Plattdeutsche Nachrichten Plattdüütsche Narichten vun'n 14. März 2025

Se verhannelt wieder över de Tarifen in den öffentlichen Deenst

Potsdam: Jüst nu geiht de drüdde Runn los bi dat Uthanneln vun de Tarifen för de 2,5 Millionen Lüüd, de in den öffentlichen Deenst vun Bund un Kommunen arbeiden doot. Karin Welge, se hett dat Leit bi de Gemeenden as Arbeitgevers, harr bi dat Redaktschoonsnettwark Düütschland anseggt: De Gewarkschap verlangt veel to veel. Nu güng dat dorüm, dat de Wirtschap in Gang kummt. Bund un Kommunen kunnen mit dat Geld nich eenfach so um sik smieten. De Gewarkschap Verdi verlangt 8 Perzent mehr Geld, tominnst aver 350 Euro, un bavento dree fre'e Daag. De Arbeitgevers hebbt noch keen Vörslag op den Disch leggt.

Bunnswahlutschuss mit de amtlichen Tallen vun de Bunnsdagswahl

Berlin: De Bunnswahlutschuss maakt glieks künnig, wat unner’n Streek bi de Bunnsdagswahl rutkamen is. Se fraagt: Gifft dat Fehler, is dor wat nich orntlich aflopen oder ännert sik wat an de Tallen. Akkraat henkieken warrt ok dat Bündnis Sarah Wagenknecht, BSW. De weren knapp unner dat 5-Perzent-Mark bleven. Gegen de amtlichen Tallen kann dat BSW angahn – bi den Wahlprööv-Utschuss vun den Bunnsdag. Opletzt kunn dat Bunnsverfatensgericht anseggen, wat de Krüzen nee uttellt warrn mööt.

Steinmeier diskereert över Corona-Pandemie

Berlin: Bunnspräsident Frank-Walter Steinmeier hett Lüüd inlaadt un snackt mit jem doröver, wat de Corona-Tiet för uns Land bedüdt. Versammelt hebbt sik Lüüd ut Medizin, Pleeg, Bildung, Kultur, Wirtschap un Ehrenamt. Ut Bremen dor mit bi is ok de Geschäftsföhrerin vun de Shakespeare-Company, Renate Heitmann. Vörher harr Steinmeier kloormaakt: De Corona-Tiet müss vun de Politik gauer vun all Kanten ankeken warrn. Schull de ne’e Bunnsdag sik nich gau um düt Thema kümmern, denn wörr he as Bunnspräsident düsse Opgaav in de Hand nehmen.

Mehr Pleiten in Bremen un Bremerhaven

Bremen: In’t Land Bremen hett dat verleden Johr wedder mehr Pleiten geven. Dat Statistische Lannsamt hett 2024 sowat 1700 Pleiten tellt. Dat sünd 180 mehr as een Johr vörher. Mehr worrn sünd vör allen de privaten Insolvenzen. Dat Firmen in’t Land Bremen keen Geld mehr harrn, dat is en beten weniger worrn. Düütlich trüchgahn sünd de Tallen bi Gesundheit, wo doch 2023 en Reeg Pleegheime keen Reken mehr betahlen kunn. Kloor mehr Pleiten hebbt se aver bi Gast- un Wirtshüüs tellt.

Füer in den Kreis Leer: Negen Minschen verletzt

Buund: In den Kreis Leer sünd verleden Nacht negen Minschen verletzt worrn, as dat in en Part vun en Dubbelhuus brennt hett. Na een Mann söökt se noch. De Polizei seggt: In dat Huus weren Arbeiders op Montaasch unnerbrocht. As de Füerwehr dor ankeem, hett de böverste Etaasch al heel un deel brennt. Um un bi 60 Füerwehrlüüd kunnen dat Huus nich mehr redden. De Polizei taxeert den Schaden op sowat 800.000 Euro.

Dat Weer

Un woans süht dat mit dat Weer umto ut? Opstunns hebbt wi in Bremen, Frieseythe un Weyerbarg 3 Graad, in Bremerhaven sünd dat 4 Graad. Vundaag: Mal mehr, mal weniger Wulken, eerst pladdert dat ok noch mal. Över Dag ok mal Sunnschien, man mehr schuern kann dat ok, tohoop mit Snee oder Grisselgrussel. Dat Thermometer krabbelt op 4 bet 7 Graad. De Wind dorto weiht flau, an de See ok wat mehr un in deegte Böen, vun de noorden Kant. Tokamen Nacht: Dat höört op to pladdern, un denn kriegt wi ok de Steerns to sehn. Bet to’n Morgen köönt sik Placken mit Daak oder hogen Daak utbillen. Bi 2 Graad över bet 3 Graad unner 0. Dat kann glatt warrn. Morgen: Eerst Wulken, hier oder dor ok dakig-gries. An’n Vörmiddag al lockert dat vun de Elv un de Noordsee mehr un mehr op. Vun Middag op an: Sunnschien mit en poor opstiegen Wulken. Dröög. Dat Ganze bi 5 bet 8 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Gabriele Intemann.