Plattdeutsche Nachrichten Plattdüütsche Narichten vun'n 16. Januar 2025

Baerbock freit sik över Wapenroh-Afkamen

Gaza – Bunnesbutenministersche Baerbock freit sik över de ankünnigte Wapenroh för den Gaza-Striepen. Dat wichtigst ward sien, dat een Deel vun de israelschen Geiseln free kummt un de Laag för de Minschen in’n Gaza-Striepen beter ward, sä Baerbock in’n Morrnmagazin vun ARD un ZDF. Dütschland wees mit de europäischen Partnern praat, Hölp för de Minschen över den Grenzövergang Rafah in den Gaza-Striepen to bringen.

Unnersökensutschuss to’n Utstieg ut de Atoms

Berlin – In’n Bunnesdag kummt hüüt nochmal de Ünnersökensutschuss to’n Utstieg ut de Atoms tohoop. As letzte Tügen seggt Bunneswertschuppsminister Habeck un Bunneskanzler Scholz ut. De Utschuss schall klären, wat jem vörsmieten ward: of de Bunnesregeern een mögelk Wieterbedreven vun de Atomkraftwarke würklich so pröövt hett, dat dat noch nich seker weer, wat dar rutsuert.

Özdemir hoopt, de Muul- un Klauensüük in’n Griff to kregen

Berlin – Bunneslandwertschuppsminister Özdemir will de Muul- un Klauensüük in’n Griff kregen. Wi hebbt ut Vörsicht allens daan, wat wi köönt, sä Özdemir in de Tagesthemen. Wenn dat aver noch mehr Fälle gifft, weern de Folgen för de Wertschupp nich aftosehn, so de Grönen-Politiker wieter. Dat weer denn erstmal an de Bunneslänner, den Buern den Utfall to betahlen. An’n Freedag weer de Muul- un Klauensüük op een Hoff in Brannenburg faststellt worrn.

Perzess wegen Füerpüsteree in Jugendzentrum fangt an

Bremen – An’t Landgericht hett de Perzess wegen swarer Füerpüsteree in een Bremer Jugendzentrum anfungen. Anklaagt sünd dree Mannslüüd, de woll ok wat mit Rechtsextremen to daan hebbt. Jem ward sware Füerpüsteree vörsmieten un dat se anner Minschen gefährlich wat andoon hebbt. As de Staatsanwaltschupp vermellt, schüllt se in’t Johr 2020 een Brandanslag op dat Bremer Jugendzentrum „De Friese“ in’n Veertel maakt hebben.

15-Jöhriger in Bremerhaben wedder free

Bremerhaben – De 15-Jöhrige, de mit Anslääg draut hett, is wedder free. Dat Amtsgericht hett den Andrag vun de Staatsanwaltschupp op Ünnersökenshaft aflehnt. Dat Gericht meent, dat geev keen Gefohr, dat he dat nochmal maakt or flüchten ward. De Staatsanwaltschupp is nich inverstahn darmit un geiht dargegen an. De 15-Jöhrige schall in’t Internet Anslääg gegen sien School un twee Moscheen ankünnigt hebben, viellicht ut rechtsextremen Grünnen.

Dat Weer

Un nu een Blick op dat Weer: in Deefholt 3, in Bremen, Bremerhaben un op Wangerooge sünd dat opstunns 4 Graad. Hüüt hollt sik faken dicke Wulken, dat blifft to’n Deel ok länger diesig un daakig un dar kann een beten Sprütteregen daalkamen. Meist is dat aver dröög un in’n Süden vun Bremen kann dat an’n Middag un Namiddag ok een beten oplockern un de Sünn kiekt mal rut – bi 5 bit 7 Graad. Tokamen Nacht is de Heben erst mal locker wulkig or klaar, later treckt aver faken dicke Nevel- un Hoochnevelfeller op. Dat blifft meist dröög un dat Thermometer sackt op plus 2 bit minus 2 Graad. De Dag fangt morrn faken gries un mit Nevel an, aver meist överall dröög. An’n Middag un Namiddag lockert dat ok mal op un de Sünn wiest sik. Man dat gifft Flachs, dar blifft dat den helen Dag gries – bi 2 bit 5 Graad. Dat weern de Narichten op Platt. Gabriele Intemann hett se tohoopstellt. Op platt trechtmaakt un vörleest hett se Heidi Jürgens.