Plattdeutsche Nachrichten Plattdüütsche Narichten vun'n 27. November 2024

Evakueren löppt, wiel de Zünder vun de Bomb in Bremen-Huchten afmakt warrt

Bremen. För dat Afmaken vun den Zünder vun en amerikanisch Weltkriegsbomb in den Bremer Stadtdeel Huchten mööt siet den Vörmiddag vele Anwahners ut ehr Hüüs gahn. Ok Kitas un Pleeghüüs weern rüümt. Bavento fallt an söven Scholen de Ünnerricht ut. Siet den Vörmiddag fallen ok Busse in Huchten ut or weern ümleidt. De 250 Kilo swore Flegerbomb weer güstern bi dat Ünnersöken vun den Bodden funnen wurren. De Kampfmiddelafrüümdeenst will af Klock twee an´n Namiddag den Zünder rutdreihen.

Wapenroh im Libanon hett anfungen

Tel Aviv. Twüschen Israel un de Hisbollah-Miliz in´n Libanon gellt de afsnackte Wapenroh siet den fröhen Morgen. Dat Afkamen is vun de USA un Frankriek vermiddelt wurren. Dat süht vör, dat dat eerstmal för twee Maand kien Kämp un Slachten geven schüllt. In düsse Tiet schüllt sick de israelisch Truppen un de Hisbollah ut den Süüdlibanon torüchtrecken – dor schüllt Suldaten vun de libanesisch Armee ehren Deenst doon. As de Nahrichtenagentur AFP vermellt, sünd in de Twüschentiet ok Vertreder vun de Hamas praat, de Wapen in´n Gazastriepen swiegen to laten.

Europaparlament stimmt över neje EU-Kommischoon af

Straßborg. Dat Europaparlament stimmt an´n Middag över de neje EU-Kommischoon ünner Präsidentin von der Leyen af. De Afornten in Straßborg schüllt all tohoop 26 Kommissore un Kommissorsche bestimmen. Dat gellt as seker, denn de Top-Lüüd vun Konservativen, Sozialdemokraten un Liberalen sünd al vörweg övereens kamen. De tokamen Trupp vun Von der Leyen schall denn in Dezember sien Arbeit opnehmen.

Schipps-Törn-Museum Bremerhaben kriegt wieder natschonal Fördergeld

Bremerhaben. Dat Düütsche Schipps-Törn-Museum in Bremerhaben blifft natschonal Forschen-Museum. Dat hett de Leibniz-Forschen-Gemeenschop fastleggt. Dormit kann dat Schipps-Törn-Museum wieder mit Fördergeller vun Bund un Länner reken. Man de Leibniz-Gemeenschop will dat Museum al na veer Johr wedder ünnersöken, üm to beoordelen, wo dat Museum vörankamen is un of dat noch de wetenschoplich Standards nakaamt. Normal is en Tiet vun söven Johr.

Breemsch Evangeelsch Kark snacakt över Huusholt

Bremen. Dat Karkenparlament vun de Breemsch Evangeelsch Kark is an´n Vörmiddag to sien Harvstdrapen tosamen kamen. In´n Middelpunkt vun dat Drapen steiht de Finanzplan för dat tokamen Johr. De Kark rekend wedder mit een Huusholtslock. En Ursaak sünd de trüchgahn Karkenstüer-Innahmen. Rund 57 Millionen Euro staht de BEK na egen Angaven in dat tokamen Johr praat. Üm all Utgaven decken to könen, will se dorüm spoortet Geld nehmen.

Dat Weer

Un nu noch en Blick op dat Weer: In Deefholt un in Bremen-Mitt veer, in Bremerhaben dree un in Grodenkneten sünd dat opstunns veer Graad. Vundag fangt dat twüschen Weser un Elv mit en beten Sünnschien an. Vun de Ems trecken aver gau dichte Wulken op, de ok Regen bringen. An´n laten Nadmiddag or Avend kann dat hier un dor reell pladdern. De Wind weiht eerstmal en beten. An de See in Maten vun de Süüd- bit Süüdoosten Kant. Dat Thermometer wiest söven bit thein Graad. In de Nacht is de Heven vull mit Wulken. An de Küst kaamt dat reell natt vun baven. Man överall wo man Bremen Een hören kann gifft dat Regenschuer. De Temperaturen liggen bi veer bit söven Graad. Morn wesseln sick dichte Wulken un Oplockerungen mit en beten Sünnschien af. Twüschen Weser un Elv regent dat hier un dor. An´n Namiddag warrt dat vun de Nordsee drög un en beten fründlich. Op dat Thermometer stahn denn söven bit negen Graad. Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Markus Weise.