Plattdeutsche Nachrichten Plattdüütsche Narichten vun'n 26. November 2024

Verfohren gegen tokünftig Präsidenten Trump ward instellt

Washington – De US-Staatsanwaltschupp beandragt dat Instellen vun twee Verfohren gegen den tokünftig Präsidenten Trump. Se foddert een Enn vun de Straafverfohren wegen versöökte Wahlbedreegree un wegen Papeeren, de he na sien erste Amtstied behollen hett, ofschoons dat verboden weer. Ünnerdess hett Trump ankünnigt, dat he an sien ersten Dag as Präsident hoge Tölle op Waren ut Mexiko, Kanada un China op’n Weg bringen ward. He wull darmit gegen Inwannerung un Drogenhannel vörgahn, sä he.

Israel un Hisbollah kummt Wapenstillstand nöger

Tel Aviv – In’n Striet twüschen Israel un de pro-iransche Hisbollah in’n Libanon gifft dat Teken, dat se sik villicht op een Wapenroh eenigen köönt. Dat israelsche Sekerheitskabinett will över een Füerpaus entscheden, heet dat ut Kreisen vun de Regeern. Toletzt weer de Drock ut de EU un den USA grötter worrn. De Hisbollah harr mit Attacken ut’n Libanon een tweete Front gegen Israel open maakt.

Arbeitsmarkt bruukt veel mehr Towannerer, seggt een Ünnersöken

Gütersloh – Üm noog Arbeiders in de tokamen Johrteinten to hebben, bruukt Dütschland bit 2040 in’t Johr 290-dusend Towannerer, dat is bi een Ünnersöken rutsuert. De Bertelsmann Stiftung vermellt, ahn Towannerung wöör de Tall vun de Lüüd, de arbeiden köönt, op weniger as 42 Millionen trüchgahn.

Ok in Bremen gifft dat mehr Fälle vun Stickhoosten

Bremen – Ok in Bremen gifft dat besünners vele Fälle vun Stickhoosten. Dat Gesundheitsamt hett för dütt Johr 158 Fälle vörliggen. Dat is de tweethööchste Tall in de verleden tein Johren. Dat Robert-Koch-Institut hett tohoopnahmen för Dütschland mehr Kranke mit Stickhoosten faststellt. Mag ween, un dat liggt daran, dat dat na de Corona-Pandemie mehr Fälle gifft un dat woll ok mehr op Pertussis test ward.

Arbeiders vun’n Bremer Stahlwark kummt tohoop

Bremen – In’n Stahlwark in de Stadt kummt de Arbeiders an’n Namiddag to een Bedreevsversammeln tosamen, de egens nich plaant weer. Darachter stickt, dat de Lüüd bang sünd, dat ArcelorMittal dat Wark villicht nich klimafründlich ümrüsten will. De Gewarkschupp IG Metall foddert een klaret „Ja“ vun de Böversten. För den Ümboo vun dat Bremer Wark hebbt de Bund un dat Land Bremen all orrig hoge Geller toseggt. In’t Bremer Stahlwark arbeidt rund 3.300 Minschen.  

Dat Weer

Un nu een Blick op dat Weer: in Bremerhaben 7, in Bremen, Deefholt un op Wangerooge sünd dat opstunns 8 Graad. Hüüt is dat erst dröög un Wulken un Sünnschien wesselt sik af. Den Dag över treckt aver jümmer wedder dickere Wulkenfeller dör un dat kann een beten Regen geven – bi 10 bit 11 Graad. Tokamen Nacht is de Heben meist klaar bit locker wulkig un dat is meist dröög. An de Nordsee kann dat aver ok verenkelt mal natt vun baben kamen. Dat Thermometer sackt op 6 bit 2 Graad. Morrn fangt de Dag locker wulkig an, mit een beten Sünnschien. Vun de Ems her treckt dat aver to un dat fangt later an to schuern. Vun’n laten Namiddag an un to’n Abend hen kann dat ok orrig pladdern – bi 7 bit 9 Graad. Dat weern de Narichten op Platt. Sven Weingärtner hett se tohoopstellt. Op platt trechtmaakt un vörleest hett se Heidi Jürgens.