfft Besööker ahn Grund kuntrullieren, of se Metz or annere Wapen darbi hebbt.

Dat Weer

Un nu een Blick op dat Weer: op Wangerooge 13, in Bremerhaben 15 un in Bremen un Deefholt sünd dat opstunns 16 Graad. De Dag fangt erst noch locker wulkig an, later breedt sik aver dicke Wulken ut, de af un an Regen bringen köönt. Dat ward nochmal bannig mild bi 14 Graad op de Eilanden un bit to 17 Graad in’t Binnenland. Mit den Regen ward dat aver köhler. Tokamen Nacht gifft dat meist dicke Wulken un de lichte Regen treckt af. Dat lockert op, aver dat kann wieter natt vun baben kamen. Dat Thermometer sackt op 8 bit 6 Graad. Morrn wesselt sik erst Wulken un Sünnschien af un dat is meist dröög. Later an’n Dag ward de Wulken dicker un dar fallt af un an een beten Regen bi 10 bit 11 Graad.  Dat weern de Narichten op Platt. Sven Weingärtner hett se tohoopstellt. Op platt trechtmaakt un vörleest hett se Heidi Jürgens.